Mateu 16 - MUKANDA USANDU WA ZAMBI 1975

¹ A-Fwariseu ni A-Satuseu ejile kuli iye, nikumweseka, amwichile kwalweza chilayi cha mwilu.

² Alioze waakumbulwile ngwenyi, Muze mukupwa chingoloshi, munwamba ngwenu, Hamene tangwa lipema, mumu lihi linachili.

³ Ha chimenemene ngwenu, Musono kangonga, mumu lilu linachili, Unavunduka. Yilembese, nunanyingika ngwe chize kusa chinyingi ku yuma ya malilu alioze kunwanyingikine kusa chinyingi ku yilayi ya miaka.

⁴ Chisemuko cha ungulungulu kanda cha utanji muchifupa chilayi: ni chilayi kechi kaahacho, shina chilayi cha profeta Yona, mba waahichikile, wakatukileko.

⁵ Tumbaji twenyi ahetele mu sali, alioze avulamine kumbata mbolo.

⁶ Yesu wambile kuli ayo ngwenyi, Talenu, keyelenu futunwiso ya A-Fwariseu ni A-Satuseu.

⁷ Aliambile hakachi ko ngwo, Mumu te kutwambachile mbolo.

⁸ Yesu ha kuchinyingika, wambile ngwenyi, Yenu akwa Ufulielo ukepe, kuchi te nunaliambe hakachi kenu, mumu kunushi mbolo?

⁹ Kanda chinulumbunuka, nyi? Chipwe kanda nuchiwuluka mbolo jitano ja tununu atano ni yize yipakili nwanjile, nyi?

¹⁰ Chipwe mbolo shimbiali ja tununu awana ni yize yiseke nwanjile, nyi?

¹¹ Kuchi te kuchanulumbunukine? Chahanjikile kuli yenu ha kutwala ku mbolo. Alioze keyelenu futunwiso ya A-Fwariseu ni A-Satuseu.

¹² Mba chaalumbunukine ngwe waambile kukeyela hi futunwiso ya mbolo ko, alioze longeso lia A-Fwariseu ni A-Satuseu.

¹³ Muze Yesu ahetele ku yihanda ya Sesarea-Fwilipu, wahulile tumbaji twenyi ngwenyi, Kuchi atu akunguvuluka yami mwe Mwana Mutu?

¹⁴ Ambile ngwo, Amwe ngwo, Yoano Chipapachisa; akwo ngwo, Eliya; ni akwo ngwo, Jeremia, hanji umwe wa kuli aprofeta.

¹⁵ Iye yamba kuli ayo ngwenyi, Alioze yenu, kuchi nwakunguvuluka?

¹⁶ Semone Petulu wamukumbulwile ngwenyi, Yena uli mwe Kristu, mwe Mwana wa Zambi ya mwono.

¹⁷ Yesu wamukumbulwile, ngwenyi, Kuwawaha yena, Semone, mwana Yona, musunya ni manyinga kayisolwele kuli yena, alioze Tata yoze uli mu malilu.

¹⁸ Ni yami nawa ngunambe kuli yena ngwami, Yena uli Petulu, ni ha liwe lino mungutunga chikungulwila chami, ni yajilo ya Heteze kuyichi kakumbaho.

¹⁹ Kumungukakwaha sapi ja wanangana wa malilu; ni cheswacho mukasa hano hashi kumuchikakashiwa mu malilu: ni cheswacho mukasulula hano hashi kumuchikakasuluka mu malilu.

²⁰ Mba wakanjishile tumbaji twenyi kanda amba kuli niumwe ngwo, iye mwe Kristu.

²¹ Chize ku mwaka uze Yesu waputukile kulweza kuli tumbaji twenyi, ngwe chamutamba kuya ku Yerusaleme, nikwivwa lamba linji kuli makulwana ni asasendote akwa lutwe ni akwa kusonyeka, akamushihe, ni ha tangwa liamuchitatu akamuhindwise.

²² Petulu wamutwalile ku tenga, waputukile kumwambila ngwenyi, Zambi akuvwile keke, Mwene: chino kuchichi kapwa kuli yena, nichimwe.

²³ Alioze watewulukilile kuli Petulu ngwenyi, Sosolokako kunyima yami, Satana: uli chitalingiso kuli yami: mumu kushi kunyonga yuma ya Zambi alioze yuma ya atu.

²⁴ Hohene Yesu wambile kuli tumbaji twenyi ngwenyi, Kachi umwe mazanga kwiza kunyima yami, akalikale iye mwene, akazundule kulusu yenyi, angukaule.

²⁵ Mumu mweswawo mazanga kulamwina mwono wenyi kumakautokesa: alioze mweswawo matokesa mwono wenyi mumu hali yami, kumakauwana.

²⁶ Mumu kuchi mutu mafumbuka kachi malipichisa hashi heswe, alioze matokesa mwono wenyi? Hanji kuchi mutu mahana cha kusumbakenya mwono wenyi?

²⁷ Mumu mwe Mwana Mutu kumakeza mu uhenya wa Tato hamwe ni angelo jenyi, hohene kumakahana kuli mweswe nikulita ni yilinga yenyi.

²⁸ Pundu ngunambe kuli yenu ngwami, Kwali amwe a kuli waze anamana kuno, kechi kumona kufwa nichimwe ndo mamona mwe Mwana Mutu kaneza mu wanangana wenyi.