Mateu 23 - MUKANDA USANDU WA ZAMBI 1975

¹ Hohene Yesu wahanjikile ku mbunga ni kuli tumbaji twenyi,

² ngwenyi, Akwa kusonyeka ni A-Fwariseu hanatambula chitwamo cha Mose:

³ yuma yeswe kashika manwamba, lingenu, fungenu: alioze kanda nukalinga nikulita ni yitanga yo; mumu kakwamba, alioze keshi kulinga.

⁴ Ewa, kakukasa yiteli yilemu ni yikalu kumbata, kakuyitwika ha yipaya ya atu; alioze ayo ene kasolo kuyitutulula chipwe ni munwe umuwika.

⁵ Yitanga yo yeswe kakuyilinga akamoneke kuli atu: mumu kakutohesa yipenya yo, kakutohesa mapula jo.

⁶ Kakufwila mihela yilemu ku yiteleka, ni yitwamo ya lutwe mu masunangonga,

⁷ ni kwameneka ku yitanda, ni kwavulwoka kuli atu ngwo, Longeshi.

⁸ Alioze yenu kanda akanuvuluka ngwo, Longeshi; mumu umuwika Longeshi yenu, ni yenu eswe nuli mandumbu.

⁹ Hano hashi kanda nukavuluka niumwe ngwenu, Tata: mumu umuwika Tatenu, te yoze uli mwilu.

¹⁰ Chipwe kanda akanuvuluka ngwo, Miata: mumu umuwika Mwata wenu, mwe Kristu.

¹¹ Alioze yoze munene Wahiana eswe hakachikenu, akapwe kavumbi kenu.

¹² Mweswawo malinangamisa, kumakamulelesa; ni mweswawo malilelesa, kumakamunangamisa.

¹³ Lamba lienu, akwa kusonyeka ni A-Fwariseu, yilembese! mumu nwakuyika wanangana wa malilu kuli atu: mumu kunushi kunjilamo yenwene, ni waze mazanga kunjila kunushi kwatayiza.

¹⁴ Lamba lienu, akwa kusonyeka ni A-Fwariseu, yilembese! mumu nwakuwumbula mazuwo ja twamishi ja mapwo, shimbu te, ha ulembekese, nwakulemba yipinji yisuku. Kashika kumunukatambula upatwilo Wahiana.

¹⁵ Lamba lienu, akwa kusonyeka ni A-Fwariseu, yilembese! mumu nwakujinga kalungalwiji ni hashi homu mukutayisa kambaji umuwika; ni muze hatá, nwakumupwisa mukwa Heteze yisuho yiali kuhiana yenwene.

¹⁶ Lamba lienu, tusongo a kupuputa, yenu nwakwamba ngwenu, Mweswawo malishinga ni tembele, chamokomoko; alioze mweswawo malishinga ni oru ya tembele, iye kalikasa.

¹⁷ Yihepuke ni tupuputa! mumu yinene yahiana yika, shina oru nyi, shina tembele yize ya kusela ku usandu ye oru?

¹⁸ Mweswawo malishinga ni chilumbilo, chamokomoko; alioze mweswawo malishinga ni mulambu uze uliho, iye kalikasa.

¹⁹ Yihepuke ni tupuputa! mumu chinene chahiana chika shina chawana nyi shina chilumbilo chize cha kusela ku usandu che chawana?

²⁰ Yoze kashika malishinga ni chilumbilo, malishinga nacho, ni yuma yeswe yiliho.

²¹ Yoze malishinga ni tembele, malishinga nalio, ni yoze watwamamo.

²² Yoze malishinga ni lilu, malishinga ni ngunja ya Zambi, ni yoze watwamaho.

²³ Lamba lienu, akwa kusonyeka ni A-Fwariseu, yilembese! mumu nwakufweta chihanda cha kumi cha ku chimbumba ni endru ni kominyu, alioze hinunalelesa yuma yilemu yahiana ya shimbi, upatwilo wa kulita, ni keke, ni Ufulielo: alioze yino Chanutamba kulinga, alioze kanda nulelesa yikwo.

²⁴ Tusongo a kupuputa nwakusála kangunu, nwakumina kamelu!

²⁵ Lamba lienu, akwa kusonyeka ni A-Fwariseu, yilembese! mumu nwakupemesa haze lia musenge ni panda, alioze muchima munazala ni mbenga ni kuhungumuka ni usolo.

²⁶ Yena Ka-Fwariseu wa kupuputa, pemesa hatangu muchima lia musenge ni lia panda, hanga haze liayo nawa hakapeme.

²⁷ Lamba lienu, akwa kusonyeka ni A-Fwariseu, yilembese! mumu kununapu ngwe mafuka a kutomesa ni pemba waze akusoloka ngwe apema haze, alioze muchima munazala ni yifwaha ya afu, ni luchisa mweswe.

²⁸ Chochene ni yenu nawa haze nunasoloka ngwe akwa ululi kuli atu, alioze muchima nunazala tò ni ulembekese ni uhulia.

²⁹ Lamba lienu, akwa kusonyeka ni A-Fwariseu, yilembese! mumu nwakutunga mafuka ja aprofeta, nwakupemesa mafuka ja akwa ululi.

³⁰ Nwakwamba ngwenu, Kachi yetu twapwile ha matangwa ja akaka kachi kutwalifutwile no ha manyinga ja aprofeta.

³¹ Kashika nwakulishindakenya hali yenwene nuli ana a waze ashihile aprofeta.

³² Ni yenu nwakuzalisa njongo ya akakenu.

³³ Yenu tupela! vungu lia yihili! ngwe kuchi munwomboka ku upatwilo wa Ngehena.

³⁴ Kashika mungutuma kuli yenu aprofeta ni akwa mana, ni akwa kusonyeka: amwe a kuli ayo munukaashiha nikwahachila ha kulusu; ni akwo a kuli ayo munukaalamba ni shikote mu masunangonga jenu, nikwahungumiona katu ku limbo ndo ku limbo,

³⁵ hanga manyinga eswe a ululi a kumwangana hano hashi akeze hali yenu, chize ku manyinga ja mukwa ululi Abele ndo ku manyinga ja Zakaria, mwana Mbarakiya, yoze nwamushihile hakachi ka tembele ni chilumbilo.

³⁶ Pundu ngunambe kuli yenu ngwami, Yino yuma yeswe kumuyikeza ha chisemuko chino.

³⁷ A Yerusaleme! A Yerusaleme! Yena, wakushiha aprofeta, wakwasa mawe waze aatumine kuli yena! Yisuho yipwa haha hingunazange kukungulula ana je ngwe chali makunga ana jenyi mushi lia mapulwa jenyi, ni yenu kunwatayileko!

³⁸ Ivwenu, zuwo lienu hanalihichika kuli yenu Hahululu.

³⁹ Mumu ngunambe kuli yenu ngwami, Kunuchi kangumona nichimwe chize ku haliapwila ndo munukamba ngwenu, Kawaha yoze meza mu jina lia Mwene.