Mateu 26 - MUKANDA USANDU WA ZAMBI 1975

¹ Muze te Yesu hamanununa maliji ano eswe, wambile kuli tumbaji twenyi, ngwenyi,

² Nunanyingika kulutwe lia matangwa aali, Chizomboka muchipwa, mba makakunjika mwe Mwana Mutu akamuhachile ha kulusu.

³ Hohene asasendote akwa lutwe, ni makulwana ja atu, akungulukile ku yize ya sasendote mukwa lutwe, yoze ngwo, Kayafwa.

⁴ Atwamine punga hanga akakwate Yesu ni kalimbalimba, akamushihe.

⁵ Alioze ambile ngwo, Hi ha chiwanyino ko, kuchina zungo mulipwa hakachi ka atu.

⁶ Achi, muze Yesu apwile mu Mbetaniya, mu zuwo lia Semone mukwa mbumba.

⁷ Pwo wejile kuli iye ni kasaji ka yitumbo ya vumba lipema, yilemu chikolo, neye wayitehwine ha mutwe wenyi shimbu atwamine ku mesa.

⁸ Alioze muze tumbaji twenyi achimwene, evwile kupiha ngwo, Umbulungunya uno waka?

⁹ Mumu mahasa kulanjisa yitumbo yino ha ndando yinene, akayihane kuli yiswale.

¹⁰ Alioze Yesu ha kuchinyingika, wambile kuli ayo ngwenyi, Kuchi te nunapikalisa pwo? Mumu halinga chitanga chipema hali yami.

¹¹ Mumu yiswale nuli no matangwa eswe hamwe ni yenu; alioze kunushi ni yami matangwa eswe.

¹² Mumu te hatehuna yitumbo yino ha mujimba wami, hachilinga ha kungufunda.

¹³ Pundu ngwami, Kweswako makambujola sango lino lipema hashi heswe, chize nawa yono pwo halinga, kumakachambulula hali iye, hanga akamwiwuluke.

¹⁴ Hohene umwe wa kuli kumi ni aali, jina lienyi, Yundase, Ka-Keriote, wayile kuli asasendote akwa lutwe,

¹⁵ ngwenyi, Kuchi munungwaha kachi mungumukunjika kuli yenu, no apezalishile hali iye makumi atatu a mbongo ja prata.

¹⁶ Chize ku ola yize wafupile mwaka upema hanga akamukunjike kuli ayo.

¹⁷ Achi, ha tangwa litangu lia mbolo yize kuyishi futunwiso, tumbaji ejile kuli Yesu ngwo, Kulihi unazange yetu tululike hanga ukalie Chizomboka?

¹⁸ Aye ngwenyi, Yénu kwimbo kuli Sanganji, ngwenu, Longeshi kanambe ngwenyi, Mwaka wami uli hakamwihi, mungufunga Chizomboka mu zuwo lie hamwe ni tumbaji twami.

¹⁹ Tumbaji alingile ngwe Yesu waatumine, no alulikile Chizomboka.

²⁰ Muze hapwile chingoloshi, watwamine ku mesa hamwe ni kumi ni aali.

²¹ Shimbu machilia, wambile ngwenyi, Pundu ngwami, Umwe wa kuli yenu makangukunjika.

²² Evwile chinyengo chinji, aputukile kwamba kuli iye, mweswe wa kuli ayo ngwenyi, Mwene, yami nyi?

²³ Iye wakumbulwile, ngwenyi, Yoze unatate kwoko lienyi hamwe ni yami mu chenga, mwenawo mangukunjika.

²⁴ Mwe Mwana Mutu maya chamwenemwene, nikulita ngwe chinasonewa hali iye; alioze lamba kuli yoze mutu makunjika mwe Mwana Mutu! hapwa hali yoze mutu kachi kasemukineko.

²⁵ Yundase yoze wamukunjikile, wakumbulwile ngwenyi, Longeshi, yami nyi? Yamba kuli iye ngwenyi, Yena wachamba.

²⁶ Shimbu machilia, Yesu wanjile mbolo, wayiwahishile, wayipalwile; wahanyine kuli tumbaji twenyi, ngwenyi, Wenu, nulie; mbolo yino mujimba wami.

