Mateu 11 - MUKANDA USANDU WA ZAMBI 1975

¹ Muze te Yesu hamanununa kuhana shimbi kuli tumbaji twenyi kumi ni aali, wakatukile kuze mukulongesa nikwambujola mu membo jo.

² Achi, muze Yoano evwile mu zuwo lia ususu yitanga ya Kristu, watumine tumbaji twenyi,

³ wambile kuli iye ngwenyi, Yena uli yoze meza nyi, shina mututala weka?

⁴ Yesu waakumbulwile ngwenyi, Yénu nukambulwile Yoano yize nunevu ni yize nunamono.

⁵ Tupuputa kanalaula ku meso, ni yilema kanende, akwa mbumba kanapeme, ni afwa matwi kanevu, ni afu kanahinduka; kuli yiswale kakwambujola sango lipema.

⁶ Kawaha mweswawo keshi kuwana chitalingiso muli yami.

⁷ Shimbu wano akatukile nikuya, Yesu waputukile kwamba ku mbunga ha kutwala kuli Yoano ngwenyi, Yika nwayilile mu puya mukutala? Lumbungu unanyiki ni fuji, nyi?

⁸ Alioze yika nwayilile mukutala? Mutu unazala mahina a lefuna, nyi? Waze akuzala mahina a lefuna mapwa mu mazuwo ja mianangana.

⁹ Alioze yika nwayilile mukutala? Profeta, nyi? Ewa, ngunambe kuli yenu ngwami, Umwe Wahiana chikolo profeta.

¹⁰ Mumu yono, chinasonewa ha kutwala kuli iye ngwo, Mungutuma kanganda kami kulutwe lia meso je, mwenawo kumakalulika jila ye kulutwe lie.

¹¹ Pundu ngunambe kuli yenu ngwami, Hakachi ka waze akusemuka kuli mapwo, kakatukile umwe munene Wahiana Yoano Chipapachisa: alioze yoze mukepe Wahiana eswe mu wanangana wa malilu kanapu munene kuhiana iye.

¹² Chize ku matangwa ja Yoano Chipapachisa ndo haliapwila kakutambula wanangana wa malilu ni tachi, ni akwa tachi kakuutambula ni tachi.

¹³ Mumu mikanda ya aprofeta ni ya shimbi yeswe yaprofetezele ndo kuli Yoano.

¹⁴ Nyi kachi munupala kuchitambula, iye mwe Eliya yoze meza.

¹⁵ Yoze uli ni matwi a kwivwa, evwe.

¹⁶ Alioze ngwe aya mungutesa chisemuko chino? Chinapu ngwe twanuke aze anatwama mu yitanda, waze akutambika kuli akwo,

¹⁷ ngwo, Twembanga ndembo kuli yenu, alioze kunwahanganyine; twalinyenganga, alioze kunwalilile mbimbi.

¹⁸ Mumu Yoano wejile chipwe kalile, chipwe kanwine, o mamba ngwo, Ndemoniu akwete.

¹⁹ Mwe Mwana Mutu wejile nikulia, nikunwa, o mamba ngwo, Chipulutu, mukwa kuzengewa, kasendo ka akwa kufwetesa lijimu ni yivulumunyi! Alioze mana hanasambe hali ana jenyi.

²⁰ Hohene waputukile kwámbila membo kuze alingile yipupu yenyi yinji, mumu kalikonyekeneko.

²¹ Ngwenyi, Lamba kuli yena Karazene! lamba kuli yena Mbeteseta! mumu kachi yipupu yize alingile hakachi kenu, ayilingile mu Teru ni Sendone kachi alikonyekene kulu ni chikeleyi ni uto.

²² Alioze ngunambe kuli yenu ngwami, Kumuchikapwa chashi hali Teru ni Sendone ha tangwa lia upatwilo, chikalu hali yenu.

²³ Ni yena Kafwanaume hakunangamisa ndo mwilu, kumakakuhulumuna ndo ku Heteze: mumu kachi yipupu yize alingile muli yena, ayilingile mu Sondome, kachi kuchasala ndo tangwa lino.

²⁴ Alioze ngunambe kuli yena ngwami, Kumuchikapwa chashi ha chifuchi cha Sondome ha tangwa lia upatwilo, chikalu hali yena.

²⁵ Ha mwaka uze Yesu wakumbulwile ngwenyi, Ngunakuhalisa Tata, Mwene wa lilu ni hashi, mumu wahengekele yino yuma kuli akwa mana ni akwa malinjekela, wayisolwele kuli ana-akemba.

²⁶ Ewa, Tata, mumu chocho chakupemenene.

²⁷ Kanangukunjika yuma yeswe kuli Tata, mba niumwe manyingika mwe Mwana, shina Tata, chipwe niumwe manyingika Tata, shina mwe Mwana, ka, ni kuli mweswawo mwe Mwana mapala kumusolola.

²⁸ Tweyenu kuli yami, yenu eswe nwakukilikita nikulemewa, ni yami kumungunuhwimisa.

²⁹ Lilemenu ni kanga yami, lilongesenu kuli yami; mumu nguli mukwa kushimbika, mukwa kulilelesa mu mbunge; mba kumunukawana uhwimino ku mbunge jenu.

³⁰ Mumu kanga yami yashi, ni chiteli chami chilelu.