Marku 9 - MUKANDA USANDU WA ZAMBI 1975

¹ Iye wambile kuli ayo ngwenyi, Pundu ngunambe kuli yenu ngwami, Kwali amwe anamana kuno, kechi kufwa nichimwe ndo mamona wanangana wa Zambi hiweza ni tachi.

² Mba kulutwe lia matangwa asambano, Yesu yatwala hamwe nenyi Petulu ni Tiangu, ni Yoano, yaakandwisa mulundu usuku, ukawo: iye walumukine kumeso jo;

³ mahina jenyi alumukine a kupeyima, atoma ahiana ngwe neve, ngwe mukwa kutomesa mahina hano hashi niumwe mahasa kwatomesa.

⁴ Kwasolokele kuli ayo Eliya hamwe ni Mose: no ahanjikile ni Yesu.

⁵ Petulu yakumbulula kuli Yesu ngwenyi, Longeshi, chinawaha hali yetu kupwa kuno: tutungenu yisakila yitatu; chimwe hali yena, ni chikwo hali Mose, ni chikwo hali Eliya.

⁶ Mumu kanyingikine chize mamba, mumu evwile woma wunji.

⁷ Lelwa liejile nikwazulamina Chizulie; ni liji Watuhukile mu lelwa ngwo, Yono mwe Mwanami ngunamuzange chikolo; mwivwenu.

⁸ Susumuku, ha kukengesa, kamwene nawa niumwe, shina Yesu wika hamwe no.

⁹ Shimbu machipalumuka ku mulundu, waahele koki ngwenyi, Kanda nukaambulwila niumwe chize nwamona shina muze mwe Mwana Mutu hahinduka mukachi ka afu.

¹⁰ O afungile liji lino, nikulihula hakachi ko chize kuhinduka mukachi ka afu muchipwa.

¹¹ O amuhulile ngwo, Kuchi te akwa kusonyeka akwamba ngwo, Chatamba Eliya kulianga kwiza?

¹² Iye wambile kuli ayo ngwenyi, Eliya chamwenemwene mahanga kwiza, akalulike yuma yeswe: alioze ngwe kuchi chinasonewa hali mwe Mwana Mutu ngwo, Makevwa lamba linji, makamupwisa wamokomoko?

¹³ Ahoze ngunambe kuli yenu ngwami, Eliya haneza, o hanalingi kuli iye cheswacho azangile, ngwe chinasonewa hali iye.

¹⁴ Muze ahetele kuli tumbaji, amwene mbunga yinene ha kwajingilika, ni akwa kusonyeka analihangujola no.

¹⁵ Haze hene mbunga yeswe, muze amumwene, akomokene chikolo, o nikuzomboka kuli iye, amumenekene.

¹⁶ Iye waahulile ngwenyi, Kuchi nunalihangujola no?

¹⁷ Mba umwe wa ku mbunga wamukumbulwile ngwenyi, Longeshi, nanehanga kuli yena mwanami wa lunga, Spiritu ya kamama akwete;

¹⁸ kweswako mamukwata, mamulimbula: iye matutumuna fulufulu, malikopola ku mazo, mapokieka: nahanjikanga kuli tumbaji twe, hanga amutuhwise; alioze kahashileko.

¹⁹ Iye yaakumbulula ngwenyi, Yenu! chisemuko kuchishi Ufulielo, ndo mwiji muka mungukapwa hamwe ni yenu? Ndo mwiji muka mungukalihumikiza ni yenu? Munehenu kuli yami.

²⁰ Amunehene kuli iye: muze amumwene, haze hene Spiritu wamutunyishine chikolo; iye walimbukile hashi, walangumukine nikututumuna fulufulu.

²¹ Iye wahulile tato ngwenyi, Miaka yingahi anatwama chocho? Iye wambile ngwenyi, Chize ku wanuke wenyi.

²² Ni kanji hanamulimbwola mu kahia ni mu meya, hanga amwonwone: alioze kachi muhasa kulinga chuma chimwe, tuvwile kama keke, utukwase kama.

²³ Yesu wambile kuli iye ngwenyi, Kachi muhasa kufuliela, yuma yeswe muyihasa kupwa kuli yoze mafuliela.

²⁴ Haze hene tato ya mwana, watetele, wambile ni masoji ngwenyi, Mwene, ngunafuliela; kwasa kama chize ngunahono ha Ufulielo wami.

²⁵ Muze Yesu amwene mbunga azombokele nikulikungulula, Wámbilile Spiritu ya luchisa ngwenyi, Yena spiritu ya kamama kanda ya kafwamatwi, ngunakwambe ngwami, Tuhuka muli iye, kanda ukanjila nawa muli iye.

