Mateu 25 - MUKANDA USANDU WA ZAMBI 1975

¹ Hohene makapwisa wanangana wa malilu ngwe kumi lia ana-mapwo, aze anjile ndeya jo, akatuhuke mukupatwiza sandungi.

² Atano a kuli ayo apwile yikanyame, ni atano apwile yihepuke.

³ Mumu yihepuke, muze ambachile ndeya jo, kambachile maji hamwe no:

⁴ alioze yikanyame ambachile maji mu tusaji two hamwe ni ndeya jo.

⁵ Achi, shimbu sandungi ashimbwile, o eswe anongwokene, ayile tulo.

⁶ Alioze ha muchima ufuku hapwile liji linene ngwo, Talenu sandungi! tuhukenu numupatwize.

⁷ Hohene waze ana-mapwo eswe ahindukile, akendele ndeya jo.

⁸ Yihepuke ambile kuli yikanyame ngwo, Twehenu kama amwe a ku maji jenu; mumu ndeya jetu jinajimajima.

⁹ Alioze yikanyame akumbulwile ngwo, Hi chocho ko, kuchina hanji kechi kaheta hali yetu ni yenu: yénu Shinaho kuli waze akulanjisa, nukalilanjile yenwene.

¹⁰ Alioze shimbu ayile mukulanda, sandungi wejile; ni waze alulikile anjilile hamwe nenyi ku ulungi; mba ajilile pito.

¹¹ Kulutwe, ana-mapwo akwo yeza nawa, ngwo, Mwene, Mwene, twazulwile kama.

¹² Alioze iye wakumbulwile ngwenyi, Pundu ngunambe kuli yenu ngwami, Chanunyingikine.

¹³ Lenu kashika, mumu kunwanyingikine tangwa, chipwe ola.

¹⁴ Mumu chinapu ngwe mutu, ha kukatuka kuya mu ungeji ku chifuchi chikwo, watambikile ndungo jenyi waakunjikile yikumba yenyi.

¹⁵ Kuli umwe wahanyine mbongo jitano, ni kuli mukwo jiali, ni kuli mukwo umuwika: kuli mweswe nikulita ni kuhasa chenyi, mutu ni mutu; neye wakatukile, wayile mu ungeji wenyi.

¹⁶ Haze hene yoze watambwile mbongo jitano wayile nikusepa najo, mba wafumbwile mbongo jikwo jitano.

¹⁷ Chizechene nawa yoze watambwile jiali, wafumbwile mbongo jikwo jiali.

¹⁸ Alioze yoze watambwile lumbongo umuwika wayile akafule hashi, mba waswekele lumbongo wa mwene wenyi.

¹⁹ Kulutwe lia shimbu linene mwenya ndungo waze, yeza yalulika no.

²⁰ Yoze watambwile mbongo jitano, wejile nikuneha mbongo jikwo jitano, ngwenyi, Mwene, yena wangukunjikile mbongo jitano: talenu, hingunatambula mbongo jikwo jitano.

²¹ Mwene wenyi ngwenyi, Hiunalingi kanawa, ndungo mupema, wamwenemwene, hiunashishika ha yuma yikehe, mungukakusela helu lia yuma yinji; njila mu uwahililo wa mwene we.

²² Yoze nawa watambwile mbongo jiali, wejile ngwenyi, Mwene, yena wangukunjikile mbongo jiali; talenu, hingunatambula mbongo jikwo jiali.

²³ Mwene wenyi ngwenyi, Hiunalingi kanawa, ndungo mupema, wamwenemwene, hiunashishika ha yuma yikehe, mungukakusela helu lia yuma yinji; njila mu uwahililo wa mwene we.

²⁴ Yoze nawa watambwile lumbongo umuwika, wejile ngwenyi, Mwene, ngunanyingika uli mutu mukalu, wakucha kuze kwakuwileko, wakukunga kuze kwamwangineko.

