Mateu 24 - MUKANDA USANDU WA ZAMBI 1975

¹ Yesu watuhukile mu tembele, wayile mu jila yenyi, ni tumbaji twenyi ejile kuli iye mukumwinyikina mazuwo ja tembele.

² Alioze waakumbulwile, ngwenyi, Kunwamwene yuma yino yeswe, nyi? Pundu ngunambe kuli yenu ngwami, Kechi kahichika kuno liwe nilimwe ha liwe, lize kechi kalipuzula.

³ Shimbu machitwama ha mulundu wa Olevwe, tumbaji twenyi ejile kuli iye ukawo, nikwamba ngwo, Twambulwile kama, mwiji muka yuma yino muyikapwa? Chilayi cha kuheta che chika, ni cha kumanunuka cha mwaka?

⁴ Yesu waakumbulwile ngwenyi, Kanyamenu, niumwe kanda akanupiangula.

⁵ Mumu anji kumakeza mu jina liami ngwo, Yami nguli mwe Kristu; mba makapiangula anji.

⁶ Alioze kumunukevwa ha jita ni ndundumwino ya jita; kanda nukasungalala; mumu chatamba yino yuma yeswe kupwa alioze songo kanda lichipwa.

⁷ Mumu akwa vungu limwe makatukila akwa vungu likwo, ni akwa wanangana umwe kumukatukila akwa wanangana ukwo; kumukukapwa tupunga ni yilungo ni minyiko kweka ni kweka.

⁸ Alioze yino yuma yeswe we uputukilo wa yikola.

⁹ Hohene makanukunjika ku luyinda, no kumakanushiha, kumakanuvwila kole ku mavungu eswe mumu ha jina liami.

¹⁰ Hohene anji makatalinga, makalikunjika umwe kuli mukwo, makalivwila kole umwe ni mukwo.

¹¹ Ni aprofeta anji a kwonga kumakasoloka, mamupiangula anji.

¹² Mba se uhulia muwoka, zango lia anji kumuliza kukekema.

¹³ Alioze mweswe manyongonona ndo ku songo, kumakamulamwina.

¹⁴ Ni sango lino lipema lia wanangana kumakaliambujola mu yifuchi yeswe ya hashi mukupwa Shindakenyo ku mavungu eswe, ni hohene songo kumulikeza.

¹⁵ Kashika muze munumona chizelwokeso cha kwenyeka chize achihanjikile ku kanwa lia profeta Daniel, kanamana muma musandu (yoze matanga akase chinyingi).

¹⁶ Hohene waze mapwa mu Yundeya, akachinyine ku milundu:

¹⁷ yoze mapwa helu lia zuwo, kanda akasunuka mukuchiza yuma yize yili mu zuwo lienyi:

¹⁸ yoze mapwa ku munda, kanda akahiluka mukwanda mahina jenyi.

¹⁹ Alioze lamba kuli waze mapwa ni ufumba, ni waze mamwisa ana ha matangwa aze!

²⁰ Alioze lembenu, kuchina chenu kanda chikapwa ha mwaka wá chishika chipwe ha Sambata:

²¹ mumu hohene kumukukapwa luyinda munene, ngwe kanda hamoneka hano hashi chize ku uputukilo wa hashi ndo haliapwila, chipwe kechi kapwa nawa.

²² Nyi kachi matangwa aze kaatepulwileko, kachi mutu niumwe malilamwina; alioze mumu hali waze hanaatongola, matangwa aze kumakatepuluka.

²³ Hohene kachi umwe mamba kuli yenu ngwenyi, Talenu, Kristu kuno kwali! hanji ngwo, Kuze! kanda nukachifuliela.

²⁴ Mumu akristu a kwonga ni aprofeta a kwonga kumakasoloka, no makasolola yilayi yinene ni yikomokeso; hanga nyi machihasa, akapiangule chipwe waze hanaatongola.

²⁵ Ivwenu, hinanwambulwila Shimbu-kanda.

²⁶ Kashika kachi mamba kuli yenu ngwo, Talenu, mu puya ali! kanda nuyako: ngwo, Talenu, mu yipatulo ya muchima ali! kanda nuchifuliela.

