Marku 6 - MUKANDA USANDU WA ZAMBI 1975

¹ Iye yatuhuka muze; yaheta ku chijima chenyi mwene; ni tumbaji twenyi yamukaula.

² Muze tangwa lia Sambata hiliaheta, waputukile kulongesa mu sunarigonga: ni anji ha kwivwa alishimwokene ngwo, Kulihi yono hanatambula yino yuma? Mana aka hanamweho? Yipupu yipwa haha nawa kakuyilinga ku moko jenyi.

³ Yono hi karpinteru ko, nyi? Mwana Maria, yayo ya Tiangu, ni José, ni Yunda, ni Semone, nyi? Ni mapangienyi keshi kuno hamwe ni yetu, nyi? O amuvwilile wuli.

⁴ Alioze Yesu wambile kuli ayo ngwenyi, Profeta keshi kuhona ulemu shina mu chijima chenyi mwene, ni hakachi ka usoko wenyi, ni mu zuwo lienyi mwene.

⁵ Iye kahashile kulingaho chipupu nichimwe, shina wasayikile moko jenyi hali mieji akehe akaawuke.

⁶ Wakomokene mumu te kafulieleleko. Iye wapwile nikujingajinga ku yihunda nikulongesa.

⁷ Yatambika kuli iye kumi ni aali, waputukile kwatuma aali ni aali; nikwaaha chiyulo helu lia maspiritu a luchisa;

⁸ waambile ngwenyi, Kanda numbata nichimwe ha ungeji, shina mulumbu wika; mbolo niyimwe, chipakumuna nichimwe, mbongo nijimwe mu miya yenu.

⁹ Alioze nuye nikuzala haku; ni kanda nuzala mbinja jiali.

¹⁰ Iye wambile kuli ayo ngwenyi, Mweswamo mununjila mu zuwo, muze mwene nukatwame ndo munukatuka kuze.

¹¹ Ni kweswako kechi kanutambula, chipwe kunwivwa, ha kukatukamo, nukakukumwineho fufuta yize yili kushi lia yiliato yenu, yikape Shindakenyo kuli ayo. Pundu ngunambe kuli yenu ngwami, Kumuchikapwa chashi ha Sondome ni Ngomora ha tangwa lia upatwilo, chikalu ha limbo lize.

¹² O atuhukile, ambujolele ngwo, Atu alikonyeke.

¹³ O atuhwishile andemoniu anji, awayishile ni maji mieji anji, nikwawuka.

¹⁴ Mwanangana Heronde wamuvwile lufuma; mumu jina lienyi liafumanyine: wambile ngwenyi, Yoano Chipapachisa hahinduka mukachi ka afu, kashika yipupu kakuyilinga kuli iye.

¹⁵ Ni akwo ambile ngwo, Iye Eliya. Ni akwo ambile ngwo, Iye profeta, chizechene ngwe umwe wa kuli aprofeta.

¹⁶ Alioze Heronde muze achivwile, wambile ngwenyi, Yoano yoze namutapile, hahinduka mukachi ka afu.

¹⁷ Mumu Heronde te watumine kulu, wakwachile Yoano, wamukashile mu zuwo lia ususu, mumu hali Herondeya, pwo lia mwanakwo Fwilipe; mumu te hamumbata.

¹⁸ Mumu Yoano te hanambe kuli Heronde ngwenyi, Kuchalitele ni shimbi yena kupwa ni pwo lia mwanakwenu.

¹⁹ Ni Herondeya wamuhalililecho, wazangile kumushiha; alioze kahashile.

²⁰ Mumu Heronde wevwile woma wa Yoano, mumu kananyingika iye mukwa ululi, kanda musandu. Mba wamufungile kanawa, ni muze amuvwile, wakakashanyine chikolo, alioze wamuvwile ni kuwaha.

²¹ Mba muze tangwa lipema liahetele, Heronde ha tangwa lia kusemuka chenyi walulikile chiteleka hali yilolo jenyi, ni hali mahando, ni akwa lutwe a mu Ngalileya.

²² Ni muze mwana wa Herondeya wa pwo anjilile, wahanganyine, mba wapemenene kuli Heronde ni waze atwamine hamwe nenyi ku mesa; ni mwanangana wambile kuli mwana-pwo ngwenyi, Ngwite cheswacho muzanga, mungukwahacho.

²³ Walishingile kuli iye ngwenyi, Cheswacho mungwita, mungukwahacho ndo ku chihanda cha hakachi cha wanangana wami.

²⁴ Iye watuhukile akahule kuli naye ngwenyi, Kuchi mungwita? Iye wambile ngwenyi, Eta mutwe wa Yoano Chipapachisa.

²⁵ Haze hene wanjilile kawashi kuli mwanangana, wechile, ngwenyi, Ngunazange ungwehe kamunomuno ha panda, mutwe wa Yoano Chipapachisa.

