Mateu 14 - MUKANDA USANDU WA ZAMBI 1975

¹ Ha mwaka uze nguvulu Heronde wevwile lufuma wa Yesu,

² wambile kuli akweze jenyi ngwenyi, Yono Yoano Chipapachisa; hahinduka mukachi ka afu; kashika yipupu kuyakulinga muli iye.

³ Mumu te Heronde wakwachile Yoano kulu, wamukashile, wamusele mu zuwo lia ususu, mumu hali Herondeya, pwo lia mwanakwo Fwilipe.

⁴ Mumu Yoano wambile kuli iye ngwenyi, Kuchalitele ni shimbi kupwa nenyi.

⁵ Muze azangile kumushiha, wevwile woma wa mbunga, mumu amumwene profeta.

⁶ Alioze muze tangwa lia kusemuka cha Heronde liahetele, mwana Herondeya wa pwo, wahanganyine mukachi ko, neye wapemenene kuli Heronde.

⁷ Hohene walakenyene ni shingo kumwaha cheswacho meta.

⁸ Se hamulongesa kuli naye, yamba ngwenyi, Ngwehe kuno ha panda mutwe wa Yoano Chipapachisa.

⁹ Mwanangana wevwile chinyengo, alioze mumu ha shingo lienyi, ni hali waze atwamine ku mesa hamwe nenyi, wambile auhane.

¹⁰ Kashika watumine akatape Yoano mu zuwo lia ususu.

¹¹ Anehene mutwe wenyi ha panda, auhanyine kuli mwana-pwo, neye waunehene kuli naye.

¹² Mba tumbaji twenyi yeza, yazundula mujimba, yaufunda; mba yaya, yambulwila Yesu.

¹³ Achi, muze Yesu achivwile, wakatukile kuze akaye mu ulungu ku puya kwa ukawenyi. Muze mbunga achivwile, akatukile ku membo, amukawile hashi.

¹⁴ Yesu ha kutuhuka wamwene mbunga yinene, yaavwila keke, yawuka mieji jo.

¹⁵ Muze hapwile chingoloshi, tumbaji twenyi ejile kuli iye, ngwo, Chifuchi chino chapwa cha puya, ni tangwa kuliendala kulu; shikenu ni mbunga, hanga aye ku yihunda, ukalilanjile kulia.

¹⁶ Alioze Yesu wambile kuli ayo ngwenyi, Kuchaatambile kuya; ahenu kulia.

¹⁷ Yamba kuli iye ngwo, Tuli najo kuno mbolo jitano ni yishi aali wika.

¹⁸ Iye wambile ngwenyi, Jinehenu kuno kuli yami.

¹⁹ Wambile mbunga atwame ha mwambu, wanjile mbolo jitano ni yishi aali, nikuhetula meso jenyi kwilu, wawahishile mbolo, wajipalwile, wajihanyine kuli tumbaji, mba tumbaji ajihanyine ku mbunga.

²⁰ Eswe alile nikukuta; mba anjile yipalupalu yize yasambukile, kumi lia yipakili ni yipakili yiali.

²¹ Waze alile, apwile ngwe tununu atano a malunga kuweza mapwo ni ana.

²² Haze hene washinjikile tumbaji twenyi anjile mu ulungu, amutetekele mu sali, ndo mashika ni mbunga.

²³ Muze hashika ni mbunga, wakandukile ha mulundu ukawenyi mukulemba, mba muze hapwile chingoloshi, wapwile ukawenyi.

²⁴ Alioze ulungu wapwile kulu mukachi ka Chitende nikupinda ni mikanya; mumu fuji yalimikine no.

²⁵ Muze himukucha, Yesu wakundamine kuli ayo nikwenda ha Chitende.

²⁶ Muze tumbaji amumwene nikwenda ha Chitende, alipikalile, ngwo, Mujimu! Atetele ni woma.

²⁷ Alioze haze hene Yesu wahanjikile no ngwenyi, Hamukenu; yami mwene; kanda nwivwa woma.

²⁸ Petulu wamukumbulwile ngwenyi, Mwene, kachi yena, ngwambe ngwize kuli yena ha meya.

²⁹ Aye wambile ngwenyi, Tweya. Petulu wasunukine mu ulungu, wendele ha meya mukuya kuli Yesu.

³⁰ Alioze muze amwene fuji ya ngolo, wevwile woma; nikuputuka kushimbama, watetele ngwenyi, Mwene, ngulamwine!

³¹ Haze hene Yesu wolwele kwoko lienyi, wamukwachile, yamba kuli iye ngwenyi, Yena mukwa Ufulielo ukepe, kuchi te wayambashana?

³² Muze te hanjila mu ulungu, fuji yahola.

³³ Ni waze apwile mu ulungu amuwayilile ngwo, Chamwenemwene yena uli mwe Mwana Zambi.

³⁴ Muze te hazauka, ejile ku chifuchi cha Ngenezare.

³⁵ Muze malunga a kuma kuze amunyingikine, atumine ku chifuchi chize cheswe cha kujingilika, anehene kuli iye waze eswe ayijile.

³⁶ Aliumbile kuli iye, hanga ase wika minwe ku lupula wa hina lienyi: ni waze eswe asele minwe aapwishile angunu.