Mateu 17 - MUKANDA USANDU WA ZAMBI 1975

¹ Kulutwe lia matangwa asambano, Yesu yatwala hamwe nenyi Petulu, ni Tiangu, ni mwanakwo Yoano, yaakandwisa ha mulundu usuku ukawo.

² Walumukine kumeso jo: ku meso jenyi kwapangukile ngwe tangwa ni mahina jenyi apwile atoma ngwe pangu.

³ Kumanyi, kwasolokele kuli ayo, Mose ni Eliya, kanahanjika nenyi.

⁴ Petulu wakumbulwile kuli Yesu ngwenyi, Mwene, chinawaha hali yetu kupwa kuno: kachi unazange, tutungenu kuno yisakila yitatu; chimwe hali yena, chikwo hali Mose, ni chikwo hali Eliya.

⁵ Shimbu te machihanjika, lelwa lia kutemuka liaazulaminyine Chizulie, ni liji liatuhukile mu lelwa ngwo, Yono mwe Mwanami, ngunamuzange chikolo, muli iye ngunawahilila; mwivwenu.

⁶ Muze tumbaji achivwile, afulamanyine hashi, evwile chikolo woma.

⁷ Yesu wakundamine, waasele minwe ngwenyi, Katukenu, kanda nwivwa woma.

⁸ Ha kuhetula meso jo, kamwene niumwe, shina Yesu wika.

⁹ Shimbu apalumukine ku mulundu, Yesu waahele shimbi ngwenyi, Kanda nukambulwilae niumwe usolwelo uno ndo mwe Mwana Mutu hahinduka mukachi ka afu.

¹⁰ Tumbaji twenyi amuhulile ngwo, Kuchi te kevwe akwa kusonyeka akwamba ngwo, Chatamba Eliya kulianga kwiza?

¹¹ Aye waakumbulwile ngwenyi, Eliya chamwenemwene mahanga kwiza, neye makalulika yuma yeswe:

¹² alioze ngunambe kuli yenu ngwami, Eliya haneza kulu, alioze kamunyingikine. Alingile kuli iye cheswacho azangile, chocho nawa mwe Mwana Mutu makevwa lamba kuli ayo.

¹³ Hohene tumbaji anyingikine wahanjikile kuli ayo ha kutwala kuli Yoano Chipapachisa.

¹⁴ Muze ahetele ku mbunga, mutu wejile kuli iye, nikuliondela kuli iye ngwenyi,

¹⁵ Mwene, ivwa kama keke hali mwanami wa lunga: mumu musongo wa ngulu kali nawo, kakwivwa lamba chikolo; mumu kanji kakulimbwokela mu kahia, ni kanji mu meya.

¹⁶ Namuneha kuli tumbaji twe, kahashile kumuwuka.

¹⁷ Yesu waakumbulwile ngwenyi, Enu chisemuko kuchishi Ufulielo, nwapiya, ndo mwiji muka mungukapwa hamwe ni yenu? Ndo mwiji muka mungukalihumikiza ni yenu? Munehenu kuno kuli yami.

¹⁸ Yesu wamwambilile; mba ndemoniu watuhukile muli iye; mwe mwana-lunga wahindukile chize ku ola yize.

¹⁹ Hohene tumbaji ejile kuli Yesu ukawo, nikwamba ngwo, Kuchi te yetu kutwahashile kumutuhwisa?

²⁰ Aye yamba kuli ayo ngwenyi, Mumu ha Ufulielo wenu ukepe: mumu pundu ngunambe kuli yenu ngwami, Kachi munupwa ni Ufulielo ngwe lunona wa mosetate, munukamba ku mulundu uno ngwenu, Tutuluka kuno, uye kuze; newo kumuukatutuluka: kunuchi kachisa kenu nichimwe.

²¹ Alioze mulali uno kuushi kutuhuka shina ha kulemba ni ha kulitwamina kulia.

²² Shimbu atwamine mu Ngalileya, Yesu wambile kuli ayo ngwenyi, Kumakakunjika mwe Mwana Mutu ku moko ja atu;

²³ kumakamushiha, mba ha tangwa liamuchitatu kumakahinduka. Evwile chikolo chinyengo.

²⁴ Muze haheta ku Kafwanaume, waze atambwile mbongo ja tembele ejile kuli Petulu, ngwo, Longeshi yenu kakufweta mbongo ja tembele, nyi?

²⁵ Iye yamba ngwenyi, Ewa. Mba muze anjilile mu zuwo, Yesu wamupatwijile kulutwe ngwenyi, Kuchi unashinginyeka, Semone? Mianangana ja hashi kuli aya akutambula mbongo, hanji lijimu? Shina kuli ana jo, nyi? Shina kuli yilambala?

²⁶ Muze ambile ngwenyi, Kuli yilambala, Yesu wambile ngwenyi, Kashika ana kanatusuka.

²⁷ Alioze hanga kutuchi kaatalingisa, yako ku Chitende, ukambile kazambu, ukoze yishi yoze mutangu matutuka; mba muze hiwapakula kanwa lienyi, kumukawana lumbongo: ukamumbate, ukamuhane kuli ayo hali yami ni yena.