Mateu 21 - MUKANDA USANDU WA ZAMBI 1975

¹ Mba muze akundamine ku Yerusaleme, haheta ku Mbetefweje, ku mulundu wa Olevwe, hohene Yesu watumine tumbaji aali,

² ngwenyi, Yénu, nukanjile mu chihunda chize cha kulitalangana ni yenu, haze hene kumunukawana chimbulu wa kukasa hamwe ni mwanenyi: nukaajitule, nukaanehe kuli yami.

³ Nyi kachi umwe mamba chuma chimwe kuli yenu, nukambe ngwenu, Mwene kanaafupu, mba kamunomuno maatuma.

⁴ Alioze chino cheswe chapwile, hanga chikamanunuke chize ahanjikile ku kanwa lia profeta ngwenyi,

⁵ Ambenu kuli mwana wa Zaione, ngwenu, Tala, Mwanangana we meza kuli yena, Mukwa kushimbika, kanende ha chimbulu, Kanende ha musamba wa chimbulu.

⁶ Mba tumbaji ayile, alingile chizechene ngwe Yesu waashikile.

⁷ Anehene chimbulu ni mwanenyi, asele mahina jo hali ayo; neye watwamineho.

⁸ Chihanda chinene cha ku mbunga aalile mahina jo mu jila; akwo apwile nikusemba mitango ku mitondo nikuyiala mu jila.

⁹ Mbunga jize angutetekelele ni jize akawile, akololokele ngwo, Vulie! Mwana David! Kufumana yoze meza mu jina lia Mwene; Vulie! mwilu mwahiana!

¹⁰ Shimbu anjilile mu Yerusaleme, limbo lieswe akasumukine, ngwo, Yono iya?

¹¹ Mbunga ambile ngwo, Yono mwe profeta Yesu yoze wa ku Nazare, limbo lia mu Ngalileya.

¹² Yesu wanjilile mu tembele ya Zambi, Watuhwishile waze eswe alanjishile, ni waze alanjile mu tembele, walimbwile mesa ja akwa kusumbakenya mbongo, ni yitwamo ya waze alanjishile tutele.

¹³ Ngwenyi, Chinasonewa ngwo, Kumakavuluka zuwo liami ngwo, Zuwo lia kulembela: alioze yenu nwakulipwisa chiswamo cha mihuza.

¹⁴ Ni tupuputa ni yilema ejile kuli iye mu tembele; neye waawukile.

¹⁵ Mba muze asasendote akwa lutwe ni akwa kusonyeka amwene yikomokeso yize alingile, ni ana aze akololokele mu tembele ngwo, Vulie! Mwana David; evwile kupiha.

¹⁶ Ambile kuli iye ngwo, Unevu chize anambe wano, nyi? Yesu ngwenyi, Ewa, kunwatangile nilimwe tangwa ngwo, Mu makanwa ja ana-akemba ni akwa kwamwa hiwasa uhaliso ungunu.

¹⁷ Mba waahichikile, watuhukile mu limbo akaye ku Mbetaniya, mba wapombeleko ufuku uze.

¹⁸ Achi, ha chimenemene shimbu muchihiluka ku limbo, wevwile zala,

¹⁹ mba ha kumona mukuyu ku sesa lia jila, wakundamineko alioze kawanyineko nichimwe, shina mafwo wika; neye ngwenyi, Kanda ukema nawa mihuko ndo ku miaka ya mutolo. Haze hene mukuyu womine chau.

²⁰ Muze tumbaji achimwene, akomokene ngwo, Kumanyi, nikawashi Chichize mukuyu hiwoma lume chau!

²¹ Yesu wakumbulwile, ngwenyi, Pundu ngwami, Kachi munupwa ni Ufulielo, kunushi kuyambashana, hi chino ko wika halinga ku mukuyu munulinga, alioze chipwe kachi munwamba ku mulundu uno ngwenu, Tutuluka, ulimbile mu kalunga-lwiji, kumuchikapwa.

²² Ni yuma yeswe munwita ni Ufulielo ha kulemba, kumunukatambula.

²³ Muze anjilile mu tembele, asasendote akwa lutwe ni makulwana ja atu ejile kuli iye shimbu machilongesa ngwo, Ni chiyulo chika wakulinga yino yuma? Iya wakuhele chiyulo chino?

