Mateu 6 - MUKANDA USANDU WA ZAMBI 1975

¹ Keyelenu kanda nukalinga yilinga yenu ya ululi kumeso ja atu mukumoneka kuli ayo: nyi ka, kunushi kutambula kwononona nichimwe kuli Tatenu yoze uli mu malilu.

² Kashika muze muhana yawana, kanda ukemba chitavwi kulutwe lie, ngwe yilembese akulinga mu masunangonga ni mu mikombwelo, hanga akaachichimieke kuli atu. Pundu ngunambe kuli yenu ngwami, Hanatambula kwononona cho.

³ Alioze yena muze muhana yawana, kwoko lie lia chimeso kanda likanyingika chize kwoko lie lia chindume mulilinga:

⁴ hanga kuhana che chikapwe ku tenga: ni Tatenu yoze wakumona ku tenga, kumakakukundulula.

⁵ Muze mulemba kanda upwa ngwe yilembese, mumu mafwila kulemba nikumana mu masunangonga ni ha malindalinda ja matapalo, hanga akasoloke kuli atu. Pundu ngunambe kuli yenu ngwami, Hanatambula kwononona cho.

⁶ Alioze yena muze mulemba, njila mu chipatulo che cha muchima, ni muze hiwájila pito lie, ukalembe kuli Tatenu yoze uli ku tenga, ni Tatenu yoze wakumona ku tenga, kumakakukundulula.

⁷ Ha kulemba kanda nukakokojola chamokomoko ngwe akwa mavungu akulinga: mumu o kakushinginyeka ngwo, Makatupanjika ha kuhanjika chetu chinji.

⁸ Kashika kanda nukalifwa no: mumu Tatenu kananyingika yuma yize nwakufupafupa, shimbu kanda nwita kuli iye.

⁹ Ngwe chino kashika lembenu ngwenu, Tata uli mu malilu, jina lie lipwe lisandu.

¹⁰ Wanangana we wize. Upale we ulingiwe hashi chizechene ngwe unalingiwe mwilu.

¹¹ Twehe kama musono mbolo yetu yize twakufupafupa.

¹² Utukonekene kama makongo jetu ngwe yetu nawa twakukonekena waze ali ni makongo kuli yetu.

¹³ Kanda ukatutwala kama ku cheseko, alioze tupulule kama kuli mwe mupi. Mumu we wanangana, ni je tachi, ni we uhenya, yeswe niye ndo ku miaka yeswe. Amene.

¹⁴ Mumu kachi yenu munukonekena atu milonga yo, kachi Tatenu wa mwilu nawa makanukonekena.

¹⁵ Alioze kachi yenu kunushi kukonekena atu milonga yo, kachi Tatenu wa mwilu kechi kanukonekena milonga yenu.

¹⁶ Muze munulitwamina kulia, kanda nupwa ngwe yilembese, akuhonga ku meso: mumu kakupihisa meso jo, hanga akasoloke kuli atu ngwe analitwamina kulia. Pundu ngunambe kuli yenu ngwami, Hanatambula kwononona cho.

¹⁷ Alioze yena muze mulitwamina kulia, wayisa mutwe we, usane ku meso je;

¹⁸ hanga kuchi kasoloka kuli atu ngwe unalitwamina kulia, alioze kuli Tatenu yoze uli ku tenga: ni Tatenu, yoze Wakumona ku tenga kumakakukundulula.

¹⁹ Kanda nutulika upite hano hashi, haze ndulu ni ngengeya kuyakuvungula; haze eji kakulokola mazuwo nikwiya.

²⁰ Alioze litulikilenu upite mwilu, muze chipwe ndulu chipwe ngengeya kuyishi kuvungula, ni eji keshi kulokola mazuwo chipwe keshi kwiya.

²¹ Mumu muze upite we uli, muze mwene muyipwa mbunge ye nawa.

²² Ndeya ya mujimba, liso: kashika kachi liso lie mulipwa Ungunu, kachi mujimba we weswe muuzala tò ni pangu.

²³ Alioze kachi liso lie mulipwa lipi, kachi mujimba we weswe muuzala tò ni milima. Kashika kachi pangu lize lili muli yena mulipwa milima, milima yipwa haha!

²⁴ Niumwe mahasa kulingila miata aali: mumu hanji mavwila kole umwe, mazanga mukwo; hanji makakaminya kuli umwe, malelesa mukwo. Kunwahashile kulingila Zambi ni kulingila upite hamuwika.

²⁵ Kashika ngunambe kuli yenu ngwami, Kanda nulipikala ha mwono wenu, chize munulia, ni chize mununwa, chipwe ha mujimba wenu, chize munuzala. Mwono kuwahianyine kulia, nyi? Mujimba kuwahianyine mazalo, nyi?

²⁶ Talenu tujila a mwilu, keshi kukuwa, chipwe keshi kucha, chipwe keshi kukungila mu machila; alioze Tatenu wa mwilu kakwahoka. Yenu kunwaahianyine chikolo, nyi?

²⁷ Alioze iya wa kuli yenu ha kulipikala mahasa kuweza mbandu yimuwika ku Chizundamo chenyi?

²⁸ Mba kuchi te nunalipikala ha mazalo? Lilongesenu ku lirio ya mu yambu, ngwe chize muyitatuka; kuyishi kukilikita, chipwe kuyishi kuhosa:

²⁹ hindu ngunambe kuli yenu ngwami, Chipwe Solomone mu uhenya wenyi weswe kazalile ngwe chimwe cha ku yitemo yino.

³⁰ Alioze kachi Zambi chocho majika mwambu wa mu yambu, uze muupwa musono ni hamene maumbila mu jiko, Shinaho chikolo yenu, nyi? Yenu akwa Ufulielo ukepe?

³¹ Kanda nulipikala kashika, ngwenu, Chika mutulia? Hanji, Chika mutunwa? Hanji, Chika mutuzala?

³² Mumu yino yuma yeswe akwa mavungu kakuyifupa; mumu Tatenu wa mwilu kananyingika ngwe nwakufupafupa yino yuma yeswe.

³³ Alioze liangenu kufupa wanangana wenyi ni ululi wenyi mba kumanuwezela yino yuma yeswe.

³⁴ Kanda nulipikala kashika ha tangwa lia hamene: mumu tangwa lia hamene ni yipikalo yalio. Yipi ya tangwa lieswe muyilita ni lie tangwa.