Mateu 2 - MUKANDA USANDU WA ZAMBI 1975

¹ Achi, muze te Yesu hanasemuka mu Mbeteleme, chihunda cha mu Yundeya ha matangwa ja mwanangana Heronde, kumanyi, akwa mana a ku Chivumbuko ejile ku Yerusaleme,

² ngwo, Ulihi yoze unasemuka Mwanangana wa A-Yunda? Mumu twamwene lutongonoshi wenyi mu Chivumbuko, hitweza mukumuwayila.

³ Muze mwanangana Heronde achivwile, walipikalile, ni A-Yerusaleme eswe hamwe nenyi.

⁴ Ha kukungulula asasendote akwa lutwe eswe, ni akwa kusonyeka ja atu, waahulile kuze Kristu masemukina.

⁵ No ambile kuli iye ngwo, Mu Mbeteleme, chihunda cha mu Yundeya; mumu chocho chinasonewa ni kwoko lia profeta ngwenyi,

⁶ Ni yena, Mbeteleme, mu chifuchi cha Yunda, Hi uli mukepekepe ko hakachi ka akwa kuyula ja Yunda: Mumu muli yena kumakatuhuka mukwa kuyula, Mwenawo kumakapwa kafunga ka atu jami A-Izalele.

⁷ Hohene Heronde watambikile akwa mana ku tenga, waahulile pundu shimbu lize lutongonoshi wasolokele.

⁸ Waatumine ku Mbeteleme, ngwenyi, Yénu, nukahule pundu ha kutwala kuli mwe mwana; muze munumuwana, nukeze, nukangwambulwile, hanga ni yami nawa ngukaye, ngukamuwayile.

⁹ No muze hevwa mwanangana, ayile mu jila yo; ni kumanyi, lutongonoshi yoze amumwene mu Chivumbuko, wayile kulutwe lio, ndo wahetele nikumana helu kuze mwe mwana wapwile.

¹⁰ Muze amwene lutongonoshi, awahililile ni uwahililo unene wahiana.

¹¹ No anjilile mu zuwo, amwene mwe mwana hamwe ni naye Maria; afulamanyine nikumuwayila, no nikupakula upite wo, amulambwile yawana ya oru ni libano ni mira.

¹² No se Zambi haatoweza mu chilota kanda ahilukila kuli Heronde akatukile mukuya ku chifuchi cho ku jila yeka.

¹³ Achi, muze te hakatuka, kumanyi, mungelo wa Mwene yasoloka kuli José mu chilota, ngwenyi, Katuka, utwale mwe mwana ni naye, uchinyine ku Engitu, ukapweko ndo mungukakwambulwila, mumu Heronde mafupa mwe mwana mukumwonwona.

¹⁴ Mba José wahindukile, watwalile mwe mwana ni naye ha ufuku, wakatukile mukuya ku Engitu;

¹⁵ wapwileko ndo ku kufwa cha Heronde; hanga chikamanunuke chize ahanjikile Mwene ku kanwa lia profeta ngwenyi, Natambikile mwanami akatuke ku Engitu.

¹⁶ Hohene Heronde, muze amwene ngwe akwa mana hamulelesa, wevwile chikolo ufwatulo, mba watumine, akashihe ana-malunga eswe mu Mbeteleme, ni manjiza jacho eswe, chize ku miaka yiali ni waze kanda aheta ku miaka yiali, nikulita ni tangwa lize wevwile pundu kuli akwa mana.

¹⁷ Hohene chamanunukine chize ahanjikile ku kanwa lia profeta Jeremia ngwenyi,

¹⁸ Liji alivwile mu Rama, Malilo ni kunenganyana chinene, Rakele kanalilila anenyi; Katayile amulembejeke, mumu akuhi.

¹⁹ Alioze muze te Heronde hafwa, kumanyi, mungelo wa Mwene yasoloka kuli José mu chilota mu Engitu, ngwenyi,

²⁰ Katuka, utwale mwe mwana ni naye, uye ku chifuchi cha Izalele; mumu waze afupile kwenyeka mwono wa mwe mwana hanafu.

²¹ Wahindukile, watwalile mwe mwana ni naye, wahetele ku chifuchi cha Izalele.

²² Alioze muze evwile ngwo, Arkelau kanayulu mu Yundeya kusalakana tato Heronde; wevwile woma kuyako, alioze se Zambi hamutoweza mu chilota, wayile kweka ku yihanda ya ku Ngalileya;

²³ wahetele, watwamine ku limbo analivuluka ngwo, Nazare; hanga chikamanunuke chize ahanjikile ku makanwa ja aprofeta ngwo, Kumakamuvuluka ngwo, Ka-Nazare.