Mateu 10 - MUKANDA USANDU WA ZAMBI 1975

¹ Watambikile kuli iye tumbaji twenyi kumi ni aali, waahele chiyulo helu lia maspiritu a luchisa, hanga akaatuhwise, ni hanga akawuke misongo yeswe ni weji weswe.

² Achi, majina ja apostolo kumi ni aali wano: Mutangu Semone, jina lienyi likwo, Petulu, ni mwanakwo Andeleu; Tiangu mwana Zembendeu, ni mwanakwo Yoano,

³ Fwilipe, ni Mbatolomeu; Tomase, ni Mateu mukwa kufwetesa lijimu; Tiangu, mwana Alefweu ni Lepeu, jina lienyi likwo, Tateu;

⁴ Semone Kazelo, ni Yundase Ka-Keriote, yoze nawa wamukunjikile.

⁵ Wano kumi ni aali Yesu waatumine, waahele koki ngwenyi, Kanda nukaya mu jila ya akwa mavungu, kanda nunjila mu limbo lia A-Samaria:

⁶ alioze yenu Shinaho kuli mapanga a kutoka a ku zuwo lia Izalele.

⁷ Shimbu munuya, ambujolenu ngwenu, Wanangana wa malilu hiwakundama.

⁸ Wukenu mieji, hindwisenu afu, pemesenu akwa mbumba, tuhwisenu andemoniu; hinunatambula wana, hanenu wana.

⁹ Kanda numbata oru, chipwe prata, chipwe mbongo mu miya yenu;

¹⁰ kanda numbata chipwe chipakumuna ha ungeji, chipwe mbinja jiali, chipwe haku, chipwe mulumbu, ka: mumu mukwa milimo kanatela kulia chenyi.

¹¹ Mu limbo lieswaho, hanji chihunda mununjila, nukahule hali yoze unatelamo; muze mwene nukatwame ndo munutuhuka.

¹² Ha kunjila mu zuwo, nukalimeneke.

¹³ Kachi zuwo mulitela, sambukila yenu yikezeho, alioze kachi kulishi kutela, sambukila yenu yikahilukile kuli yenu.

¹⁴ Mweswawo kechi kanutambula, chipwe kechi kevwa maliji jenu, shimbu munutuhuka mu zuwo lize, hanji limbo lize, nukakukumwineho fufuta ya ku molu jenu.

¹⁵ Pundu ngunambe kuli yenu ngwami, Kumuchikapwa chashi ha chifuchi cha Sondome ni Ngomora ha tangwa lia upatwilo, kumuchikapwa chikalu ha limbo lize.

¹⁶ Nyingikenu, ngunanutumu ngwe mapanga hakachi ka tungunga: kanyamenu kashika ngwe tupela, alioze pwenu akwa kusamba ngwe tutele.

¹⁷ Alioze keyelenu atu, mumu kumakanukunjika kuli akwa kuyula, kumakanulamba ni shikote mu masunangonga jo.

¹⁸ No kumakanuneha kumeso ja manguvulu ni mianangana mumu hali yami, hanga nukapwe Shindakenyo kuli ayo, ni kuli akwa mavungu.

¹⁹ Alioze muze munukunjika, kanda nukalipikala ngwe chize munukahanjika: mumu kumakanwahacho ha ola yize chize munukahanjika.

²⁰ Mumu hi yenu ko nwakuhanjika, alioze mwe Spiritu ya Tatenu yoze wakuhanjika muli yenu.

²¹ Alioze mukulwana makakunjika mwanakwo ku kufwa, ni tato makunjika mwanenyi: ni ana makakatukila yisemi jo akaashihe.

²² Kumakanuvwila kole kuli eswe mumu ha jina liami: alioze yoze manyongonona ndo ku songo kumakamulamwina.

²³ Alioze muze manuhungumiona mu limbo lino, chinyinenu ku likwo, mumu pundu ngunambe kuli yenu ngwami, Kunuchi kamanununa membo a mu Izalele ndo mwe Mwana Mutu meza.

²⁴ Kambaji keshi kuhiana longeshi yenyi, chipwe ndungo keshi kuhiana mwata wenyi.

²⁵ Kunahu hali kambaji akapwe ngwe longeshi yenyi, ni ndungo akapwe ngwe mwata wenyi. Kachi hanavuluka mwenya zuwo ngwo, Mbelezepu, kumahiana chikolo kuvuluka akwa zuwo lienyi chocho.

²⁶ Kanda nukaavwila woma kashika: mumu chuma cha kufuka chize kuchichi katukuka chakuhi, nichimwe; mba kukushi chimwe chuma cha kuswama chize kechi kachinyingika, nichimwe.

²⁷ Chize ngunambe kuli yenu mu milima, hanjikenu ha mwalwa; chize nunevu mu twitwi, ambujolenu ha mafulumba ja mazuwo.

²⁸ Kanda nukavwila woma waze akushiha mujimba, hindu kahashile kushiha alma: alioze Shinaho muvwilenu woma yoze mahasa kwonwona ni alma ni mujimba mu Ngehena.

²⁹ Keshi kulanjisa tulujila twaali ha kalumbongo kamuwika, nyi? Hindu niumwe wa kuli ayo kechi kaholokela hashi shina Tatenu machitayiza:

³⁰ alioze chipwe je kambu ja ha mitwe yenu hanajalula jeswe.

³¹ Kanda nukevwa woma kashika: yenu kunwahiana tulujila tunji.

³² Mweswawo kashika mangutayiza kumeso ja atu, yami nawa kumungukamutayiza kumeso ja Tata yoze uli mu malilu.

³³ Alioze mweswawo malikata yami kumeso ja atu, yami nawa kumungukalikalaye kumeso ja Tata yoze uli mu malilu.

³⁴ Kanda nukashinginyeka ngwe nejile mukuneha sambukila hano hashi: chejile mukuneha sambukila alioze katana.

³⁵ Mumu nejile mukumika mutu ni tato, ni mwanenyi wa pwo ni naye, ni tembwa-mwana ni tato-pwo:

³⁶ akwa kole ja mutu kumakapwa akwa zuwo lienyi.

³⁷ Yoze mafwila tato hanji naye kuhiana yami, kangutelele; yoze mafwila mwanenyi wa lunga, hanji mwanenyi wa pwo kuhiana yami, kangutelele.

³⁸ Yoze keshi kuzundula kulusu yenyi, keshi kungukaula, kangutelele.

³⁹ Yoze mawana mwono wenyi kumakautokesa; yoze matokesa mwono wenyi mumu hali yami, kumakauwana.

⁴⁰ Yoze manutambula, mangutambula yami; yoze mangutambula yami, matambula yoze wangutumine.

⁴¹ Yoze matambula profeta mumu iye profeta, kumakatambula kwononona cha profeta: yoze matambula mukwa ululi mumu iye mukwa ululi, kumakatambula kwononona cha mukwa ululi.

⁴² Mweswawo manwisa umwe wa kuli wano akepe musenge wa meya a kekema wika, mumu iye kambaji, pundu ngunambe kuli yenu ngwami, Yoze kechi katokesa kwononona chenyi nichimwe.