Mateu 13 - MUKANDA USANDU WA ZAMBI 1975

¹ Ha tangwa lize liene Yesu watuhukile mu zuwo, Watwamine ku sesa lia Chitende.

² Mbunga jinene akungulukile kuli iye, chocho wanjilile mu ulungu; watwamine, ni mbunga yeswe amanyine ha ngenge.

³ Wahanjikile kuli ayo yuma yinji ni yishima ngwenyi, Ivwenu, chikuwa watuhukile mukukuwa;

⁴ shimbu akuwile, yimwe yaholokelele ku sesa lia jila, ni tujila ejile, ayitakishile:

⁵ yikwo yaholokelele ha mawe, haze kuhapwile mavu anji, mba haze hene yasokele, mumu kuyapwile ni ndama ya mavu.

⁶ Muze tangwa liavumbukile yapapiwile; mba se kuyapwile ni miji, yomine.

⁷ Yikwo yaholokelele ha mingonga; ni mingonga yatatukile, yayikeketesele.

⁸ Ni yikwo yaholokelele ha mavu apema, yemine mbuto, yimwe kulakaji, yikwo makumi asambano, yikwo makumi atatu.

⁹ Yoze uli ni matwi a kwivwa, evwe.

¹⁰ Tumbaji ejile nikwamba kuli iye ngwo, Kuchi te unahanjika kuli ayo ni yishima?

¹¹ Iye waakumbulwile, ngwenyi, Yenu hananwehecho kunyingika yijimbikilo ya wanangana wa malilu, alioze o kaahelecho.

¹² Mumu mweswawo ukwete, kumakamwaha, kumakapwa nayo ya kulumbama: alioze mweswawo keshi nacho, kumakamuchiza chipwe chize ali nacho.

¹³ Kashika nakuhanjika kuli ayo ni yishima; mumu nikutala keshi kumona, mba nikupanjika keshi kwivwa, chipwe keshi kunyingika.

¹⁴ Ni kuli ayo unamanunuka uprofeto wa Izaia, uze unambe ngwo, Kwivwa kumunwivwa, alioze kunuchi kunyingika nichimwe; mba kutala kumunutala, alioze kunuchi kumona nichimwe:

¹⁵ Mumu mbunge ja atu ano hijinapapala, matwi jo kakufulamana ha kwivwa, hanafuku meso jo; kuchina hanji mamona ni meso jo, hanji mevwa ni matwi jo, hanji manyingika ni mbunge jo, hanji malumuka, ngwahindwise.

¹⁶ Alioze kawaha meso jenu, mumu kanamono, ni matwi jenu mumu kanevu.

¹⁷ Mumu pundu ngunambe kuli yenu ngwami, aprofeta anji ni akwa ululi evwile usona wa kumona yuma yize yenu nwakumona, alioze kayimweneko; evwile usona wa kwivwa yuma yize yenu nwakwivwa, alioze kayivwileko.

¹⁸ Kashika ivwenu chishima cha chikuwa.

¹⁹ Muze umwe mevwa liji lia wanangana, alioze kuliamulumbunukine, hohene mwe mupi meza, machanga chize te hakuwa mu mbunge yenyi. Yino yize ayikuwile ku sesa lia jila.

²⁰ Alioze yize mavikuwa ha mawe, iye yoze mevwa liji, mba haze hene malitambula ni uwahililo.

²¹ Alioze keshi muji muli iye mwene, manyongonona ha shimbu likepe; muze luyinda hanji yihungumiona muyiza mumu ha liji, haze hene matalinga.

²² Ni yize mavikuwa hakachi ka mingonga, iye yoze mevwa liji, ni yipikalo ya mwono uno, ni kwonga cha upite muyikeketesa liji, mba muliseka.

²³ Yize mayikuwa ha mavu apema, iye yoze mevwa liji, malinyingika, mema mbuto, umwe kulakaji, ni mukwo makumi asambano, ni mukwo makumi atatu.

²⁴ Waatelele chishima chikwo ngwenyi, Wanangana wa malilu walifwa ngwe mutu yoze wakuwile mbuto yipema mu munda wenyi:

²⁵ alioze shimbu atu apwile mu tulo, mukwa kole yenyi wejile nikukuwa mwambu wamokomoko hakachi ka tiliku, mba wayile kwenyi.

²⁶ Alioze muze mafwo asokele, emine mbuto, hohene mwambu wamokomoko wasolokele nawa.

²⁷ Ndungo ja mwenya zuwo ejile kuli iye ngwo, Mwene, kwakuwile mbuto yipema mu munda we, nyi? Mba kulihi unakatuka mwambu wamokomoko?

²⁸ Iye wambile kuli ayo ngwenyi, Mukwa kole hanalingi chino. Ndungo ambile kuli iye ngwo, Unazange tuye, tukaukungike, nyi?

²⁹ Alioze wambile ngwenyi, Ka, kuchina hanji muze munukungika mwambu wamokomoko munutukula tiliku kumuwika.

