Mateu 20 - MUKANDA USANDU WA ZAMBI 1975

¹ Mumu wanangana wa malilu kuunapu ngwe mutu mwenya zuwo, watuhukile ha chimenemene mukulakenya akwa milimo aye ku munda wenyi.

² Mba muze te hatesa ni akwa milimo ha lumbongo ha tangwa, waatumine ku munda wenyi.

³ Watuhukile ngwe ha ola yamuchitatu, wamwene akwo te kanamana mu yitanda nikulelumioka;

⁴ kuli ayo wambile ngwenyi, Yénu nawa ku munda, ni cheswacho muchilita mungukanwaha. No ayile.

⁵ Cheka nawa watuhukile ngwe ha ola yamuchisambano ni yamuchilivwa chizechene.

⁶ Mba ngwe ha ola kumi ni kashi watuhukile nawa, wawanyine akwo te kanamana; neye yamba kuli ayo, ngwenyi, Kuchi te nunamana hano tangwa lieswe nikulelumioka?

⁷ O yamba kuli iye ngwo, Mumu niumwe katulakenyene. Iye yamba kuli ayo ngwenyi, Yénu nawa ku munda.

⁸ Muze hapwile chingoloshi, mwenya munda yamba kuli kafufuchi kenyi ngwenyi, Tambika akwa milimo, ukaafwete. Putuka kuli mukwa kusula ndo kuli atangu.

⁹ Muze waze aalakenyene ha ola kumi ni kashi ejile, atambwile mutu ni mutu lumbongo.

¹⁰ Muze atangu ejile, ashinginvekene ngwo, Mututambula jikwo nawa, no atambwile chizechene mutu ni mutu lumbongo.

¹¹ Muze amutambwile, alinyenyetene hali mwenya zuwo.

¹² Ngwo, Wano akwa kusula halinga ola yimuwika mba hiwaatesa hamuwika ni yetu twanyongononanga ndusu ha chivukuminya cha mwalwa.

¹³ Alioze iye wakumbulwile kuli umwe hakachi ko ngwenyi, Mukwetu, chakulingile chipi: kwalitesele ni yami ha lumbongo, nyi?

¹⁴ Anda yoze niwe, yako kwe; upale wami kuhana kuli yono mukwa kusula chizechene ngwe kuli yena.

¹⁵ Kuchalitele ni shimbi hali yami kulinga chize ngunapale ni yuma ya yami mwene, nyi? Shina liso lie liapwa lipi, mumu yami nguli mupema?

¹⁶ Chocho akwa kusula kumakapwa atangu, ni atangu kumakapwa akwa kusula; mumu matambika anji, alioze matongola akehe.

¹⁷ Shimbu Yesu machikanduka ku Yerusaleme, watwalile tumbaji twenyi kumi ni aali ukawo mu jila, wambile kuli ayo ngwenyi,

¹⁸ Talenu, tunakanduka ku Yerusaleme; kumakakunjika mwe Mwana Mutu kuli asasendote akwa lutwe ni akwa kusonyeka; no kumakamuhisa ku kufwa,

¹⁹ kumakamukunjika kuli akwa mavungu mukumukekuna, akamulambe ni shikote, akamuhachile ha kulusu: ni ha tangwa liamuchitatu kumakahinduka.

²⁰ Hohene naye ya ana a Zembendeu wejile kuli iye hamwe ni ana jenyi, nikumuwayila, nikwita chuma chimwe kuli iye.

²¹ Aye wambile kuli iye ngwenyi, Kuchi unazange? Yamba kuli iye ngwenyi, Amba hanga wano anami aali a malunga akatwame umwe ku chindume che ni mukwo ku chimeso che mu wanangana we.

²² Alioze Yesu wakumbulwile ngwenvi, Kunwanyingikine chize nunechi. Munuhasa kunwa musenge uze mungunwa yami, nyi? Munuhasa kutambula upapachiso uze mangupapachisa nawo, nyi? Ngwo, Mutuhasa.

²³ Iye ngwenyi, Kumunukanwa chamwenemwene musenge wami, kumakanupapachisa ni upapachiso uze mangupapachisa nawo; alioze kutwama ku chindume chami, hanji ku chimeso chami, hi nichami ko kuhana; alioze chili hali waze hanaalulikilacho kuli Tata.

²⁴ Muze kumi achivwile, evwile kupiha hali asongo-ni-mutu.

²⁵ Alioze Yesu waatambikile kuli iye, ngwenyi, Yenu nunanyingika ngwe akwa kuyula ja mavungu kakupwa ni wene helu lio, ni anene jo kakupwa ni chiyulo helu lio.

²⁶ Alioze kuchichi kapwa chocho hakachi kenu, alioze mweswawo mazanga kupwa munene hakachi kenu, akapwe kavumbi kenu.

²⁷ Mweswawo mazanga kupwa mutangu hakachi kenu, akapwe mukwa kunulingila.

²⁸ Chizechene ngwe mwe Mwana Mutu kejileko akamuvumbike, alioze mukuvumbika, nikuhana mwono wenyi ndando ya ukule hali anji.

²⁹ Shimbu machituhuka mu Yeriku, mbunga yinene amukawile.

³⁰ Kumanyi tupuputa aali, te kanatwama ku sesa lia jila, muze evwile ngwo, Yesu kanapalika, akololokele ngwo, Mwene, yena mwana David, tuvwile kama keke.

³¹ Alioze mbunga aámbilile, hanga ahole; alioze akololokele kuhiana ngwo, Mwene, yena mwana David, tuvwile kama keke.

³² Yesu wamanyine, waatambikile ngwenyi, Kuchi nunazange ngunulingile?

³³ Ngwo, Mwene, hanga meso jetu alaule.

³⁴ Yesu, se haavwila keke, wasele minwe ha meso jo; haze hene alawile ku meso, mba amukawile.