Mateu 5 - MUKANDA USANDU WA ZAMBI 1975

¹ Ha kumona mbunga, wakandukile ha mulundu, ni muze te hatwama, tumbaji twenyi ejile kuli iye:

² Wapakwile kanwa lienyi, waalongesele, ngwenyi,

³ Kawaha yiswale mu Spiritu, mumu wanangana wa malilu niwo.

⁴ Kawaha waze akulinyenga, mumu kumakaalembejeka.

⁵ Kawaha akwa kushimbika, mumu kumakatunga he hashi.

⁶ Kawaha waze akwivwa usona ha ululi, ngwe zala ni pwila anevu, mumu kumakakuta.

⁷ Kawaha akwa kwivwa keke, mumu kumakawana keke.

⁸ Kawaha akwa kupema mu mbunge, mumu kumakamona Zambi.

⁹ Kawaha yitakanyishi, mumu kumakaavuluka ngwo, Ana a Zambi.

¹⁰ Kawaha waze anaahungumiona mumu ha ululi, mumu wanangana wa malilu niwo.

¹¹ Kunwawaha muze manuchoka, ni muze manuhungumiona, ni muze manulamikiza ungulungulu, mumu hali yami.

¹² Wahililenu, likwizenu, mumu kwononona chenu chinene mu malilu: mumu chocho ahungumionene aprofeta waze aliangilile.

¹³ Yenu nuli mungwa wa hashi: alioze kachi mungwa unasamuka, neka mauyemesa nawa? Kuwatele nawa nichimwe shina kuumbila haze, akauliate kushi lia yiliato ya atu.

¹⁴ Yenu nuli pangu lia hashi. Limbo lize liatungiwa ha mulundu kulishi kuhasa kuswama.

¹⁵ Chipwe atu keshi kuwika ndeya, akayise mushi lia chisoka, alioze ha chikwachilo cha ndeya, mba muyitemuka kuli waze eswe ali mu zuwo.

¹⁶ Chizechene pangu lienu likatemuke kumeso ja atu, hanga akamone yitanga yenu yipema, akachichimieke Tatenu yoze uli mu malilu.

¹⁷ Kanda nushinginyeka ngwe nejile mukwonwona shimbi hanji mikanda ya aprofeta; chejile mukwonwona, alioze mukumanununa.

¹⁸ Mumu pundu, ngunambe kuli yenu ngwami, Ndo lilu ni hashi muyihwa, toshi limuwika hanji toma yimuwika kuyichi kahwa nichimwe ku shimbi ndo yeswe muyiza kupwa.

¹⁹ Kashika mweswawo matangula limuwika lia ku maliji ano akepe ahiana eswe a shimbi, malongesa atu chocho, kumakamuvuluka ngwo, Mukepe Wahiana eswe mu wanangana wa malilu: alioze mweswawo nwalinga, nikwalongesa, mwenawo kumakamuvuluka ngwo, Munene mu wanangana wa malilu.

²⁰ Mumu ngunambe kuli yenu ngwami, Kunuchi kanjila nichimwe mu wanangana wa malilu shina ululi wenu muuhiana uze wa akwa kusonyeka ni A-Fwariseu.

²¹ Hinunevu ngwe achambile kuli a shakulu ngwo, Kanda ushiha; mweswawo mashiha matela upatwilo.

²² Alioze yami ngunambe kuli yenu ngwami, Mweswawo matenuka ni mukwo matela upatwilo; ni mweswawo mamba kuli mukwo ngwenyi, Raka! matela upatwilo unene; ni mweswawo mamba ngwenyi, Yena chihepuke! matela upatwilo wa Ngehena ya kahia.

²³ Kashika kachi unalambula chawana che ku chilumbilo, ni kuze muwiwuluka ngwe mukwenu chuma chimwe a kuli nacho.

²⁴ Hichikako chawana che ku chilumbilo, Uliange kuya ukawane ni mukwenu, mba ukeze, ukalambule chawana che.

