Mateu 27 - MUKANDA USANDU WA ZAMBI 1975

¹ Muze hapwile chimene, asasendote akwa lutwe ni makulwana ja atu atwamine punga Yesu, hanga amushihe.

² Amukashile, amutwalile, akamukunjike kuli nguvulu Pilatu.

³ Hohene Yundase, yoze wamukunjikile, walikonyekene, wahilwishile makumi atatu a mbongo ja prata kuli asasendote akwa lutwe ni makulwana.

⁴ Ngwenyi, Hingunavulumuna mumu hingunakunjika manyinga a kusamba. Alioze o ambile ngwo, Acho chika kuli yetu? Chitale yena mwene.

⁵ Aye wambilile mbongo ja prata mu tembele, yakatuka, yaya, yalisukika.

⁶ Mba asasendote akwa lutwe anjile mbongo ja prata, ngwo, Kuchalitele ni shimbi kujisa mu milambu ya tembele, se ndando ya manyinga.

⁷ Atwamine punga, mba alanjile najo munda wa tengi, hanga ukapwe chifuka cha kufunda yilambala.

⁸ Kashika avulukile munda uze ngwo, Munda wa manyinga, ndo ku tangwa lino.

⁹ Hohene chamanunukine chize achihanjikile ku kanwa lia profeta Jeremia ngwenyi, Anjile makumi atatu a mbongo ja prata, ndando ya yoze amusele ndando, yoze ana a Izalele amusele ndando;

¹⁰ ajihanyine ha munda wa tengi, nikulita ngwe Mwene wangushikile.

¹¹ Alioze Yesu wamanyine kumeso ja nguvulu: nguvulu wamuhulile ngwenyi, Yena uli mwanangana wa A-Yunda, nyi? Yesu wambile kuli iye ngwenyi, Yena wachamba.

¹² Muze amusumine asasendote akwa lutwe ni makulwana, kakumbulwile nichimwe.

¹³ Hohene Pilatu ngwenyi, Kushi kwivwa yuma yipwa haha kanashindakenya hali yena, nyi?

¹⁴ Kamukumbulwile chipwe liji limuwika, chocho nguvulu wakomokene chikolo.

¹⁵ Achi, ha chiwanyino nguvulu wapwile ni ndako ya kutusula funge umuwika ku mbunga, mweswawo azangile.

¹⁶ Apwile ni funge wa lufuma mupi, jina lienyi, Mbarapa.

¹⁷ Kashika muze akungulukile, Pilatu ngwenyi, Iya nunazange ngunutuswileye, shina Mbarapa nyi shina Yesu yoze jina lienyi ngwo, Kristu?

¹⁸ Mumu wanyingikine ngwenyi, Hamukunjika mumu ha lufwachinda.

¹⁹ Alioze shimbu machitwama ha chitwamo cha upatwilo, mukwo-pwo watumine kuli iye, ngwenyi, Kanda ulinga nichimwe kuli yoze mukwa ululi; mumu namona lamba linji tangwa lino mu chilota mumu hali iye.

²⁰ Achi, asasendote akwa lutwe ni makulwana akunwine mbunga hanga ete Mbarapa, akonwone Yesu.

²¹ Alioze nguvulu wakumbulwile ngwenyi, Iya wa kuli wano aali nunazange, ngutusule kuli yenu? O ngwo, Mbarapa.

²² Pilatu yamba kuli ayo ngwenyi, Kuchi kevwe mungulinga ni Yesu yoze jina lienyi ngwo, Kristu? O eswe yamba ngwo, Amuhachile ha kulusu.

²³ Nguvulu wambile ngwenyi, Kuchi te? Chipi chika hanalingi? Alioze akololokele kuhiana ngwo, Amuhachilejia kulusu.

²⁴ Achi, muze Pilatu amwene ngwe kalingile nichimwe, alioze te mukupwa zungo, wanjile meya, wasanyine ku moko jenyi kumeso ja mbunga, ngwenyi, Ngunasambe ku manyinga ja yono mukwa ululi, chitalenu yenwene.

²⁵ Atu eswe akumbulwile, ngwo, Manyinga jenyi akapwe hali yetu ni hali ana jetu.

²⁶ Hohene watuswile kuli ayo Mbarapa; alioze walambile Yesu ni shikote, mba wamukunjikile hanga amuhachile ha kulusu.

²⁷ Hohene maswalale ja nguvulu atwalile Yesu ku palasiu, akungulwile kuli iye chihuji cheswe cha maswalale.

²⁸ Amuzulile mahina jenyi, amujikile chikuto cha ngengu.

²⁹ Ayinjile chipangula cha mbimbo, achisele ha mutwe wenyi, ni lumbungu mu kwoko lienyi lia chindume; no aliondelele kumeso jenyi, amukekwine ngwo, Vulie! Mwanangana wa A-Yunda!

³⁰ Muze hamufwila mate, akwachile lumbungu amulambilelambile ha mutwe.

³¹ Muze te hamukekuna, amuzulile chikuto, amujikile mahina jenyi, amutwalile mukumuhachila ha kulusu.

³² Shimbu machituhuka, awanyine mutu wa ku Serene, jina lienyi Semone: amukambile, aye hamwe no hanga ambate kulusu yenyi.

