Mateu 3 - MUKANDA USANDU WA ZAMBI 1975

¹ Ha matangwa aze Yoano Chipapachisa wasolokele nikwambujola mu puya ya Yundeya,

² ngwenyi, Likonyekenu; mumu wanangana wa malilu hiunakundama.

³ Mumu yono amuvulukile ku kanwa lia profeta Izaia ngwenyi, Liji lia yoze wakukololoka mu puya ngwo, Lulikenu jila ya Mwene, Lulamisenu yikoka yenyi.

⁴ Yoano mwene wapwile ni mazalo jenyi a wona a kamelu, ni muya wa lambu kujingilika mu zalilo yenyi; kulia chenyi chapwile makumbi ni wuchi wa mu musenge.

⁵ Hohene kwatuhukile kuli iye A-Yerusaleme, ni A-Yundeya eswe, ni akwa chifuchi cheswe cha kujingilika Yordau;

⁶ waapapachishile mu lwiji Yordau, o nikushikisa milonga yo.

⁷ Alioze muze amwene anji a kuli A-Fwariseu ni A-Satuseu kaneza ku upapachiso wenyi, yamba kuli ayo ngwenyi, Yenu, vungu lia yihili, iya unakanutoweza kuchina utenu uze muwizaho?

⁸ Imenu kashika mihuko ya kutela kulikonyeka:

⁹ kanda nushinginyeka kwamba muli yenwene ngwenu, Apalahama tuli nenyi kaka: mumu ngunambe kuli yenu ngwami, Chipwe ku mawe ano Zambi mahasa kusangula ana kuli Apalahama.

¹⁰ Chipwe haliapwila hasa njimbu ku miji ya mitondo: kashika mitondo yize yeswe kuyishi kwima mihuko yipema mayipakula nikuyimbila mu kahia.

¹¹ Yami chamwenemwene ngunanupapachisa mu meya nulikonyeke: alioze yoze meza kunyima yami kakangana kuhiana yami, haku jenyi chatelele kujimbata: iye kumakanupapachisa muli Spiritu Musandu ni mu kahia:

¹² chifujilo chenyi mu kwoko lienyi chili, kumakapemesa liakulu chizungwilo chenyi, kumakakungila tiliku lienyi mu chila, alioze yizungu makayocha ni kahia kaze kukeshi kuhasa kujima.

¹³ Hohene Yesu yakatuka ku Ngalileya yeza ku Yordau kuli Yoano, akamupapachise.

¹⁴ Alioze Yoano wamukwikile, ngwenyi, Chatamba ungupapachise yena, mba uneza kuli yami, nyi?

¹⁵ Alioze Yesu wamukumbulwile ngwenyi, Chitayize haliapwila: mumu chocho chatutamba kumanununa ululi weswe. Hohene yamutayiza.

¹⁶ Muze te hamupapachisa, Yesu watutukile mu meya, ni kumanyi, malilu azulukile kuli iye, neye wamwene Spiritu ya Zambi kanahulumuka ngwe katele, nikwiza hali iye.

¹⁷ Ni liji liatuhukile mu malilu ngwo, Yono mwe Mwanami, ngunamuzange chikolo, muli iye ngunawahilila.