Marku 7 - MUKANDA USANDU WA ZAMBI 1975

¹ Mba yakungulukila kuli iye A-Fwariseu, ni amwe a kuli akwa kusonyeka waze akatukile ku Yerusaleme.

² No yamona amwe a kuli tumbaji twenyi kanali mbolo jo ni moko a majilo, te aze keshi kusana; aámbilile.

³ (Mumu A-Fwariseu ni A-Yunda eswe keshi kulia shina masana ku moko kanji, se anakakaminya ku ndongo ja makulwana;

⁴ muze mahiluka ku yitanda keshi kulia shina masana; ni yuma yinji yikwo kuyili, yize hanatambula mukuyikakaminya, kukosa cha misenge ni milondo, ni kengelia ni miu.)

⁵ Mba A-Fwariseu ni akwa kusonyeka yamuhula ngwo, Kuchi te tumbaji twe keshi kwenda nikulita ni ndongo ja makulwana, alioze kakulia mbolo jo ni moko a majilo.

⁶ Iye wambile kuli ayo ngwenyi, Izaia waprofetezele kanawa ha kutwala kuli yenu yilembese, ngwe chinasonewa ngwo, Wano atu kakungulemesa ni mivumbo yo, alioze mbunge jo jili kusuku ni yami.

⁷ Alioze hamokomoko kakunguwayila, nikulongesa ngwe longeso lio, yambo ya atu.

⁸ Mumu nwakuhichika liji lia shimbi lia Zambi, nwakukakaminya ku ndongo ja atu, kukosa cha milondo ni misenge, ni yuma yinji yikwo ya kulifwa ni yino nwakulinga.

⁹ Iye wambile kuli ayo ngwenyi, Pundu nwakulituna liji lia shimbi lia Zambi, hanga nukatange ndongo ja yenwene.

¹⁰ Mumu Mose wambile ngwenyi, Lemesa tatenu ni noko; chikwo ngwenyi, Yoze mahanjika yipi hali tato hanji naye, akafwe lume:

¹¹ alioze yenu nwakwamba ngwenu, Kachi mutu mamba kuli tato hanji kuli naye ngwenyi, Chize wahasa kutambula kuli yami, chapwa Korpane, chinalumbunuka, Chawana kuli Zambi.

¹² Kunushi kumutayiza nawa kulinga chuma chimwe hali tato hanji hali naye;

¹³ nwakulelesa liji lia Zambi ni ndongo jenu jize nwakujikunjika: ni yuma yinji ya kulifwa ni yino nwakulinga.

¹⁴ Watambikile mbunga kuli iye cheka nawa, wambile kuli ayo ngwenyi, Ngwivwenu eswe, chikanulumbunuke:

¹⁵ chuma chakuhi chize chili haze lia mutu, ha kunjila muli iye, muchihasa kumuchisa, nichimwe; alioze yuma yize muyituhuka muli iye, ye yize yakuchisa mutu.

¹⁶ Kachi umwe uli ni matwi a kwivwa, evwe.

¹⁷ Muze te hanjila mu zuwo ha kukatuka ku mbunga, tumbaji twenyi amuhulile ha kutwala ku chishima.

¹⁸ Iye yamba kuli ayo ngwenyi, Ni yenu nawa kunushi malinjekela, nyi? Kunwanyingikine ngwo, Cheswacho chakukatuka haze, chikanjile muli mutu, kuchishi kuhasa kumuchisa;

¹⁹ mumu kuchishi kunjila mu mbunge yenyi alioze mu jimo lienyi, muchituhuka mu musenge. Acho kanambe ngwenyi, Kulia cheswe Chinapeme.

²⁰ Iye wambile ngwenyi, Chuma chize muchituhuka muli mutu, chize muchichisa mutu.

²¹ Mumu muchima, mu mbunge ja atu nwakutuhuka, ni manyonga api, ni utanji, ni wiji, ni ungalwe, ni upangala,

²² ni kuzo, ni ungulungulu, ni kalimbalimba, ni ujila, ni liso lipi, ni kushililika, ni kulizelula, ni uzuzuke:

²³ yino yuma yeswe ya ungulungulu kuyakutuhuka muchima, kuyakuchisa mutu.

²⁴ Iye wakatukile kuze, wayile ku manjiza ja Teru ni Sendone. Wanjilile mu zuwo, mumu kazangile niumwe kuchinyingika, hindu kahashile kuswama.

²⁵ Alioze haze hene umwe pwo, mwanenyi mukepe wa pwo wapwile ni Spiritu ya luchisa, ha kumwivwa lufuma, wejile, wafulamanyine ku yiliato yenyi.

²⁶ Achi, pwo wapwile Ka-Ngresia mukwa Serufwenishia ku munyachi wenyi, waliumbile kuli iye, hanga atuhwise ndemoniu muli mwanenyi wa pwo.

²⁷ Yesu wambile kuli iye ngwenyi, Ana aliange kukuta: mumu kuchawahile kuchiza mbolo ja ana ni kujimbila kuli tuwa.

²⁸ Alioze wamukumbulwile, ngwenyi, Ewa, Mwene; hindu chipwe tuwa kushi lia mesa kakulialia yifwenyufwenyu ya ana.

²⁹ Wambile kuli iye ngwenyi, Mumu ha liji lino, yako kwe; ndemoniu hatuhuka muli mwané.

³⁰ Iye wayile ku zuwo lienyi, wawanyine te hapombesa mwana ha muu, ni ndemoniu hamukatuka.

³¹ Cheka nawa wakatukile ku manjiza ja Teru ni Sendone, wahetele ku Chitende cha Ngalileya, ndusu mu manjiza ja Ndekapoli.

³² O yaneha kuli iye, kafwa-matwi, iye chilimi cha kuhanjika wapwile nacho, o yaliumba kuli iye, hanga asayike kwoko lienyi hali iye.

³³ Iye wamutwalile ku tenga lia mbunga ukawenyi, wasele minwe ku matwi jenyi, iye wafwilile mate, wasele munwe ku limi lienyi;

³⁴ nikuhetula meso jenyi kwilu, watwile mikuma, yamba kuli iye ngwenyi, Efwata, chinalumbunuka ngwo, Jikuka.

³⁵ Haze hene matwi jenyi ajikukile, ni uta wa limi lienyi watusukile, iye wahanjikile pundu.

³⁶ Iye waahele koki ngwenyi, Kanda nukahanjika kuli niumwe, alioze cheswe iye aahele koki, chocho achambujolele kuhiana chikolo.

³⁷ Mba alishimwokene kuhiana chikolo, ngwo, Hanalingi kanawa yuma yeswe, kakuvwisa chipwe afwa-matwi, kakuhanjikisa tumama.