Marku 3 - MUKANDA USANDU WA ZAMBI 1975

¹ Iye wanjilile cheka nawa mu sunangonga; mwapwilemo mutu ni kwoko lia kusosewa.

² O amulayilile kachi mamuwuka ha tangwa lia Sambata; hanga akamusume mutonga.

³ Iye yamba kuli mutu yoze wapwile ni kwoko lia kusosewa ngwenyi, Katuka, umane mukachi.

⁴ Mba yamba kuli ayo ngwenyi, Muchilita ni shimbi kulinga yipema ha tangwa lia Sambata nyi, shina kulinga yipi? Shina kulamwina mwono, nyi shina kushiha? Alioze aholele kulungunga kwo.

⁵ Muze te hakengesa hali ayo ni utenu, nikwivwa chinyengo ha kukala cha mbunge jo, yamba kuli mutu ngwenyi, Olola kwoko lie. Iye waliolwele; ni kwoko lienyi liahindukile lingunu ngwe likwo.

⁶ A-Fwariseu atuhukile, ni haze hene hamwe ni A-Heronde amutwamine punga hamuwika, ngwe chize mahasa kumwonwona.

⁷ Mba Yesu hamwe ni tumbaji twenyi akatukile akaye ku Chitende: ni chizavu chinene cha ku Ngalileya amukawile, ni cha ku Yundeya,

⁸ ni cha ku Yerusaleme, ni cha ku Indumeya, ni kuze kanda lia Yordau, ni waze a ku chifuchi cha kujingilika Teru ni Sendone, chizavu chinene ha kwivwa yuma yinene alingile, ejile kuli iye.

⁹ Iye wahanjikile kuli tumbaji twenyi, hanga amusele wato, amanemo, mumu ha mbunga, hanga kechi kumushinjieka.

¹⁰ Mumu te hawuka anji, chocho waze eswe apwile ni yilungo amuuzukilile, hanga amuse minwe.

¹¹ Ni maspiritu a luchisa, heswaho amumwene, afulamanyine kumeso jenyi, nikukololoka ngwo, Mwana Zambi yena.

¹² Iye waakanjishile chikolo, hanga kechi kamusolola.

¹³ Iye yakanduka ha mulundu, yatambika waze waapalile iye mwene; o ejile kuli iye.

¹⁴ Iye watongwele kumi ni aali, hanga akapwe hamwe nenyi, hanga akaatume mukwambujola sango lipema,

¹⁵ hanga akapwe ni chiyulo cha kuwuka misongo, ni cha kutuhwisa andemoniu.

¹⁶ Iye walukile Semone jina likwo ngwenyi, Petulu;

¹⁷ Di Tiangu mwana Zembendeu, ni mwanakwo Yoano, waalukile jina likwo ngwenyi, Mboaneje, Unalumbunuka ngwo, Akwa kukulunguza.

¹⁸ Ni Andeleu, ni Fwilipe, ni Mbatotomeu, ni Mateu, ni Tomase, ni Tiangu mwana Alefweu, ni Tateu, ni Semone Ka-Zeto.

¹⁹ Ni Yundase Ka-Keriote, yoze nawa wamukunjikile. Anjilile mu zuwo.

²⁰ Ni mbunga yakungama cheka nawa, chocho kahashile chipwe kutambula kulia.

²¹ Muze usoko wenyi achivwile, atuhukile mukumukwata: mumu ambile ngwo, Kanazaluka.

²² Akwa kusonyeka waze te hakatuka ku Yerusaleme, ambile ngwo, Mbelezepu akwete, chikwo ngwo, Ni tachi ja mwata wa andemoniu kakutuhwisa andemoniu.

²³ Waatambikile kuli iye, wambile kuli ayo ni yishima ngwenyi, Ngwe kuchi Satana mahasa kutuhwisa Satana?

²⁴ Nyi kachi wanangana muuli handununa wene, wanangana uze kuushi kuhasa kukola.

²⁵ Nyi kachi akwa zuwo malihandununa ene, akwa zuwo lize kechi kahasa kukola.

²⁶ Nyi kachi Satana malikatukila mwene, alihandunune, keshi kuhasa kukola, alioze kumujimuhwa.

²⁷ Alioze niumwe mahasa kunjila mu zuwo lia chitakame akapunde yikwata yenyi, shina hatangu makasa chitakame; mba hohene mapunda zuwo lienyi.

²⁸ Pundu ngunambe kuli yenu ngwami, Kumakakonekena atu mitonga yo yeswe, ni kushililika cho cheswe mashililika nacho.

²⁹ Alioze mweswawo mashililika Spiritu Musandu keshi ukonekeno ndo ku miaka ya mutolo, alioze mahia mutonga wa mutolo.

³⁰ Mumu ambile ngwo, Spiritu ya luchisa akwete.

³¹ Ana-akwo ni naye yeza; no, nikumana haze, atumine kuli iye kumutambika.

³² Ni mbunga ya atu atwamine ha kumujingilika; o yamba kuli iye ngwo, Noko ni ana-akwenu kanakufupu haze.

³³ Iye waakumbulwile, ngwenyi, Mama iya? Hanji ana-akwetu aya?

³⁴ Iye nikukengesa kuli waze anatwama ha kumujingilika, yamba ngwenyi, Talenu, mama ni ana-akwetu!

³⁵ Mumu mweswawo malinga upale wa Zambi, mwenawo mwanakwetu, ni pangiami, ni mama.