Marku 4 - MUKANDA USANDU WA ZAMBI 1975

¹ Cheka nawa waputukile kulongesa ku sesa lia Chitende. Ni mbunga yinene akungulukile kuli iye, chocho wanjilile mu ulungu, watwaminemo ha Chitende: ni mbunga yeswe apwile hehi ni Chitende hashi.

² Iye waalongesele yuma yinji ni yishima. Wambile kuli ayo mu longeso lienyi ngwenyi,

³ Ivwenu; chikuwa watuhukile mukukuwa:

⁴ ni shimbu akuwile, yimwe yaholokelele ku sesa lia jila, ni tujila a mwilu ejile, ayitakishile.

⁵ Yikwo yaholokelele homa ha mawe, haze kuyapwile ni mavu anji; ni haze hene yasokele, mumu kuyapwile ni ndama ya mavu:

⁶ muze tangwa liavumbukile, yapapiwile; se kuyapwile ni miji, yomine.

⁷ Yikwo yaholokelele hakachi ka mingonga, ni mingonga yatatukile, yayikeketeseto, kuyemine mbuto.

⁸ Yikwo yaholokelele ha mavu apema, yemine mbuto, nikusoka, nikutatuka; yemine, yimwe makumi atatu, ni yikwo makumi asambano, ni yikwo kulakaji.

⁹ Iye wambile ngwenyi, Yoze uli ni matwi a kwivwa, evwe.

¹⁰ Muze apwile ukawenyi, waze amujingilikile hamwe ni kumi ni aali, amuhulile ha kutwala ku yishima.

¹¹ Iye wambile kuli ayo ngwenyi, Hananwehecho kunyingika chijimbikilo cha wanangana wa Zambi: alioze kuli waze ali haze, yuma yeswe kakuyilinga ni yishima:

¹² hanga ha kutala, akatale, alioze kechi kamona; mba ha kwivwa akevwe, alioze kechi kanyingika; kuchina hanji malumuka, maakonekenacho.

¹³ Iye yamba kuli ayo ngwenyi, Kunwanyingikine chishima chino, nyi? Mba ngwe kuchi mununyingika yishima yeswe?

¹⁴ Chikuwa makuwa lie liji.

¹⁵ Waze ku sesa lia jila, haze makuwa liji; muze te hevwa, haze hene Satana meza, machiza lie liji lize halikuwa mu mbunge jo.

¹⁶ Waze chizechene maakuwa homa ha mawe, waze, muze te hevwa lie liji, haze hene malitambula ni uwahililo.

¹⁷ O keshi miji muli ayo ene, alioze manyongonona ha kashimbu; kulutwe lia chize, muze luyinda hanji yihungumiona muyiza mumu ha lie liji, haze hene matalinga.

¹⁸ Akwo waze maakuwa hakachi ka mingonga; wano waze te hanevu lie liji,

¹⁹ alioze yipikalo ya mwaka uno, ni kwonga cha upite, ni usolo wa yuma yikwo ha kunjila, muyikeketesa lie liji, mulikunda.

²⁰ Waze maakuwa ha mavu apema; waze mevwa lie liji, malitambula, mema mbuto, umwe makumi atatu, ni mukwo makumi asambano, ni mukwo kulakaji.

²¹ Iye wambile kuli ayo ngwenyi, Maneha ndeya hanga ayise mushi lia chisoka, hanji kushi lia muhela, nyi? Keshi kuyisa ha chikwachilo cha ndeya, nyi?

²² Mumu chuma cha kuswama chize kechi kachisolola chakuhi nichimwe; chipwe kahengekele chuma shina hanga chikasoloke, nichimwe.

²³ Kachi umwe uli ni matwi a kwivwa, evwe.

²⁴ Iye wambile kuli ayo ngwenyi, Kanyamenu ha chize munwivwa: ni cheseko chize munweseka nacho kumakanwesekela; ni kuli yenu nwakwivwa, kumakanuwezela yikwo.

²⁵ Mumu mweswe ukwete, kumakamwaha: ni yoze keshi nacho, chipwe chize ali nacho kumakamuchizacho.

²⁶ Iye wambile ngwenyi, Chocho unapu wanangana wa Zambi, ngwe kachi mutu makuwa mbuto hashi;

²⁷ mba maya tulo, mahinduka ufuku ni mwalwa, ni mbuto muyisoka, nikusuha, kanyingikine ngwe chize yakutatuka.

²⁸ Mumu hashi kuhakwima mbuto yaho hene, hatangu mafwo, kulutwe lia chize mutwe, kulutwe lia chize lunona mwa tò ha mutwe.

²⁹ Alioze muze mbuto muyilila, hohene matumisa kwengo, mumu kucha hicheza.

³⁰ Iye wambile ngwenyi, Ngwe chika mutupwisa wanangana wa Zambi? Hanji ni chishima chika mutuutesa?

³¹ Ngwe lunona wa mosetate, yoze, muze mamukuwa hashi, makeha kuhiana mbuto jeswe jili hashi.

³² Alioze muze hamukuwa, matatuka, mapwa munene Wahiana yiputa yeswe, matangala mitango yinene; chocho tujila a mwilu mahasa kutwama mu Chizulie chawo.

³³ Mba ni yishima yinji ngwe yino wahanjikile lie liji kuli ayo, nikulita ni kuhasa cho;

³⁴ kahanjikile kuli ayo shina ni chishima; alioze walumbunwine yuma yeswe kuli tumbaji twenyi ukawo.

³⁵ Ha tangwa lize liene, muze hapwile chingoloshi, yamba kuli ayo ngwenyi, Tuzaukenu, tuye mu sali.

³⁶ Mba yahichika mbunga, yamutwala hamwe no mu ulungu, chizechene ngwe apwile, ni mato akwo nawa apwile hamwe nenyi.

³⁷ Kwejile kakundukundu munene wa fuji, ni mikanya yasupwokelele mu ulungu, chocho waputukile kuzala ni meya.

³⁸ Iye wapwile kunyima mu tulo ha musau. O yamulawisa, yamba kuli iye ngwo, Longeshi, kwatunyongene yetu ngwe tunatoko, nyi?

³⁹ Iye walawile, wambilile fuji, mba wambile ku Chitende ngwenyi, Hwima, hola. Ni fuji yahwimine, kwapwile kuhola chinene.

⁴⁰ Iye wambile kuli ayo ngwenyi, Kuchi te nunasusumiana? Kuchi te kunushi Ufulielo?

⁴¹ O evwile woma wunji, aliambile umwe kuli mukwo ni mukwo ngwo, Iya kevwe yono, chipwe fuji ni meya mamwononokena?