³³ Muze ahetele kuma, jina liako, Ngolongota, Unalumbunuka ngwo, Chihela cha kola,

³⁴ ha kunwa amuhele vinyu chinge ni kasashisa: alioze muze te hayipanjika, kanwine.

³⁵ Muze te hamuhachila ha kulusu, alianyinyine mazalo jenyi hakachi ko, nikuta chela;

³⁶ atwamine, amulayileko.

³⁷ Asele helu lia mutwe wenyi chize amusumine nacho, cha kusoneka ngwo, Yono Yesu, Mwe Mwanangana wa A-yunda.

³⁸ Hohene ahachilile ha makulusu hamwe nenyi mihuza aali, umwe ku chindume, ni mukwo ku chimeso.

³⁹ Waze apalikile, amushililikile, nikuhunga mitwe yo, ngwo,

⁴⁰ Yena, Wakwonwona tembele ukayitunge ha matangwa atatu, Ulamwine yena mwene: kachi uli mwe Mwana Zambi, sunuka ha kulusu.

⁴¹ Chizechene asasendote akwa lutwe nawa, nikumukekuna hamwe ni akwa kusonyeka ni makulwana, ambile ngwo,

⁴² Walamwinyine akwo, mwene kahashile kulilamwina. Iye mwe Mwanangana wa Izalele; asunuke haliapwila ku kulusu, mba mutumufuliela.

⁴³ Wakolelele hali Zambi; amupulule haliapwila kachi anamuzange: mumu wambile ngwenyi, Yami nguli mwe Mwana Zambi.

⁴⁴ Ni mihuza waze aahachilile ha makuiusu hamwe nenyi, amuchokele ni maliji amuwika.

⁴⁵ Achi, chize ku ola yamuchisambano kwapwile milima hashi heswe ndo ku ola yamuchilivwa.

⁴⁶ Alioze ngwe ha ola yamuchilivwa Yesu wakololokele ni liji linene ngwenyi, Eli, Eli, lama sambatani? Acho chinalumbunuka ngwo, Zambi yami, Zambi yami, kuchi te wangwehuka?

⁴⁷ Mba amwe a kuli waze amanyineho, muze achivwile, ambile ngwo, Yono kanatambika Eliya.

⁴⁸ Haze hene umwe wa kuli ayo wazombokele, yanda shiponja, yayizalisa ni vinagre, yayisa ha lumbungu, yamunwisa.

⁴⁹ Alioze akwo ambile ngwo, Mwechenu; tutale kachi Eliya meza mukumulamwina.

⁵⁰ Yesu wakololokele cheka nawa ni liji linene, mba wechele spiritu yenyi.

⁵¹ Kumanyi, chikalakala cha hina cha tembele chapulikile mukachi kwilu ndo hashi; ni hashi hanyikine; ni mawe apulikile;

⁵² ni mafuka apakukile; ni mijimba yinji ya asandu waze ayile tulo kulu yahindukile;

⁵³ nikutuhuka mu mafuka kulutwe lia uhindukilo wenyi, anjilile mwimbo lisandu, asotokele kuli anji.

⁵⁴ Achi, kapitau ni waze apwile hamwe nenyi, nikufunga Yesu, muze amwene minyiko ni yuma alingile, evwile woma kuhiana, ngwo, Chamwememwene yono mwe Mwana Zambi.

⁵⁵ Kwapwile kuze mapwo anji, kanamutalila kusuku, waze te akawile Yesu katu ku Ngalileya, nikumuvumbika.

⁵⁶ Hakachi ko apwile Maria Ka-Mandala, ni Maria naye ya Tiangu, ni José, ni naye ya ana a Zembendeu.

⁵⁷ Achi, muze hapwile chingoloshi, umwe pichi wa ku Arimatea wejile, jina lienyi José, iye nawa wapwile kambaji ka Yesu.

⁵⁸ Yono wayile kuli Pilatu, wechile mujimba wa Yesu. Hohene Pilatu wambile aweche.

⁵⁹ José watambwile mujimba, wauvungile mu hina lipema lia linyu.

⁶⁰ Wausele mu fuka lienyi liaha, lize atotele mu liwe: neye walangumwine liwe linene ku chikolo cha fuka, mba wakatukile.

⁶¹ Alioze Maria Ka-Mandala wapwileko, ni Maria mukwo, kanatwama hatalanganyi ni fuka.

⁶² Achi, ha tangwa likwo, lize lili kulutwe lia Kululika, asasendote akwa lutwe ni A-Fwariseu alikungulwile kuli Pilatu,

⁶³ ngwo, Mwene, tunewuluka yono mukwa kwonga wambile shimbu achili ni mwono ngwenyi, Kulutwe lia matangwa atatu munguhinduka.

⁶⁴ Ambenu kashika akoleke fuka ndo ku tangwa liamuchitatu, kuchina hanji tumbaji twenyi meza ha ufuku akamwiye, akambe kuli atu ngwo, Hahinduka mukachi ka afu; mba kulumbuka cha kusula muchihiana kulumbuka chitangu.

⁶⁵ Pilatu wambile kuli ayo ngwenyi, Tulayi nuli no: yénu, nukalikoleke cheswe nunanyingika.

⁶⁶ O ayile, akolekele fuka, nikujika liwe ni Chijikilo, nikusa tulayi.