²⁴ Yesu waakumbulwile ngwenyi, Ni yami nawa mungunuhula chuma chimuwika, kachi munungwambulwilacho ni yami nawa chizechene mungunwambulwila chiyulo chize nakulinga nacho yino yuma.

²⁵ Ngwami, Upapachiso wa Yoano, kulihi wakatukile? Shina mwilu nyi, shina kuli atu? O aliambile hakachi ko ngwo, Kachi mutwamba ngwetu, Mwilu; iye mamba kuli yetu ngwenyi, Kuchi te kevwe kunwamufulielele?

²⁶ Alioze kachi mutwamba ngwetu, Kuli atu; tunevu woma wa mbunga; mumu eswe kakumona Yoano ngwe profeta.

²⁷ Kashika akumbulwile kuli Yesu, ngwo, Kutwanyingikine. Iye nawa ngwenyi, Chipwe ni yami nawa chichi kunwambulwila chiyulo chize nakulinga nacho yino yuma.

²⁸ Alioze kuchi nunashinginyeka? Mutu wapwile ni ana aali a malunga. Wejile kuli mutangu ngwenyi, Mwanami, yako musono ukalinge mu munda.

²⁹ Aye wakumbulwile ngwenyi, Chichi kuyako; alioze kulutwe yalikonyeka, yaya.

³⁰ Wejile kuli wamuchiali, wambile chizechene. Neye wakumbulwile ngwenyi, Ewa, mwane, munguya: alioze kayileko.

³¹ Hakachi ka wano aali iya walingile upale wa tato? O ngwo, Mutangu. Yesu ngwenyi, Pundu ngwami, Akwa kufwetesa lijimu ni yikoi kumakanutetekela kunjila mu wanangana wa Zambi.

³² Mumu Yoano wejile kuli yenu mu jila ya ululi, kunwamufulielele, alioze akwa kufwetesa lijimu ni yikoi amufulielele: alioze yenu muze nwachimwene chipwe kulutwe kunwalikonyekene hanga numufuliele.

³³ Ivwenu chishima chikwo ngwami, Kwapwile mutu mwenya zuwo, watumbile munda wa uva, wafulilemo ukamino, watungile kaposhi, waukunjikile kuli njimi, wayile ku chifuchi chikwo.

³⁴ Muze mwaka wa mihuko wakundamine, watumine ndungo kuli njimi mukutambula mihuko yenyi.

³⁵ Ahoze njimi akwachile ndungo jenyi, umwe amulambile, mukwo amushihile, ni mukwo amwashile mawe.

³⁶ Cheka nawa, watumine ndungo akwo kuhiana atangu, no alingile kuli ayo chizechene.

³⁷ Ha kusula watumine kuli ayo mwanenyi wa lunga, ngwenyi, Mwanami, makamulemesa.

³⁸ Alioze njimi, muze amwene mwanenyi, aliambile hakachi ko ngwo, Yono mwe swana, tumushihenu, tukatambule chihinga chenyi.

³⁹ Amukwachile, amumbilile haze lia munda, mba amushihile.

⁴⁰ Muze kashika mwenya munda meza, kuchi makalinga kuli waze njimi?

⁴¹ O ngwo, Kumakonwona waze atu api, makakunjika munda kuli njimi akwo, waze makamwaha mihuko ha mwaka wayo.

⁴² Yesu ngwenyi, Kunwatangile nilimwe tangwa mu yisoneko, nyi? Ngwo, Liwe lize alitunyine tungi, Lienalio kuliapwa liwe lia helu lia mbango; Chino cha kuli Mwene, Necho chikomokeso kumeso jetu.

⁴³ Kashika ngwami, Kumakachiza wanangana wa Zambi kuli yenu, makauhana ku vungu limwe lia waze mema mihuko yawo.

⁴⁴ Yoze malimbuka ha liwe lino kumakamakuka: alioze hali mweswawo mulikaholokela, mulikamufwenya tuyifwenvufwenyu.

⁴⁵ Muze asasendote ni A-Fwariseu evwile yishima yenyi anyingikine ngwo, Kanahanjika ha kutwala kuli yetu.

⁴⁶ Alioze muze afupile kumukwata, evwile woma wa mbunga, mumu amumwene ngwe profeta.