²⁷ Mumu ngwe mihenyo muyituhuka ku Chivumbuko, muyihenya ku Chitokelo; chocho muchikapwa kuheta cha mwe Mwana Mutu.

²⁸ Kweswako mujimba wa mufu uli, kuze kwene makakunguluka pupa.

²⁹ Alioze haze hene kulutwe lia luyinda wa matangwa aze, tangwa mulikalá, ni kakweji kechi katwa mieji, ni matongonoshi kumakaholoka mwilu, ni tachi ja malilu kumujikanyika.

³⁰ Hohene chilayi cha mwe Mwana Mutu kumuchikasoloka mwilu: ni hohene mavungu eswe a hashi kumakahia mbimbi, kumakamona mwe Mwana Mutu kaneza ha malelwa a mwilu ni tachi ni uhenya unene.

³¹ Kumakatuma angelo jenyi ni liji linene lia chitavwi, no makakungulula waze hanaatongola kuli iye ku fuji jiwana, ku songo limwe lia malilu ndo ku songo likwo.

³² Achi, lilongesenu chishima ku mukuyu: muze mutango wawo muovula, muusokoloka mafwo, mununyingika ngwenu, Lwiza hapwa hakamwihi;

³³ chochene nawa yenu, muze munumona yino yuma yeswe, nyingikenu ngwenu, iye hakamwihi ali, te ku mapito.

³⁴ Pundu ngwami, Chisemuko chino kuchichi kahwa ndo yino yuma yeswe muyikamanunuka.

³⁵ Lilu ni hashi kumuyikahwa, alioze maliji jami kechi kahwa nichimwe.

³⁶ Alioze ha kutwala ku tangwa lize ni ola yize niumwe kayinyingikine, chipwe angelo a mwilu, ka, alioze Tata wika.

³⁷ Alioze chizechene ngwe matangwa ja Noe, chocho muchikapwa kuheta cha mwe Mwana Mutu.

³⁸ Mumu chizechene ngwe ha matangwa kuze kanda, shimbu te sanga lia meya kanda liza, apwile nikulialia, nikunwanwa, nikumbata, nikuhangisa malo, ndo tangwa lize Noe wanjilile mu ulungu.

³⁹ Kanyingikine ndo sanga lia meya liejile likaahungumune eswe; chocho nawa muchikapwa kuheta cha mwe Mwana Mutu.

⁴⁰ Hohene atu aali makapwa ku munda; machiza umwe, mahichika mukwo.

⁴¹ Mapwo aali makapwa nikutwa hamuwika ku utwilo; machiza umwe, mahichika mukwo.

⁴² Lenu kashika mumu kunwanyingikine ha ola yize Mwene wenu meza.

⁴³ Alioze nyingikenu chino, kachi mwenya zuwo wanyingikine ha ola yize mwiji meza kachi walayile, kachi kamutayijile kulokola zuwo lienyi.

⁴⁴ Kashika ni yenu nawa lilulikenu; mumu ha ola yize kunushi kushinginyeka mwe Mwana Mutu meza.

⁴⁵ Iya kevwe ndungo wamwenemwene, wa kukanyama, yoze mwene wenyi hamwaha chiyulo cha akwa zuwo lienyi, mukuhana kuli ayo kulia ha mwaka wacho?

⁴⁶ Kawaha ndungo yoze mwene wenyi muze meza mamuwana kanalingi chocho.

⁴⁷ Pundu ngwami, Kumakamwaha chiyulo ha yikumba yenyi yeswe.

⁴⁸ Alioze kachi yoze ndungo mupi mamba mu mbunge ngwenyi, Mwene wami kanashimbula;

⁴⁹ mba maputuka kulamba ndungo-ni-akwo, malialia, manwanwa hamwe ni akwa kuzengewa.

⁵⁰ Mwene wa ndungo yoze kumakeza ha tangwa lize keshi kunyonga, ni ha ola yize kanyingikineko.

⁵¹ Mba kumakamupatula hakachi, makamusela chihanda hamwe ni yilembese: kumukukapwa malilo ni kulikopola ku mazo.