Mateu 7 - MUKANDA USANDU WA ZAMBI 1975

¹ Kanda nupatwila akwenu, mba kechi kanupatwila.

² Mumu upatwilo uze munupatula nawo akwenu, kumanupatwila: ni cheseko chize munweseka nacho, kumanwesekela.

³ Alioze kuchi te unatale ku koma kaze kali mu liso lia mukwenu, alioze kushi kumona mukambo uze uli mu liso lie?

⁴ Hanji ngwe kuchi muwamba kuli mukwenu ngwe, Ngutayize, nguchize koma mu liso lie; kumanyi, mukambo uli mu liso lia yena mwene?

⁵ Chilembese, Uliange kuchiza mukambo mu liso lie; mba mumona kanawa kuchiza koma mu liso lia mukwenu.

⁶ Kanda nuhana yuma yisandu kuli tuwa, chipwe kanda numbila kakanga kenu kumeso ja ngulu kuchina hanji mamuliata ni sende jo, mba matewuluka anupapulule.

⁷ Etenu, mba kumanwaha; fupenu, mba kumunuwana; ngongwelenu, mba kumanwazulwila.

⁸ Mumu mweswe meta, matambula; ni yoze mafupa, mawana; ni yoze mangongwela, kumamwazulwila.

⁹ Hanji mutu muka, kachi mwanenyi mamwita mbolo, mamwaha liwe?

¹⁰ Hanji kachi meta yishi, mamwaha kapela, nyi?

¹¹ Kachi yenu, nuli api, nunanyingika kuhana yawana yipema kuli ana jenu, Shinaho chikolo Tatenu yoze uli mu malilu mahana yuma yipema kuli waze mamwita, nyi?

¹² Yuma yeswe kashika nunazange atu akanulinge, chizechene lingenu kuli ayo: mumu chino ye shimbi ni ye yiyulo ya aprofeta.

¹³ Njilenu ku chikolo chikehe: mumu chikolo chize chatwala ku kwonwona, chinene, ni ye jila kuyatoha, ni waze akunjilamo anji.

¹⁴ Alioze chikolo chize chatwala ku mwono, chikehe, ni ye jila yikehe, ni waze akuyiwana akehe.

¹⁵ Alioze keyelenu aprofeta a kwonga, waze akwiza kuli yenu ni mazalo ja mapanga, alioze muchima kanapu tungunga a kunuwumbula.

¹⁶ Ku mihuko yo kumunukaanyingika. Atu mahela uva ku mingonga, nyi? Hanji makuyu ku mikalale, nyi?

¹⁷ Chizechene mitondo yeswe yipema kuyakwima mihuko yipema, alioze mutondo wamokomoko kuwakwima mihuko yipi.

¹⁸ Mutondo upema kuushi kuhasa kwima mihuko yipi, chipwe mutondo wamokomoko kuushi kuhasa kwima mihuko yipema.

¹⁹ Mitondo yize yeswe kuyishi kwima mihuko yipema mayipakula, mayimbila mu kahia.

²⁰ Kashika ku mihuko yo kumunukaanyingika.

²¹ Hi mweswe ko mamba kuli yami ngwenyi, Mwene, Mwene, makanjila mu wanangana wa malilu, alioze yoze wakulinga upale wa Tata yoze uli mu malilu.

²² Anji kumakamba kuli yami ha tangwa lize ngwo, Mwene, Mwene, kutwaprofetezele ni jina lie, nyi? Ni jina lie kutwatuhwishile andemoniu, nyi? Ni jina lie kutwalingile yipupu yinji, nyi?

²³ Hohene mungukaakumbulula ngwami, Chanunyingikine nilimwe tangwa: katukenu kuli yami, yenu, nwakulinga uhulia.

²⁴ Kashika mweswawo mevwa wano maliji jami, nyi maalinga, kumamupwisa ngwe mukwa kukanyama yoze watungile zuwo lienyi ha liwe:

²⁵ vula wanokene, ni mihwiji yejile, ni fuji yalambile ha zuwo lize; alioze kuliapuzukile: mumu alitungile ha liwe.

²⁶ Mweswe mevwa wano maliji jami, keshi kwalinga, kumamupwisa ngwe chihepuke, yoze watungile zuwo lienyi ha masekeseke:

²⁷ ni vula wanokene, ni mihwiji yejile, ni fuji yapupile zuwo lize; mba liapuzukile; ni kupuzuka chalio chapwile chinene.

²⁸ Muze te Yesu hamanununa maliji ano, mbunga alishimwokene ha longeso lienyi.

²⁹ Mumu waalongesele ngwe umwe ukwete chiyulo, hi ngwe akwa kusonyeka ko.