²⁶ Iye muze te hakololoka, nikumutunyisa chikolo, watuhukile muli iye: iye wapwile ngwe mufu; chocho anji ambile ngwo, Hafwa.

²⁷ Alioze Yesu wamukwachile ku kwoko, wamukatwishile; iye wakatukile.

²⁸ Muze te hanjila mu zuwo, tumbaji twenyi amuhulile ukawo ngwo, Kuchi te yetu kutwahashile kumutuhwisa?

²⁹ Iye wambile kuli ayo ngwenyi, Mulali uno kuushi kutuhuka shina ha kulemba ni ha kulitwamina kulia.

³⁰ O akatukile kuze, apalike ndusu mu Ngalileya; alioze kazangile niumwe kuchinyingika.

³¹ Mumu walongesele tumbaji twenyi, nikwamba kuli ayo ngwenyi, Makunjika mwe Mwana Mutu ku moko ja atu, o makamushiha, ni muze hamushiha, kulutwe lia matangwa atatu kumakahinduka.

³² Alioze kanyingikine liji lino, evwile woma kumuhula.

³³ O ahetele ku Kafwanaume: ni muze apwile mu zuwo, waahulile ngwenyi, Yika nwapwanga nikulihangujola hakachi kenu mu jila?

³⁴ Alioze aholele kulungunga kwo; mumu mu jila apwile nikulihangujola hakachi ko yoze mapwa munene wahiana eswe.

³⁵ Iye watwamine, watambikile kumi ni aali; iye yamba kuli ayo ngwenyi, Kachi umwe mazanga kupwa mutangu, akapwe kasulasongo ka eswe, ni kavumbi ka eswe.

³⁶ Iye wanjile mwana mukepe, wamutumbikile mukachi ko: wamusele mu kondo, wambile kuli ayo ngwenyi,

³⁷ Mweswawo matambula umwe mwana mukepe ngwe yono mu jina liami, mangutambula yami: ni mweswawo mangutambula yami, keshi kungutambula yami, alioze matambula yoze wangutumine.

³⁸ Yoano wambile kuli iye ngwenyi, Longeshi, twamwene umwe kanatuhwisa andemoniu mu jina lie, twamukanjishile, mumu keshi kutukaula yetu.

³⁹ Alioze Yesu wambile ngwenyi, Kanda nukamukanjisa: mumu kukushi mutu yoze mahasa kulinga chipupu mu jina liami, mba mahasa nikawashi nawa kuhanjika yipi hali yami, niumwe.

⁴⁰ Mumu yoze keshi kulimika ni yetu, hamwe ni yetu ali.

⁴¹ Mumu mweswawo manwaha musenge wa meya a kunwa, mumu nuli a Kristu, pundu ngunambe kuli yenu ngwami, Yoze kechi katokesa kwononona chenyi nichimwe.

⁴² Mweswawo matalingisa umwe wa kuli ana akepe waze akungufuliela yami, Shinaho kachi majichika liwe linene lia kutwa nalio ha kota yenyi, akamumbile mu kalunga-lwiji.

⁴³ Nyi kachi kwoko lie mulikutalingisa, liteteko: Shinaho unjile mu mwono kahundu, kuchina nikupwa ni moko aali ukaye ku Ngehena, ku kahia kaze kukeshi kuhasa kujima.

⁴⁴ Muze vuno lio keshi kufwamo, ni kahia kukeshi kujimamo.

⁴⁵ Nyi kachi kulu lie mulikutalingisa, liteteko: Shinaho unjile mu mwono chilema, kuchina nikupwa ni molu aali akakumbile mu Ngehena, mu kahia kaze kukeshi kuhasa kujima,

⁴⁶ muze vuno lio keshi kufwamo, ni kahia kukeshi kujimamo.

⁴⁷ Nyi kachi liso lie mulikutalingisa, litombongonemo: Shinaho unjile mu wanangana wa Zambi kafwa-liso, kuchina nikupwa ni meso aali, akakumbile mu Ngehena ya kahia.

⁴⁸ Muze vuno lio keshi kufwamo, ni kahia keshi kujimamo.

⁴⁹ Mumu kumakavunjila mweswe ni kahia, kumakavunjila yitapo yeswe ni mungwa.

⁵⁰ Mungwa unawaha; alioze kachi mungwa unasamuka, neka mauyemesa? Pwenu ni mungwa muli yenwene, pwenu ni sambukila umwe ni mukwo ni mukwo.