Mateu 28 - MUKANDA USANDU WA ZAMBI 1975

¹ Achi, kulutwe lia Sambata, shimbu kwaputukile kutemwoka ha tangwa litangu lia semana, Maria Ka-Mandala ni Maria mukwo ayile mukutala fuka.

² Kumanyi, kwapwile minyiko yinene; mumu mungelo wa Mwene wahulumukine mwilu, yaheta, yalangumuna liwe ku chikolo, yatwamaho.

³ Kusoloka chenyi chapwile ngwe mihenyo, ni mazalo jenyi atoma ngwe neve.

⁴ Mba akwa kufunga fuka achikimine ni woma, alumukine ngwe afu.

⁵ Mungelo wakumbulwile, wambile kuli mapwo ngwenyi, Kanda nwivwa woma; mumu ngunanyingika nunafupu Yesu, yoze anakamuhachila ha kulusu.

⁶ Amuno keshimo; mumu hahinduka, chizechene ngwe wambile, Tweyenu, nutale homa haze apombanga Mwene.

⁷ Yénu nikawashi, nukambulwile tumbaji twenyi ngwenu, Hahinduka mukachi ka afu; iye manutetekela ku Ngalileya; kuze munukamumona: ngwami, Hinanwambulwila.

⁸ O akatukile nikawashi ku fuka, ni woma ni uwahililo unene, azombokele mukwambulwila tumbaji twenyi.

⁹ Kumanyi, Yesu watakanyine no, nikwamba ngwenyi, Vulie! Akundamine, amukwachile ku molu, amuwayilile.

¹⁰ Hohene Yesu wambile ngwenyi, Kanda nwivwa woma: yénu, nukambulwile mandumbu jami aye ku Ngalileya, kwenako makangumona.

¹¹ Shimbu machiya, amwe a kuli tulayi ayile kwimbo, ambulwilile asasendote akwa lutwe yize yeswe alingile.

¹² Muze hakunguluka hamwe ni makulwana, hatwama punga, ahanyine mbongo jinji kuli maswalale,

¹³ ngwo, Ambenu ngwenu, Tumbaji twenyi ezanga ha ufuku, amwiyanga shimbu yetu te tuli mu tulo.

¹⁴ Nyi kachi chino muchiheta ku matwi ja nguvulu, mutumukununa, mutunulamwina ku yipikalo yeswe.

¹⁵ O atambwile mbongo, alingile chizechene ngwe nalongesele: ni liji lino linafumana hakachi ka A-Yunda ndo ku tangwa lino.

¹⁶ Alioze e tumbaji kumi ni umuwika ayile ku Ngalileya, ku mulundu uze aashikile Yesu kulu.

¹⁷ Muze amumwene, amuwayilile; alioze amwe ayambashanyine.

¹⁸ Yesu wakundamine kuli ayo, nikuhanjika kuli ayo ngwenyi, Hanangwehe yiyulo yeswe mwilu ni hashi.

¹⁹ Yénu kashika, nukatayise tumbaji a ku mavungu eswe, nikwapapachisa mu jina lia Tata, ni lia Mwana, ni lia Spiritu Musandu:

²⁰ nikwalongesa kufunga yuma yize yeswe nanuhele shimbi: nyingikenu, yami kunguli hamuwika ni yenu matangwa eswe ndo kumanunuka cha mwaka. Amene.