²⁷ Wanjile musenge, wasakwilile, wauhanyine kuli ayo, ngwenyi, Nuunwe eswe;

²⁸ mumu musenge uno manyinga jami a usendo waha waze anamwangana hali anji ha ukonekeno wa milonga.

²⁹ Alioze ngunambe kuli yenu ngwami, Chichi kanwa nichimwe ku yino mihuko ya vindera, chize ku haliapwila ndo ku tangwa lize muze munguyinwa chaha hamwe ni yenu mu wanangana wa Tata.

³⁰ Mba muze te hemba mwaso, atuhukile kuya ku mulundu wa Olevwe.

³¹ Hohene Yesu yamba kuli ayo ngwenyi, Yenu eswe kumunukatalinga mumu hali yami ufuku uno: mumu chinasonewa ngwo, Mungulamba kafunga, mba mapanga a ku mbunga makamwangana.

³² Alioze kulutwe lia uhindukilo wami, mungukanutetekela ku Ngalileya.

³³ Alioze Petulu wakumbulwile ngwenyi, Chipwe kachi eswe matalinga hali yena, yami chichi kutalinga nilimwe tangwa.

³⁴ Yesu ngwenyi, Pundu ngwami, Ufuku uno shimbu ndemba kanda achitambika, kumukalikala yami katatu.

³⁵ Petulu ngwenyi, Chipwe mungufwa hamwe ni yena, chichi kalikala yena nichimwe. Chizechene nawa ambile tumbaji eswe.

³⁶ Hohene Yesu yeza hamwe no kuma anavulukako ngwo, Ngetesemane, yamba kuli tumbaji twenyi ngwenyi, Twamenu hano shimbu yami munguya kuze mukutomba.

³⁷ Watwalile hamwe nenyi Petulu ni ana aali a Zembendeu, mba waputukile kwivwa chinyengo nikulema chikolo mu mbunge.

³⁸ Hohene yamba kuli ayo ngwenyi, Mbunge yami yinevu chinyengo chahiana, ndo ku kufwa: salenu kuno, nulé hamwe ni yami.

³⁹ Wasosolokele kulutwe hakepe, wafulamanyine nikulemba ngwenyi, Tata, nyi muchitá, musenge uno ukatuke kuli yami: hindu kanda chikapwa ngwe yami ngunapale, alioze ngwe yena unapale.

⁴⁰ Yeza kuli tumbaji twenyi, yaawana mu tulo, yamba kuli Petulu ngwenyi, Kuma! kunwahashile kulá hamwe ni yami ola yimuwika, nyi?

⁴¹ Lenu, lembenu, hanga kunuchi kunjila mu cheseko: spiritu chamwenemwene yatakama, alioze musunya ulelu.

⁴² Cheka nawa chisuho chamuchiali wasosolokele, walembele ngwenyi, Tata, kachi musenge uno kuushi kuhasa kukatuka kuli yami, shina munguunwa, upale we ulingiwe.

⁴³ Wejile cheka nawa, yaawana mu tulo, mumu meso jo alemene.

⁴⁴ Waahichikile cheka nawa, wayile, walembele chisuho chamuchitatu, nikwamba maliji wo ene.

⁴⁵ Hohene yeza kuli tumbaji, ngwenyi, Fungunukenu haliapwila, nuhwime; ola yinakundama, makunjika mwe Mwana Mutu ku moko ja yivulumunyi.

⁴⁶ Katukenu, tuyenu: yoze mangukunjika kanakundama.

⁴⁷ Shimbu machihanjika, Yundase, umwe wa kuli kumi ni aali, wejile, ni hamwe nenyi mbunga yinene ni tutana ni mbwechi, a kuli asasendote akwa lutwe ni makulwana ja atu.

⁴⁸ Achi, yoze wamukunjikile hanahe chilayi, ngwenyi, Mweswawo mungumumbeja, mwe iye: Mukwatenu.

⁴⁹ Haze hene wejile kuli Yesu, ngwenyi, Vulie, Longeshi! mba wamumbejele chikolo.

⁵⁰ Alioze Yesu wambile kuli iye ngwenyi, Mukwetu, linga chize unejila. Hohene ejile, amukwachile.

⁵¹ Kumanyi, umwe wa kuli waze apwile hamwe ni Yesu wolwele kwoko lienyi, watomwene katana kenyi, walambile ndungo ya sasendote mukwa lutwe, wamutetele twitwi lienyi.