²⁵ Litese nikawashi ni mukwa kole ye, shimbu uli hamwe nenyi mu jila, kuchina hanji mukwa kole ye makukunjika kuli sopi, ni sopi makukunjika kuli kapita, akakumbile mu zuwo lia ususu.

²⁶ Pundu ngunambe kuli yena ngwami, Kuchi katuhukamo nichimwe ndo mufweta kalumbongo ka kusula.

²⁷ Hinunevu ngwe achambile ngwo, Kanda ulinga utanji:

²⁸ alioze yami ngunambe kuli yenu ngwami, Mweswawo matala pwo mukumuvwila usolo, halinga nenyi utanji kulu mu mbunge yenyi.

²⁹ Alioze kachi liso lie lia chindume mulikutalingisa, litombongonemo, ulimbile: mumu Shinaho utokese chihanda chimuwika, kuchina mujimba we weswe makaumbila mu Ngehena.

³⁰ Nyi kachi kwoko lie lia chindume mulikutalingisa, liteteko, ulimbile: mumu Shinaho utokese chihanda chimuwika kuchina mujimba we weswe maumbila mu Ngehena.

³¹ Achambile nawa ngwo, Mweswawo malakula mukwo-pwo, akamwehe mukanda wa kulakula.

³² Alioze yami ngunambe kuli yenu ngwami, Mweswawo malakula mukwo-pwo shina ha chikuma cha upangala, mamupwisa chitanji; ni mweswawo mambata yoze hanamulakula malinga utanji.

³³ Cheka nawa hinunevu ngwe achambile kuli a shakulu ngwo, Kanda nulishinga, alioze ukamanunune kuli Mwene mashingo je.

³⁴ Alioze yami ngunambe kuli yenu ngwami, Kanda nulishinga nichimwe; chipwe ni lilu, mumu ye ngunja ya Zambi;

³⁵ chipwe ni hashi, mumu che chitwamo cha yiliato yenyi; chipwe ni Yerusaleme, mumu lie limbo lia Mwanangana munene.

³⁶ Chipwe kanda ulishinga ni mutwe we, mumu kushi kuhasa kupwisa lukambu umuwika mutoma chipwe mulá.

³⁷ Alioze liji lienu likapwe, ewa, ewa; hanji ka, ka, mumu yeswayo yahiana yino yakatuka kuli mwe mupi.

³⁸ Hinunevu ngwe achambile ngwo, Liso ha liso, lizo ha lizo:

³⁹ alioze yami ngunambe kuli yenu ngwami, Kanda nukalimika ni ungulungulu: alioze mweswawo makulamba ha tafu lia chindume, mutewulwile likwo nawa.

⁴⁰ Kachi umwe mazanga kukusuma mulonga, akuchize mbinja, mwehe chikuto che nawa.

⁴¹ Mweswawo makukamba kuya nenyi kilometro yimuwika, yako nenyi jiali.

⁴² Hana kuli yoze makwita, ni kuli yoze mazanga kukutambula mukuli kanda ukamumba nyima.

⁴³ Hinunevu ngwe achambile ngwo, Ukazange mwenyembo we, ukavwile kole mukwa kole ye:

⁴⁴ alioze yami ngunambe kuli yenu ngwami, Zangenu akwa kole jenu, Wahisenu waze akunushinga, lingenu kanawa kuli waze akunuvwila kole, lembenu hali waze akunusaula ni waze akunuhungumiona;

⁴⁵ hanga nukapwe ana a Tatenu yoze uli mu malilu: mumu kakuvumbula tangwa lienyi hali api ni apema; kakunokesa vula hali akwa ululi ni hali yihenge.

⁴⁶ Mumu kachi nunazange waze akunuzanga, kwononona chika nuli nacho? Chipwe akwa kufwetesa lijimu keshi kulinga chimuwika, nyi?

⁴⁷ Mumu kachi nunameneka akwenu wika, ika nunalingi kuhiana akwo? Akwa mavungu keshi kulinga chocho, nyi?

⁴⁸ Kashika pwenu angunu, ngwe Tatenu wa mwilu kapwa mungunu.