²⁶ Mwanangana wevwile chinyengo chinji; alioze mumu ha mashingo jenyi, ni hali waze anatwama ku mesa, kahashile kulituneye.

²⁷ Haze hene mwanangana watumine umwe kalayi anehe mutwe wenyi: iye watuhukile, wamutapile mu zuwo lia ususu.

²⁸ Wanehene mutwe wenyi ha panda, walihanyine kuli mwana-pwo; mba mwana-pwo walihanyine kuli naye.

²⁹ Muze tumbaji twenyi achivwile, ayile, azundwile mujimba wenyi, ausele mu fuka.

³⁰ Apostolo yalikungulula kuli Yesu; amwambulwilile yuma yeswe alingile, ni yize alongesele.

³¹ Iye yamba kuli ayo ngwenyi, Tweyenu ukawenu ku puya, nukahwime hakepe, mumu anji apwile nikwizaza nikuyaya, ni kashimbu kapwile nako chipwe ha kulia.

³² O ayile ukawo mu ulungu ku puya.

³³ Atu aamwene kukatuka, ni anji nanyingikine, o akatukile ku membo eswe, azombokeleleko hashi, ahangile kuheta, mba akungamine kuli iye.

³⁴ Iye watuhukile, wamwene mbunga yinene, iye waavwilile keke, mumu apwile ngwe mapanga waze keshi kafunga: iye waputukile kwalongesa yuma yinji.

³⁵ Muze te tangwa hiliendala chikolo, tumbaji twenyi ejile kuli iye, ambile ngwo, Homa hano ha puya, ni tangwa hiliendala chikolo.

³⁶ Shikenu no, hanga aye ku minda ni ku yihunda ya kujingilika, akalianjile mbolo, mumu keshi nichimwe cha kulia.

³⁷ Alioze waakumbulwile, ngwenyi, Ahenu kulia. O yamba kuli iye ngwo, Tuye, tukalande mbolo ya kufwika kulakaji aali a mbongo, tukaahe kulia, nyi?

³⁸ Iye yamba kuli ayo ngwenyi, Mbolo jingahi nuli najo? Yénu, nutale. Muze anyingikine, yamba ngwo, Jitano, ni yishi aali.

³⁹ Wambile atwamise eswe ngango ni ngango ha mwambu wisu.

⁴⁰ O atwamine ni mikana ya kulakaji ni mikana ya makumi atano.

⁴¹ Iye wanjile mbolo jitano ni yishi aali, nikuhetula meso jenyi kwilu, wawahishile, wapalwile mbolo, wajihanyine kuli tumbaji twenyi, hanga ajitumbike kumeso jo; ni yishi aali wanyine hakachi ka eswe.

⁴² O eswe alile, nikukuta.

⁴³ Mba anjile yipalupalu, kumi lia yipakili ni yipakili yiali ya tò, ni ya yishi nawa.

⁴⁴ Ni waze alile mbolo apwile ngwe tununu atano a malunga.

⁴⁵ Haze hene washinjikile tumbaji twenyi anjile mu ulungu, amutetekele mu sali ku Mbeteseta, shimbu iye mwene machishika ni mbunga.

⁴⁶ Ni muze te hashika no, wayile ku mulundu mukulemba.

⁴⁷ Muze hapwile chingoloshi, ulungu wapwile mukachi ka Chitende, neye wapwile ukawenyi hashi.

⁴⁸ Iye ha kwamona nikupinda ha kupulula, mumu fuji yalimikine no, ngwe ha fulafula ni kucha yeza kuli ayo, kanende ha Chitende; walingile ngwe maahiana.

⁴⁹ Alioze o muze amumwene nikwenda ha Chitende, ashinginyekene ngwo, Mujimu, mba akololokele.

⁵⁰ Mumu eswe amumwene, alipikalile. Alioze haze hene wahanjikile kuli ayo, ngwenyi, Hamukenu: yami mwene; kanda nwivwa woma.

⁵¹ Iye wakandukile kuli ayo, wanjilile mu ulungu; ni fuji yaholele: no alishikishilile chikolo mu mbunge jo;

⁵² mumu chipupu cha mbolo kuchaalumbunukine, mumu mbunge jo jakalile.

⁵³ Muze te hazauka, ahetele ku chifuchi cha Ngenezare, akashile ulungu ha zuzu.

⁵⁴ Muze te hatuhuka mu ulungu, haze hene atu amunyingikine.

⁵⁵ Azombokele ndusu mu chifuchi cheswe cha kujingilika, aputukile kumbata ha yalo waze ayijile kweswako evwile ngwo, Kwali.

⁵⁶ Ni mweswamo anjilile, mu yihunda, hanji mu membo, hanji ku minda, atumbikile mieji mu yitanda, nikuliumba kuli iye, hanga ase minwe chipwe ku lupula wa hina lienyi wika: ni waze eswe amusele minwe alumukine angunu.