Mateu 15 - MUKANDA USANDU WA ZAMBI 1975

¹ Henaho akwa kusonyeka ni A-Fwariseu a ku Yerusaleme ejile kuli Yesu, ngwo,

² Kuchi te tumbaji twe akutangula ndongo ja makulwana? Mumu keshi kusana ku moko muze malia.

³ Waakumbulwile ngwenyi, Kuchi te ni yenu nawa, nwakutangula liji lia Zambi mumu ha ndongo jenu?

⁴ Mumu Zambi wahanyine shimbi ngwenyi, Lemesa tatenu ni noko: chikwo nawa, yoze mahanjika yipi hali tato hanji naye, akafwe.

⁵ Alioze yenu nwakwamba ngwenu, Mweswawo mamba kuli tato hanji kuli naye ngwenyi, Chize wahashile kufumbuka nacho kuli yami hingunachihana kuli Zambi.

⁶ Mba kuchamutambile kulemesa nichimwe tato hanji naye. Hinunalelesa liji lia Zambi mumu ha ndongo jenu.

⁷ Enu yilembese, Izaia waprofetezele kanawa hali yenu ngwenyi,

⁸ Wano atu kakungulemesa ni mivumbo yo; Alioze mbunge jo jili kusuku ni yami.

⁹ Alioze hamokomoko kakunguwayila, Nikutenga ndongo ja atu shimbi.

¹⁰ Watambikile mbunga kuli iye, wambile kuli ayo ngwenyi, Ivwenu, nuse chinyingi:

¹¹ Hi chize ko muchinjila mu kanwa muchipihisa mutu; alioze chize muchituhuka mu kanwa, chino muchipihisa mutu.

¹² Hohene tumbaji twenyi ejile, ambile kuli iye ngwo, Unanyingika, nyi? A-Fwariseu muze evwanga liji lino, evwanga wuli.

¹³ Alioze waakumbulwile ngwenyi, Mitondo yize yeswe Tata wa mwilu kayitumbile kumakayitukula.

¹⁴ Ahichikenu: tupuputa kanafupu kusongwela tupuputa, nyi kachi kapuputa masongwela kapuputa, eswe aali kumakalimbukila mu wina.

¹⁵ Petulu wamukumbulwile ngwenyi, Tulumbunwine chishima chino.

¹⁶ Neye wambile ngwenyi, Ni yenu nawa hindu kunushi malinjekela, nyi?

¹⁷ Kunushi kunyingika, kumanyi, cheswacho muchinjila mu kanwa muchipalika ku jimo, machimbila mu musenge?

¹⁸ Alioze yuma yize muyituhuka mu kanwa muyituhuka mu mbunge; neyo kuyakupihisa mutu.

¹⁹ Mumu mu mbunge mwakutuhuka manyonga api, ni ungalwe, ni utanji, ni upangala, ni wiji, ni Shindakenyo ya mahuza, ni kushililika.

²⁰ Yino yuma yakupihisa mutu, alioze kulia ni moko keshi kusana kuchishi kupihisa mutu.

²¹ Yesu wakatukile kuze, wayile kweka ku yihanda ya ku Teru ni Sendone.

²² Kumanyi, pwo wa ku Kanana, wakatukile mu manjiza aze, wakololokele ngwenyi, Mwene, yena Mwana David, nguvwile kama keke, mwanami wa pwo kakupinda chikolo ni ndemoniu.

²³ Alioze kamukumbulwile liji nilimwe, ni tumbaji twenyi ejile kuli iye, aliumbile kuli iye ngwo, Muhume; mumu kanakololoka kunyima yetu.

²⁴ Iye wakumbulwile ngwenyi, Chatumiwine shina kuli mapanga a kutoka a ku zuwo lia Izalele.

²⁵ Alioze wejile nikumuwayila ngwenyi, Mwene ngukwase kama.

²⁶ Aye wakumbulwile ngwenyi, Kuchawahile kuchiza mbolo ya ana ni kuyimbila kuli tuwa.

²⁷ Aye ngwenyi, Chocho Mwene: mumu chipwe tuwa kakulia yifwenyufwenyu yize yakuholoka ku mesa ya akako.

²⁸ Hohene Yesu wamukumbulwile ngwenyi, Yena pwo, Ufulielo we unene, chikapwe kuli yena chizechene ngwe unazange. Mwanenyi wa pwo wahindukile chize ku ola yize.

²⁹ Yesu wakatukile kuze, wahetele ku sesa lia Chitende cha Ngalileya; neye wakandukile ha mulundu, nikutwamaho.

³⁰ Mbunga jinene ejile kuli iye, anehene yilema, ni tupuputa, ni tumama, ni yitonji, ni akwo anji, alipupwishile kwatumbika ku yiliato ya Yesu; neye waawukile;

³¹ chocho mbunga akomokene muze amwene tumama kanahanjika, yitonji angunu, yilema kanende, tupuputa kanalaula ku meso: no achichimiekene Zambi ya Izalele.

³² Yesu watambikile tumbaji twenyi kuli iye, ngwenyi, Mbunga ya atu keke ngunaavwila, mumu kanashimbula hamwe ni yami matangwa atatu kulu, keshi nichimwe cha kulia: mba chazangile kushika no ni zala, kuchina hanji malezumuka mu jila.

³³ Tumbaji* twenyi ambile kuli iye ngwo, Muno mu puya kulihi mutuwana mbolo jipwa haha ja kukuchisa mbunga yipwa haha?

³⁴ Yesu wambile kuli ayo ngwenyi, Mbolo jingahi nuli najo? O ambile ngwo Shimbiali ni yishi amwe akehe.

³⁵ Aye wambile mbunga atwame hashi;

³⁶ wanjile mbolo shimbiali ni e yishi; wasakwilile, wajipalwile, wajihanyine kuli tumbaji twenyi, ni tumbaji twenyi ajihanyine ku mbunga.

³⁷ Eswe alile, akuchile: mba anjile yipalupalu y ze ya kusambuka, yiseke shimbiali ya tò.

³⁸ Waze alile apwile tununu awana a malunga kuweza mapwo ni ana.

³⁹ Yesu washikile ni mbunga, wanjilile mu ulungu, mba wahetele ku manjiza ja Mandala.