Mateu 19 - MUKANDA USANDU WA ZAMBI 1975

¹ Muze te Yesu hamanununa maliji ano, wakatukile ku Ngalileya, wahetele ku manjiza ja Yundeya kuze-kanda lia Yordau;

² mbunga jinene amukawile; iye waawukileko.

³ A-Fwariseu ejile kuli iye, akamweseke, ngwo, Muchilita ni shimbi hali mutu kulakula mukwo-pwo ha chikuma cheswacho, nyi?

⁴ Waakumbulwile ngwenyi, Kunwatungile nyi, ngwe yoze waatangile chize ku uputukilo waatangile lunga ni pwo,

⁵ ngwenyi, Ha chikuma chino mutu akahichike tato ni naye, akalinunge ni mukwo-pwo; e aali kumakapwa musunya umuwika?

⁶ Chocho hi aali nawa ko, alioze musunya umuwika. Chize kashika Zambi hananungu, atu kanda akachihandununa.

⁷ O yamba kuli iye ngwo, Kuchi te kevwe Mose ayulile ngwenyi, Akahane mukanda wa kulakula, mba akamutwale?,

⁸ Iye yamba kuli ayo ngwenyi, Ha kukala cha mbunge jenu Mose wanutayijile kulakula akwenu-mapwo: alioze chize ku uputukilo kuchapwile chocho.

⁹ Alioze ngunambe kuli yenu ngwami, Mweswawo malakula mukwo-pwo shina ha upangala, mba hitunamambata mukwo, malinga utanji: ni yoze mambata yoze hanamulakula, malinga utanji.

¹⁰ Tumbaji twenyi yamba kuli iye ngwo, Kachi chikuma cha mutu muchipwa chocho ni mukwo-pwo, kachi hi chipema ko kumbata.

¹¹ Alioze wambile kuli ayo ngwenyi, Eswe kahashile kutambula liji lino, ndo waze aahelelio.

¹² Mumu kwali aunuku, waze asemukine chocho ku jimo lia anaye; kwali aunuku, waze aapwishile aunuku kuli atu: kwali aunuku, waze alipwishile aunuku mumu ha wanangana wa malilu. Yoze mahasa kulitambula, akalitambule.

¹³ Mba anehene kuli iye ana akepe, hanga asayike moko jenyi hali ayo, alembe; alioze tumbaji aakanjishile.

¹⁴ Alioze Yesu wambile ngwenyi, Tayizenu ana akepe, kanda nwakanjisa kwiza kuli yami: mumu wanangana wa malilu wa wano ene.

¹⁵ Wasayikile moko jenyi hali ayo, mba wakatukile kuze.

¹⁶ Mba umwe wejile kuli iye, ngwenyi, Longeshi mupema, chuma chipema chika mungulinga hanga ngukapwe ni mwono wa mutolo?

¹⁷ Yesu wambile kuli iye ngwenyi, Kuchi te unanguhula ha kutwala ku chipema? Kwali umuwika mupema: alioze kachi unazange kunjila mu mwono, funga maliji a shimbi.

¹⁸ Aye yamba kuli iye ngwenyi, Maliji aka? Yesu ngwenyi, Kanda ushiha, Kanda ulinga utanji, Kanda wiya, Kanda ushindakenya mahuza.

¹⁹ Lemesa tatenu ni noko, uzange mwenyembo we chizechene ngwe wakulizanga yena mwene.

²⁰ Mukweze yamba kuli iye ngwenyi, Wano eswe hingunaafungu chize ku ukweze wami; hindu kuchi ngunahono?

²¹ Yesu ngwenyi, Kachi unazange kupwa mungunu, yako, ulanjise yize uli nayo, Ukahane kuli yiswale, mba kumuopwa ni upite mwilu; wize, ungukaule.

²² Alioze muze mukweze evwile liji lize wakatukile ni chinyengo; mumu wapwile ni upite wunji.

²³ Yesu wambile kuli tumbaji twenyi, ngwenyi, Pundu ngwami, Chikalu hali pichi kunjila mu wanangana wa malilu.

²⁴ Cheka nawa ngwami, Chashi hali kamelu kupalika ndusu mu liso lia ndongo, chikalu hali pichi kunjila mu wanangana wa Zambi.

²⁵ Muze tumbaji achivwile, alishimwokene chikolo ngwo, Iya kevwe mahasa kulilamwina?

²⁶ Yesu nikutala meso kuli ayo, wambile ngwenyi, Kuli atu kuchishi kuhasa; alioze kuli Zambi yuma yeswe muyihasa kupwa.

²⁷ Hohene Petulu wamukumbulwile, ngwenyi, Mba ni yetu hitunahichika yuma yeswe, kukaula; yika, kevwe, mutukapwa nayo?

²⁸ Yesu ngwenyi, Pundu ngwami, Yenu hinunangukaula, ha kupwisa chaha cha yuma yeswe, muze mwe Mwana Mutu makatwama ha ngunja yenyi ya uhenya, ni venu nawa kumunukatwama ha kumi lia ngunja ni ngunja jiali, nikupatwila kumi lia mavungu ni mavungu aali a Izalele.

²⁹ Ni mweswe hanahichika mazuwo, hanji ana-akwo, hanji mandumbu, hanji tato, hanji naye, hanji mukwo-pwo, hanji ana, hanji minda, mumu ha jina liami, kumakatambula kulakaji lia yisuho, mba makahinga mwono wa mutolo.

³⁰ Alioze anji atangu kumakapwa akwa kusula; ni akwa kusula kumakapwa atangu.