³⁰ Echenu yeswe yiali yitatuke hamuwika ndo ku kucha: ha mwaka wa kucha mungukamba kuli akwa kucha ngwami, Kungikenu hatangu mwambu wamokomoko, nukaukase yichita mukuyocha; alioze nukakungile tiliku mu machila jami.

³¹ Waatelele chishima chikwo ngwenyi, Wanangana wa malilu walifwa ngwe limona wa mosetate, yoze anjile mutu, akuwile mu munda wenyi.

³² Mwenawo chamwenemwene mukepe Wahiana mbuto yeswe; alioze muze hatatuka, hapwa munene Wahiana yiputa yeswe, mapwa mutondo chocho tujila a mwilu meza akatwame ku mitango yawo.

³³ Waatelele chishima chikwo ngwenyi, Wanangana wa malilu kuunapu ngwe futunwiso, yize anjile pwo, aswekele mu njongo jitatu ja wunga, ndo wafutunukine weswe lukombo.

³⁴ Yino yuma Yesu wayihanjikile ku mbunga ni yishima; kahanjikile kuli ayo shina ni chishima:

³⁵ hanga chikamanunuke chize ahanjikile ku kanwa lia profeta ngwo, Kumungukapakula kanwa liami ni yishima: Mungukanduka yuma ya kuhengama chize ku kusela cha fundamentu ya hashi.

³⁶ Mba Yesu washikile ni mbunga, wanjilile mu zuwo: ni tumbaji twenyi ejile kuli iye ngwo, Tulumbunwine chishima cha mwambu wamokomoko wa mu munda.

³⁷ Iye wakumbulwile, ngwenyi, Yoze wakukuwa mbuto yipema iye mwe Mwana Mutu;

³⁸ munda he hano hashi; mbuto yipema yino, ana a wanangana; mwambu wamokomoko ana a mwe mupi.

³⁹ Mukwa kole yoze waukuwile iye Ndiapu: kucha che kumanunuka cha mwaka; ni akwa kucha e angelo.

⁴⁰ Kashika ngwe makungika mwambu wamokomoko akawoche ni kahia; chocho kumuchikapwa ha kumanunuka cha mwaka.

⁴¹ Mwe Mwana Mutu kumakatuma angelo jenyi, kumakakunga yitalingiso yeswe ni waze akulinga uhulia, makaachiza mu wanangana wenyi.

⁴² Makayimbila mu lutengo wa kahia: kumukukapwa malilo ni kulikopola ku mazo.

⁴³ Hohene akwa ululi kumakatemuka ngwe tangwa mu wanangana wa Tato. Yoze uli ni matwi a kwivwa, evwe.

⁴⁴ Cheka nawa, wanangana wa maliluwalifwa ngwe upite wa kuhengeka mu munda; uze awanyine mutu, auswekele; ni ha kuwaha chenyi maya, malanjisa chize cheswe ali nacho, malanda munda uze.

⁴⁵ Cheka nawa, wanangana wa malilu walifwa ngwe mukwa chitanda kanafupu kakanga mupema.

⁴⁶ Neye ha kuwana kakanga umuwika mulemu chikolo, wayile walanjishile cheswe apwile nacho, wamulanjile.

⁴⁷ Cheka nawa, wanangana wa malilu walifwa ngwe wanda, uze atelele mu Chitende, wakungile yishi a ku milali yeswe:

⁴⁸ muze te hiwazala tò, aukokele ku ngenge; atwamine, akakungile apema mu yikwachilo, alioze api aambilile.

⁴⁹ Chocho kumuchikapwa ha kumanunuka cha mwaka; angelo kumakatuhuka akahandunune yingulungulu hakachi ka akwa ululi.

⁵⁰ O kumakaambila mu lutengo wa kahia: kumukukapwa malilo ni kulikopola ku mazo.

⁵¹ Yesu yamba kuli ayo ngwenyi, Hinwasela chinyingi yino yuma yeswe, nyi? O yamba kuli iye ngwo, Ewa, Mwene.

⁵² Wambile kuli ayo ngwenyi, Kashika mukwa kusonyeka mweswe wakufumbiwa ku wanangana wa malilu, kanapu ngwe mwenya zuwo, yoze masolola ku upite wenyi yuma yaha ni yuma yikulu.

⁵³ Muze te Yesu hamanununa yishima yino, wakatukileko.

⁵⁴ Ha kuheta ku chijima chenyi mwene, walongesele mu sunangonga yo, chocho alishimwokene, ngwo, Kulihi yono hanatambula mana ano ni yipupu yino?

⁵⁵ Yono hi mwana wa karpinteru ko, nyi? Naye hi Maria ko, nyi? Ni ana-akwo ngwo, Tiangu, ni José, ni Semone, ni Yunda, nyi?

⁵⁶ Ni mapangienyi eswe keshi hamwe ni yetu, nyi? Kulihi kevwe yono hanatambula yino yuma yeswe?

⁵⁷ Wapwile chitalingiso kuli ayo. Alioze Yesu wambile kuli ayo ngwenyi, Profeta keshi kuhona ulemu, shina mu chijima chenyi mwene, ni mu zuwo lienyi mwene.

⁵⁸ Kashika kalingileko yipupu yinji, mumu o kafulieleleko.