⁵² Hohene Yesu yamba kuli iye ngwenyi, Tomeka katana ke mu chindalo: mumu waze eswe manda katana kumakatoka ku katana.

⁵³ Hanji unashinginyeka ngwe Chahashile haliapwila kuliumba kuli Tata, neye mangutumina ahiana kumi lia tununu ni tununu aali a mbunga ja angelo nyi?

⁵⁴ Ngwe kuchi kevwe yisoneko muyimanunuka ngwo, Chocho chatamba kupwa?

⁵⁵ Ha ola yize yene Yesu wambile ku mbunga ngwenyi, Nunatuhuka ngwe hali muhuza ni tutana ni mbwechi mukungukwata, nyi? Natwamine tangwa ha tangwa hamwe ni yenu nikulongesa mu tembele, mba kunwangukwachile.

⁵⁶ Alioze yino yuma yeswe yapwile, hanga yisoneko ya aprofeta yikamanunuke. Hohene tumbaji eswe amwehukile, achinyine.

⁵⁷ Waze akwachile Yesu amutwalile kuli sasendote mukwa lutwe Kayafwa, kuze akungulukile akwa kusonyeka ni makulwana.

⁵⁸ Petulu wamukawile kanonajila, ndo ku yize ya sasendote mukwa lutwe, neye wanjilile, Watwamine hamwe ni tupita, akamone songo.

⁵⁹ Asasendote akwa lutwe ni makulwana ni akwa kuyula eswe afupile yela a mahuza hali Yesu, hanga akamushihe.

⁶⁰ Alioze kawanyine nichimwe, chipwe yela anji a mahuza ejile, alioze kulutwe lia chize aali ejile,

⁶¹ Ambile ngwo, Iye ngwenyi, Ngunahase kwonwona tembele ya Zambi ngukayitunge mu matangwa atatu.

⁶² Sasendote mukwa lutwe wakatukile, wambile kuli iye ngwenyi, Kushi kukumbulula nichimwe? Kuchi wano anashindakenya hali yena?

⁶³ Alioze Yesu waholele. Sasendote wambile kuli iye ngwenyi, Shingo ngunakwehe mu jina lia Zambi ya mwono, Utwambulwile kachi yena uli mwe Kristu, mwe Mwana Zambi.

⁶⁴ Yesu yamba kuli iye ngwenyi, Yena wachamba; hindu ngwami, Kulutwe kumunukamona mwe Mwana Mutu kanatwama ha chindume cha tachi, kaneza ha malelwa a mwilu.

⁶⁵ Hohene sasendote mukwa lutwe wasonyene mahina jenyi, ngwenyi, Hashililika Zambi: kuchi tunafupu nawa hali yela? Talenu, haliapwila hinwevwa kushililika chenyi.

⁶⁶ Kuchi nunashinginyeka? No akumbulwile ngwo, Kanatela kufwa.

⁶⁷ Hohene yafwila mate ku meso jenyi, yamumbufula, mba amwe amulambile mbangala.

⁶⁸ Nikwamba ngwo, Tuprofeteze, yena Kristu, iya wakulamba?

⁶⁹ Alioze Petulu Watwamine haze mu yize, ni mwana-pwo mukwa milimo wejile kuli iye ngwenyi, Ni yena nawa wapwanga hamwe ni Yesu Ka-Ngalileya.

⁷⁰ Alioze walikalile kumeso ja eswe ngwenyi, Chanyingikine chize unambe.

⁷¹ Muze te hatuhuka haze mushi lia senge, mukwo wamumwene, yamba kuli waze apwileko ngwenyi, Yono nawa kapwanga hamwe ni Yesu Ka-Nazare.

⁷² Cheka nawa walikalile ni shingo ngwenyi, Chanyingikine yono mutu.

⁷³ Kulutwe hakepe waze amanyineko ejile, ambile kuli Petulu ngwo, Chamwenemwene ni yena nawa uli umwe wa kuli ayo; mumu kuhanjika che chinakusolola.

⁷⁴ Hohene waputukile kushingana ni kulishinga ngwenyi, Chanyingikine yono mutu. Haze hene ndemba watambikile.

⁷⁵ Petulu wewulukile liji lize amwambile Yesu ngwenyi, Shimbu ndemba kanda achitambika, kumukalikala yami katatu. Watuhukile, Walilile chikolo.