Marku 5 - MUKANDA USANDU WA ZAMBI 1975

¹ O ahetele mu sali lia Chitende, ku chifuchi cha A-Ngandara.

² Muze te hatuhuka mu ulungu, haze hene umwe lunga kali ni Spiritu ya luchisa watukanyine nenyi kanakatuka ku mafuka.

³ Mwenawo wapwile ni mahienyi hakachi ka chifuka: mba niumwe wahashile kumukasa nawa chipwe ni malenge, ka;

⁴ mumu kanji amukashile kulu ni kuli ni malenge, alioze malenge apatukile pundu kuli iye, ni kuli japulikile tuyihanda. Kahashile kumuhombola, niumwe.

⁵ Matangwa eswe, ufuku ni mwalwa, wapwile ha milundu ni mukachi ka chifuka nikukololoka, nikulipula ni mawe.

⁶ Muze amwene Yesu kusuku, wazombokele, wamuwayilile;

⁷ mba nikukololoka ni liji linene ngwenyi, Kuchi yami ni yena, Yesu mwe Mwana wa Zambi Chitunda? Lishinge mu jina lia Zambi kuli yami kuchi kungupinjisa.

⁸ Mumu wambile kuli iye ngwenyi, Yena spiritu ya luchisa tuhuka muli mwe lunga.

⁹ Iye wamuhulile ngwenyi, Jina lie, yena iya? Yamba kuli iye ngwenyi, Jina liami Tununu; mumu tuli anji.

¹⁰ Waliumbile kuli iye chikolo kanda aakatwisa ku chifuchi.

¹¹ Achi, kwapwile kuze hakachi ha mulundu chendo chinene cha ngulu, kanali.

¹² O akumbile kuli iye ngwo, Tutume kama kuli ngulu, hanga tunjile muli ayo.

¹³ Haze hene Yesu waatayijile. Ni maspiritu a luchisa atuhukile, anjilile muli ngulu, ni chendo alundumukine ha mbongo mu Chitende, ngwe tununu aali; afwile mu Chitende.

¹⁴ Mba waze aalishile achinyine, achambulwile mu limbo, ni ku minda. O atuhukile mukumona chize alingile.

¹⁵ Yeza kuli Yesu, yamona mukwa ndemoniu, yoze wapwile kushi ni tununu, kanatwama, kanazala hina, hapwa ni mana: no evwile woma.

¹⁶ Waze achimwene, aambulwilile ngwe chize chapwile kuli mukwa ndemoniu, ni ha kutwala kuli ngulu.

¹⁷ O aputukile kuliumba kuli iye, akatuke ku manjiza jo.

¹⁸ Shimbu anjilile mu ulungu, yoze wapwile kushi ni andemoniu, waliumbile kuli iye hanga akapwe hamwe nenyi.

¹⁹ Iye kamutayijileko, alioze yamba kuli iye ngwenyi, Yako ku mahienu kuli usoko we, ukaambulwile yize yuma yinene hanakulingila Mwene, ngwe chize akuvwilanga keke.

²⁰ Iye wayile, waputukile kwambujola mu Ndekapoli yize yuma yinene amulingilile Yesu: ni eswe akomokene.

²¹ Muze te Yesu hazauka cheka nawa mu ulungu mu sali, mbunga yinene akungulukile kuli iye; iye wapwile ku sesa lia Chitende.

²² Mba, umwe wa kuli akwa kuyula sunangonga, jina lienyi Yaru, yeza; iye ha kumumona, yafulamana ku yiliato yenyi.

²³ Yaliumba kuli iye chikolo ngwenyi, Mwanami mukepe wa pwo kanahuzu: tweya kama, usayike moko je hali iye, hanga akapwe mungunu, akatwame ni mwono.

²⁴ Iye wayile hamwe nenyi. Ni mbunga yinene amukawile, no amushinjiekele.

²⁵ Mba kwapwile umwe pwo, yoze wapwile ni musongo wa kuhita manyinga kumi lia miaka ni miaka yiali.

²⁶ Wevwile kulu yikola yinji kuli mbuki anji, te wahwishile kulu upite weswe wapwile nawo, kamukwashile nichimwe, alioze Wayijile kuhiana.

²⁷ Iye se hanevu ha kutwala kuli Yesu, wejile hakachi ka mbunga kunyima, wasele minwe ku hina lienyi.

²⁸ Mumu wambile ngwenyi, Chipwe mungusa munwe ku hina lienyi wika mungupwa mungunu.

²⁹ Ni haze hene kuhita cha manyinga chapatukile; iye wanyingikine mu mujimba wenyi ngwenyi, Hinahinduka ku upupilo wami.

³⁰ Mba haze hene Yesu, se kananyingika muli iye mwene ngwenyi, Tachi hijatuhuka muli yami, watewulukile mu mbunga, wambile ngwenyi, Iya wakwata ku hina liami?

³¹ Tumbaji twenyi ambile kuli iye ngwo, Unamono mbunga, anakushinjieka, hindu unambe ngwe, Iya wangukwata, nyi?

³² Iye wakengesele hanga amone yoze halinga chino chuma.

³³ Alioze pwo wakundamine nikwivwa woma, nikuchikima, nikunyingika chize halinga muli iye, wafulamanyine kumeso jenyi, wamwambulwilile umwenemwene weswe.

³⁴ Iye wambile kuli pwo ngwenyi, Mwanami, Ufulielo we hiwakupwisa mungunu, uye kanawa ukahinduke ku upupilo we.

³⁵ Shimbu achili nikuhanjika, amwe a ku zuwo lia mukwa kuyula sunangonga yeza, yamba ngwo, Mwané hafwa, kuchi te mukatalisa Longeshi nawa?

³⁶ Alioze Yesu ha kwivwa liji lize ahanjikile, yamba kuli mukwa kuyula sunangonga ngwenyi, Kanda wivwa woma, fuliela.

³⁷ Iye katayijile niumwe kuya hamwe nenyi shina Petulu ni Tiangu ni mwanakwo Yoano.

³⁸ O yeza ku zuwo lia mukwa kuyula sunangonga; iye yamona kupinda, ni atu nikulila nikutetwoka chikolo.

³⁹ Muze te hanjila, yamba kuli ayo ngwenyi, Kuchi te nunaneha zungo, nunalili? Mwana-pwo kafwileko, alioze mu tulo ali.

⁴⁰ O amusehele, alioze muze te haatuhwisa eswe, yatwala hamwe nenyi tato ni naye ya mwana-pwo, ni waze apwile hamwe nenyi, yanjila muze apwile mwe mwana-pwo.

⁴¹ Iye wakwachile mwana-pwo ku kwoko, yamba kuli iye ngwenyi, Talita kumi; chinalumbunuka, Mwana-pwo, ngunambe kuli yena ngwami, Hinduka.

⁴² Haze hene mwe mwana-pwo wahindukile, wendele; mumu wapwile ni kumi lia miaka ni miaka yiali. O alishikishilile haze hene ni kulishikishila chinene.

⁴³ Iye waakanjishile chikolo ngwenyi, Niumwe kanda akachinyingika; iye wambile amwehe chimwe cha kulia.