Mateu 1 - MUKANDA USANDU WA ZAMBI 1975

¹ Mukanda wa munyachi wa Yesu Kristu, Mwana David, mwana Apalahama.

² Apalahama wasemene Izake; Izake wasemene Yakomba; Yakomba wasemene Yunda ni ayayo ni ana-akwo;

³ Yunda wasemene Pereze ni Zera kuli Tama; Pereze wasemene Hezerone; Hezerone wasemene Arame;

⁴ rame wasemene Aminandambe; Aminandambe wasemene Nasone; Nasone wasemene Salamone;

⁵ Salamone wasemene Mboaze kuli Rahape; Mboaze wasemene Opete kuli Rute; Opete wasemene Yese;

⁶ Yese wasemene mwanangana David. Mwanangana David wasemene Solomone kuli yoze wapwile kunyima pwo lia Uriya;

⁷ Solomone wasemene Rehoboame; Rehoboame wasemene Abija; Abija wasemene Asa;

⁸ Asa wasemene Yehosofate; Yehosofate wasemene Jorame; Jorame wasemene Uzia;

⁹ Uzia wasemene Yotame; Yotame wasemene Ahaze; Ahaze wasemene Hezekia;

¹⁰ Hezekia wasemene Manase; Manase wasemene Amone; Amone wasemene Josia;

¹¹ Josia wasemene Jekonia ni ana-akwo, ha mwaka wa kwatutulwila ku Babilonia.

¹² Kulutwe lia kwatutulwila ku Babilonia, Jekonia wasemene Salatiele; Salatiele wasemene Zorobabele;

¹³ Zorobabele wasemene Ambiute; Ambiute wasemene Eliakimi; Eliakimi wasemene Azore;

¹⁴ Azore wasemene Sandoke; Sandoke wasemene Akimi; Akimi wasemene Eliute;

¹⁵ Eliute wasemene Eleazare; Eleazare wasemene Matana; Matana wasemene Yakomba;

¹⁶ Yakomba wasemene José, lunga lia Maria, kuli mwenawo kwasemukine Yesu, yoze anamuvuluka ngwo, Kristu.

¹⁷ Kashika yisemuko yeswe, chize kuli Apalahama ndo kuli David kumi lia yisemuko ni yisemuko yiwana; ni chize kuli David ndo ku mwaka wa kwatutulwila ku Babilonia kumi lia yisemuko ni yisemuko yiwana; ni chize ku mwaka wa kwatutulwila ku Babilonia ndo kuli Kristu kumi lia yisemuko ni yisemuko yiwana.

¹⁸ Achi, kusemuka cha Yesu Kristu chapwile ngwe chino: Muze naye Maria hamulakenya kuli José, shimbu kanda alinunga, amuwanyine ni ufumba kuli Spiritu Musandu.

¹⁹ Mukwo-lunga José, se wapwile mukwa ululi, kazangile kumuvwisa sonyi kumeso ja atu eswe, wambile kumwecha, alioze ku tenga.

²⁰ Alioze shimbu anyongene ha yino yuma, kumanyi, mungelo wa Mwene wasolokele kuli iye mu chilota, ngwenyi, José, yena mwana David, kanda wivwa woma kutambula mukwenu-pwo Maria: mumu chize chinaseseka muli iye cha kuli Spiritu Musandu.

²¹ Kumakasema mwana-lunga, ukamuluke jina ngwe, Yesu; mumu iye kumakalamwina atu jenyi ku milonga yo.

²² Achi, yino yeswe yapwile hanga chikamanunuke chize ahanjikile Mwene ku kanwa lia profeta ngwenyi,

²³ Talenu, *virgem kumakapwa ni ufumba, makasema mwana-lunga, no kumakamuluka jina ngwo, Emanuele; lienalio Unalumbunuka ngwo, Zambi hamwe ni yetu.

²⁴ Mba José walawile mu tulo twenyi, walingile ngwe mungelo wa Mwene wamwambile, watambwile mukwo-pwo;

²⁵ alioze kapombele nenyi ndo te hasema mwanenyi mutangu wa lunga: wamulukile jina ngwenyi, Yesu.