Marku 8 - MUKANDA USANDU WA ZAMBI 1975

¹ Ha matangwa aze muze kwapwile cheka nawa mbunga yinene, se kapwile nacho nichimwe cha kulia, watambikile tumbaji twenyi kuli iye, yamba kuli ayo ngwenyi,

² Mbunga yino, ngunaavwila keke, mumu kanashimbula hamwe ni yami matangwa atatu kulu, keshi nichimwe cha kulia:

³ kachi mungushika no, aye ku mahio ni zala, kumalezumuka mu jila; mumu amwe a kuli ayo anakatuka kusuku.

⁴ Tumbaji twenyi amukumbulwile ngwo, Kulihi umwe mahasa kukuchisa wano ni mbolo muno mu puya?

⁵ Iye waahulile ngwenyi, Mbolo jingahi nuli najo? O ambile ngwo, Shimbiali.

⁶ Iye wambile mbunga atwame hashi: wanjile mbolo shimbiali, ni muze te hasakwila, wajipalwile, wajihanyine kuli tumbaji twenyi, hanga ajitumbike kumeso jo; no ajitumbikile kumeso ja mbunga.

⁷ O apwile ni tuyishi tumwe tukehe, muze te hatuwahisa, wambile atutumbike nawa kumeso jo.

⁸ O alile, akuchile, mba anjile yipalupalu yize yasalile, yiseke shimbiali.

⁹ Waze alile, apwile ngwe tununu awana; iye waashikile aye.

¹⁰ Haze hene wanjilile mu ulungu hamwe ni tumbaji twenyi, wahetele ku yihanda ya ku Ndalumanuta.

¹¹ A-Fwariseu atuhukile, aputukile kumuhula, kanafupu kuli iye chilayi cha mwilu, akamweseke.

¹² Iye watwile chikolo mikuma mu Spiritu yenyi, yamba ngwenyi, Kuchi te chisemuko chino muchifupa chilayi? Pundu ngunambe kuli yenu ngwami, Kechi kahana chilayi ku chisemuko chino.

¹³ Iye waahichikile, ni cheka nawa ha kunjila mu ulungu, wakatukile akaye mu sali.

¹⁴ O avulamine kumbata mbolo; kambachile mu ulungu shina mbolo yimuwika.

¹⁵ Iye waakanyamishine ngwenyi, Kanyamenu, keyelenu futunwiso ya A-Fwariseu, ni futunwiso ya A-Heronde.

¹⁶ O anyongene hakachi ko ngwo, Mbolo kutushi nayo.

¹⁷ Yesu se kachinyingika, yamba kuli ayo ngwenyi, Kuchi te nunanyongo, mumu mbolo kunushi nayo? Hindu kanda nuchinyonga, nyi? Hanji kuchanulumbunukine, nyi? Mbunge jenu hijanukala, nyi?

¹⁸ Meso nuli no, kunushi kumona, nyi? Matwi nuli no, kunushi kwivwa, nyi? Kunushi kwiwuluka, nyi?

¹⁹ Muze napalwile mbolo jitano hakachi ka tununu atano, yipakili yingahi ya tò ya yipalupalu nwanjile? O yamba kuli iye ngwo, Kumi ni yiali.

²⁰ Ni shimbiali hakachi ka tununu awana, yiseke yingahi ya tò ya yipalupalu nwanjile? No yamba kuli iye ngwo, Shimbiali.

²¹ Iye wambile kuli ayo ngwenyi, Hindu kuchanulumbunukine, nyi?

²² Yaheta ku Mbeteseta, o yaneha kuli iye kapuputa, yaliumba kuli iye, hanga amuse minwe.

²³ Iye wakwachile kapuputa ku kwoko, wamutwalile haze lia chihunda; ni muze te hafwila mate ha meso jenyi, hamusayika moko, wamuhulile ngwenyi, Unamono chimwe, nyi?

²⁴ Iye wahetwile meso, wambile ngwenyi, Ngunamono malunga; ngwe mitondo yinende.

²⁵ Mba cheka nawa wasayikile moko jenyi ha meso jenyi; iye wahetwishile meso, walawile, wamwene yuma yeswe zwalala.

²⁶ Iye wamutumine ku zuwo lienyi, ngwenyi, Chipwe kanda ukanjila mu chihunda, chipwe kanda ukaambulwila niumwe mu chihunda.

²⁷ Yesu wakatukile kuze, hamwe ni tumbaji twenyi, akaye ku yihunda ya ku Sesarea Fwilipu; mba mu jila wahulile tumbaji twenyi, ngwenyi, Kuchi atu akunguvuluka?

²⁸ Amwambulwilile ngwo, Yoano Chipapachisa; akwo ngwo, Eliya; alioze akwo ngwo, Umwe wa kuli aprofeta.

²⁹ Iye waahulile ngwenyi, Alioze ni yenu, kuchi nwakunguvuluka? Petulu yamukumbulula, ngwenyi, Mwe Kristu yena.

³⁰ Iye waahele koki ngwenyi, Kanda nukaambulwila niumwe ha kutwala kuli yami.

³¹ Iye waputukile kwalongesa, ngwenyi, Chatamba mwe Mwana Mutu kwivwa lamba linji, akalituneye kuli makulwana, ni kuli asasendote akwa lutwe, ni kuli akwa kusonyeka, akamushihe, ni kulutwe lia matangwa atatu akahinduke.

³² Iye wahanjikile mwazu liji lino, mba Petulu wamutwalile ku tenga, waputukile kumwambila.

³³ Alioze iye, ha kutewuluka, yamona tumbaji twenyi, Wámbilile Petulu ngwenyi, Sosoloka kunyima yami, Satana, mumu kushi kunyonga yuma ya Zambi, alioze yuma ya atu.

³⁴ Watambikile kuli iye mbunga hamwe ni tumbaji twenyi, wambile kuli ayo ngwenyi, Kachi umwe mazanga kungukaula, akalikale liakulu iye mwene, akazundule kulusu yenyi, akangukaule.

³⁵ Mumu mweswawo mazanga kulamwina mwono wenyi kumakautokesa; mweswawo matokesa mwono wenyi mumu hali yami ni ha sango lipema, kumakaulamwina.

³⁶ Mumu kuchi mutu mafumbuka, kachi malipichisa hashi heswe, alioze matokesa mwono wenyi?

³⁷ Hanji kuchi mutu mahana cha kusumbakenya mwono wenyi?

³⁸ Mumu mweswawo manguvwila sonyi yami, hanji ha maliji jami hakachi ka chisemuko chino cha utanji kanda cha shili, mwe Mwana Mutu nawa kumakamuvwila sonyi, muze meza mu uhenya wa Tato hamwe ni angelo asandu.