²⁵ Nevwile woma, mba nayile, naswekele lumbongo we hashi: tala, hiwazuka niwe.

²⁶ Alioze mwene wenyi wakumbulwile ngwenyi, Yena ndungo chingulungulu, chileya, wanyingikine ngwe nakucha kuze chakuwileko, nakukunga kuze chasandwileko.

²⁷ Shinaho kashika kachi wahanyine lumbongo wami kuli akwa kusumbakenya mbongo, mba ha kwiza chami kachi natambula yoze niwami hamuwika ni mbwezo.

²⁸ Chizenu kashika lumbongo kuli iye, numuhane kuli yoze uli ni kumi lia mbongo.

²⁹ Mumu mweswe ukwete kumakamwaha, neye kumakapwa nayo ya kulumbama: alioze yoze keshi nacho, chipwe chize ali nacho kumakamuchizacho.

³⁰ Alioze mbilenu yono ndungo wamokomoko mu milima ya haze: kumukukapwa malilo ni kulikopola ku mazo.

³¹ Alioze muze mwe Mwana Mutu meza mu uhenya wenyi, ni angelo asandu eswe hamwe nenyi, hohene makatwama ha ngunja yenyi ya uhenya:

³² mavungu eswe makakunguluka kumeso jenyi: iye makaahandununa umwe kuli mukwo, chizechene ngwe kafunga mahandununa mapanga kuli pembe.

³³ Masa mapanga ku chindume, alioze pembe masa ku chimeso.

³⁴ Hohene Mwanangana makamba kuli waze ali ku chindume ngwenyi, Tweyenu, kunwawaha kuli Tata, nutunge wanangana anululikililewo chize ku kusela cha fundamentu ya hashi:

³⁵ mumu nevwile zala, mba nwanguhele kulia; nevwile pwila, mba nwanguhele meya; napwile chilambala, mba nwanguzumbwile;

³⁶ napwile ni uvu, mba nwangujikile; nayijile, mba nwangunangishine; napwile mu zuwo lia ususu, mba nwejile kuli yami.

³⁷ Hohene akwa ululi makamukumbulula ngwo, Mwene, mwiji muka twakumwene ni zala, twakuhele kulia? Hanji ni pwila, twakuhele meya?

³⁸ Mwiji muka twakumwene chilambala, twakuzumbwile? Hanji ni uvu, twakujikile?

³⁹ Mwiji muka twakumwene ni kuyiza, hanji mu zuwo lia ususu, twejile kuli yena?

⁴⁰ Mwanangana makaakumbulula ngwenyi, Pundu ngwami, Mumu te nwachilingile kuli umwe wa kuli akepe ahiana eswe a kuli wano mandumbu jami, nwachilingile kuli yami.

⁴¹ Hohene makamba nawa kuli waze ali ku chimeso ngwenyi, Katukenu kuli yami, yenu kunwashingiwa, nuye ku kahia ka mutolo kaze alulikile hali Ndiapu ni angelo jenyi.

⁴² Mumu nevwile zala, kunwanguhele kulia; nevwile pwila, kunwanguhele meya;

⁴³ napwile chilambala, kunwanguzumbwile; napwile ni uvu, kunwangujikile; nayijile, napwile mu zuwo lia ususu, kunwangunangishine.

⁴⁴ Hohene o nawa makakumbulula ngwo, Mwene, mwiji muka twakumwene ni zala, hanji ni pwila, hanji chilambala, hanji ni uvu, hanji ni kuyiza, hanji mu zuwo lia ususu, kutwakuvumbikile?

⁴⁵ Hohene makaakumbulula ngwenyi, Pundu ngwami, Mumu te kunwachilingile kuli umwe wa kuli wano akepe ahiana eswe, kunwachilingile kuli yami.

⁴⁶ Wano kumakaya ku lamba lia mutolo, alioze akwa ululi ku mwono wa mutolo.