Mateu 22 - MUKANDA USANDU WA ZAMBI 1975

¹ Yesu wakumbulwile ni yishima, ngwenyi,

² Hanapwisa wanangana wa malilu ngwe mwanangana yoze walulikile ulungi hali mwanenyi,

³ mba watumine ndungo jenyi mukutambika waze aalakenyene ku ulungi: no katayile kwiza.

⁴ Cheka nawa watumine ndungo akwo, ngwenyi, Nukambe kuli waze aalakenyene ngwenu, Hinalulika kulia chami; ngombe jami ni yimuna jami a kutoha haashiha, ni yuma yeswe yinalulika: tweyenu ku ulungi.

⁵ Alioze achilelesele, ayile mu majila jo, umwe ku munda wenyi, ni mukwo ku chitanda chenyi;

⁶ Akwo akwachile ndungo, nikwalinga chipi, nikwashiha.

⁷ Muze mwanangana achivwile, watenukine, watumine mbunga ya maswalale jenyi, wonwene yingalwe aze, mba wochele limbo lio.

⁸ Hohene yamba kuli ndungo jenyi ngwenyi, Ulungi kuunalulika, alioze waze aalakenyene kateleleko.

⁹ Yénu kashika ku makano ja majila, ni waze munuwana, nukaalakenye eze ku ulungi.

¹⁰ Ni waze ndungo atuhukile ku majila, akungulwile waze eswe awanyine, ni yingulungulu ni apema, ni zuwo lia ulungi liazalile tò ni ngeji.

¹¹ Alioze muze mwanangana anjilile mukutala ngeji, wamwenemo mutu kazalile uzalo wa ulungi:

¹² Yamba kuli iye ngwenyi, Mukwetu, ngwe kuchi wanjilanga muno kushi uzalo wa ulungi? Alioze waholele.

¹³ Hohene mwanangana wambile kuli tuvumbi ngwenyi, Mukasenu molu ni moko, numumbile mu milima ya haze; kumukukapwa malilo ni kulikopola ku mazo.

¹⁴ Mumu matambika anji, alioze matongola akehe.

¹⁵ Hohene A-Fwariseu ayile, atwame punga ngwe chize mahasa kumutela ha kuhanjika chenyi.

¹⁶ Atumine kuli iye tumbaji two, hamwe ni A-Heronde, ngwo, Longeshi, tunanyingika yena uli wamwenemwene, wakulongesa jila ya Zambi nikulita ni umwenemwene, kushi kuvwila woma niumwe: mumu kushi katonde kuli atu.

¹⁷ Twambulwilenu kashika chize yena unashinginyeka ngwetu, Muchilita ni shimbi shina kuhana lijimu kuli Sesare nyi, shina ka?

¹⁸ Alioze Yesu wanyingikine ungulungulu wo, kashika wambile ngwenyi, Kuchi te nunangweseka, yenu yilembese?

¹⁹ Ngulwezenu lumbongo wa lijimu. Anehene lumbongo kuli iye.

²⁰ Yamba kuli ayo ngwenyi, Chizulie chino ni chisoneko chino chaya?

²¹ Ngwo, Cha Sesare. Hohene yamba kuli ayo ngwenyi, Hanenu kevwe kuli Sesare yuma ya Sesare; ni kuli Zambi yuma ya Zambi.

²² Muze amuvwile, akomokene, akatukile.

²³ Ha tangwa lize, A-Satuseu ejile kuli iye, waze akwamba ngwo, Uhindukilo wa afu wakuhi niumwe: no amuhulile ngwo,

²⁴ Longeshi, Mose wambile ngwenyi, Kachi umwe mafwa keshi ana, kachi mwanakwo akambate mukwo-pwo, akasangule ana kuli yayo.

²⁵ Achi, kwapwile ni yetu, asongo-ni-atu shimbiali; ni mutangu wambachile pwo, wafwile, mba se kapwile ni mwana, wahichikile mukwo-pwo kuli mwanakwo.

²⁶ Chizechene wamuchiali ni wamuchitatu ndo kuli wamuchishimbiali.

²⁷ Mba kulutwe lia ayo eswe, pwo nawa wafwile.

²⁸ Ha uhindukilo wa afu, kashika hakachi ka shimbiali, pwo liaya makapwa? Mumu o eswe apwile nenyi?

²⁹ Yesu wakumbulwile, ngwenyi, Nunapianguka, se kunushi kunyingika yisoneko, chipwe tachi ja Zambi,

³⁰ mumu ha uhindukilo wa afu keshi kumbata, chipwe keshi kuhangisa malo, alioze kanapu ngwe angelo ja Zambi mwilu.

³¹ Alioze ha kutwala ku uhindukilo wa afu, kunwatangile chize Zambi ahanjikile kuli yenu, nyi?

³² Yami nguli Zambi ya Apalahama, ni Zambi ya Izake, ni Zambi ya Yakomba? Zambi hi Zambi ya afu ko, alioze ya a mwono.

³³ Muze mbunga achivwile, alishimwokene ha longeso lienyi.

³⁴ Alioze A-Fwariseu muze evwile ngwo, Haholesa A-Satuseu, alikungulwile hamuwika.

³⁵ Mba umwe wa kuli ayo, mukwa shimbi, wamuhulile, akamweseke ngwenyi,

³⁶ Longeshi, liji linene lia shimbi mu mukanda wa shimbi lika?

³⁷ Yesu wambile kuli iye ngwenyi, Ngwo, Ukazange Mwene Zambi-ye ni mbunge ye yeswe, ni mwono we weswe, ni kunyonga che cheswe.

³⁸ Lino lie liji litangu ni linene lia shimbi.

³⁹ Ni liamuchiali Yinalifu nalio, lino ngwo. Ukazange mwenyembo we ngwe wakulizanga yena mwene.

⁴⁰ Ha maliji ano aali a shimbi, shimbi yeswe lukombo ni mikanda ya aprofeta yinakolo.

⁴¹ Achi, shimbu A-Fwariseu akungulukile, Yesu waahulile,

⁴² ngwenyi, Kuchi nunashinginyeka hali Kristu? Mwana waya? O ngwo, Mwana David.

⁴³ Iye ngwenyi, Ngwe kuchi kevwe David muli Spiritu anamuvuluka ngwenyi, Mwene, nikwamba ngwenyi,

⁴⁴ Mwene wambile kuli Mwene wami, Ngwenyi, Twama ku kwoko liami lia chindume, Ndo mungusa akwa kole je kushi lia yiliato ye.

⁴⁵ Kachi kashika David kanamuvuluka ngwenyi, Mwene, ngwe kuchi kevwe mapwa mwanenyi?

⁴⁶ Mba niumwe wahashile kumukumbulula liji nilimwe, chipwe chize ku tangwa lize kahunukine niumwe kumuhula nawa nichimwe.