Mateu 4 - MUKANDA USANDU WA ZAMBI 1975

¹ Hohene amutwalile ku puya ku tachi ja Spiritu, hanga akamweseke kuli Ndiapu.

² Walitwaminyine kulia makumi awana a matangwa ni makumi awana a ufuku, ni kulutwe lia chize wevwile zala.

³ Mukwa kweseka wejile nikwamba ngwenyi, Kachi yena uli mwe Mwana Zambi, amba mawe ano alumuke mbolo.

⁴ Alioze iye wakumbulwile ngwenyi, Chinasonewa ngwo, Hi ku mbolo wika ko, mutu mapwa ni mwono, alioze ku maliji eswe akutuhuka mu kanwa lia Zambi.

⁵ Hohene Ndiapu yamutwala ku limbo lisandu; wamusele ha kasonga ka tembele,

⁶ yamba kuli iye ngwenyi, Kachi yena uli mwe Mwana Zambi, limbile hashi; mumu chinasonewa ngwo, Kumakahana shimbi kuli angelo jenyi ha kutwala kuli yena: ha moko jo kumakakumbata, kuchina muhukana chiliato che ku liwe.

⁷ Yesu wambile kuli iye ngwenyi, Cheka nawa chinasonewa ngwo, Kanda ukeseka Mwene Zambi ye.

⁸ Cheka nawa, Ndiapu yamutwala ku mulundu usuku chikolo, yamulweza mawanangana eswe a hano hashi ni uhenya wo:

⁹ wambile kuli iye ngwenyi, Yino yuma yeswe mungukwaha, kachi mafulamana unguwayile.

¹⁰ Hohene Yesu yamba kuli iye ngwenyi, Sosolokako Satana: mumu chinasonewa ngwo, Ukawayile Mwene Zambi ye, iye wika ukamulingile.

¹¹ Hohene Ndiapu yamuhichika, ni kumanyi, angelo ejile amuvumbike.

¹² Achi, muze Yesu evwile ngwo, Hasa Yoano mu zuwo lia ususu, wakatukile aye ku Ngalileya.

¹³ Yahichika Nazare, yaya mukutwama mu Kafwanaume, limbo lize Uli ku sesa lia Chitende, mu manjiza ja Zapulone ni Napatali;

¹⁴ hanga chikamanunuke chize ahanjikile ku kanwa lia profeta Izaia, ngwenyi,

¹⁵ Chifuchi cha Zapulone ni chifuchi cha Napatali, Jila ya Chitende kuze kanda lia Yordau, Ngalileya ya akwa mavungu,

¹⁶ Atu aze atwamine mu milima hanamono pangu linene, Waze atwamine mu chifuchi cha kufwa ni Chizulie chacho, Kuli ayo pangu hilinasoloka.

¹⁷ Chize ku mwaka uze Yesu waputukile kwambujola, ngwenyi, Likonyekenu; mumu wanangana wa malilu hiunakundama.

¹⁸ Ha kusesesa Chitende cha Ngalileya, wamwene asongo-ni-mutu, Semone yoze anamuvuluka ngwo, Petulu, ni mwanakwo Andeleu, kanatela wanda mu Chitende; mumu apwile akwa kutela yishi.

¹⁹ Yamba kuli ayo ngwenyi, Tweyenu kunyima yami, mungunupwisa akwa kutela atu.

²⁰ No haze hene ahichikile manda jo, amukawile.

²¹ Ha kusenya kuze kulutwe, wamwene asongo-ni-mutu akwo, Tiangu, mwana Zembendeu, ni mwanakwo Yoano, mu ulungu hamwe ni tato Zembendeu, kananukunyona manda jo, waatambikile.

²² Haze hene ahichikile ulungu ni tato, amukawile.

²³ Yesu wayile nikujingajinga mu Ngalileya mweswe, nikulongesa mu masunangonga jo, nikwambujola sango lipema lia wanangana, nikuwuka misongo yeswe, ni weji weswe hakachi ka atu.

²⁴ Lufuma wenyi wafumanyine mu Seria mweswe; anehene kuli iye waze eswe ayijile, a kukwachika ni misongo yeka ni yeka ni yipupilo, ni akwa ndemoniu, ni akwa musongo wa ngulu, ni akwa kalepa, waawukile.

²⁵ Ni mbunga jinji amukawile ja ku Ngalileya, ni ja ku Ndekapole, ni ja ku Yerusaleme, ni ja ku Yundeya, ni ja kuze kanda lia Yordau.