Marku 2 - MUKANDA USANDU WA ZAMBI 1975

¹ Muze anjilile cheka nawa mu Kafwanaume kulutwe lia matangwa amwe, achivwile ngwo, Mu zuwo ali.

² Haze hene anji akungulukile, chocho kukwapwile nawa muhela, chipwe ha kujingilika chikolo: iye wahanjikile lie liji kuli ayo.

³ O yeza kuli iye, nikuneha mukwa kalepa, amumbachile kuli atu awana.

⁴ Se kahashile kukundama kuli iye mumu ha mbunga, afukwile fulumba muze apwile, ni muze te halokolamo, azezele chalo haze apombele mukwa kalepa.

⁵ Yesu ha kumona Ufulielo wo, yamba kuli mukwa kalepa ngwenyi, Mwanami, ngunakukonekena milonga ye.

⁶ Alioze amwe hakachi ka akwa kusonyeka aze anatwama muze, nikunyonga mu mbunge jo ngwo,

⁷ Kuchi te yono anahanjika chocho? Kanashililika Zambi: iya mahasa kukonekena milonga shina umuwika, iye Zambi?

⁸ Haze hene Yesu, se kananyingika mu Spiritu yenyi, chocho anyongene, yamba kuli ayo ngwenyi, Kuchi te nunanyongo yino yuma mu mbunge jenu?

⁹ Chashi chika, shina kwamba kuli mukwa kalepa ngwami, Kakukonekena milonga ye, nyi? Shina kwamba ngwami, Katuka, anda chalo che, wende?

¹⁰ Alioze hanga nunyingike ngwe mwe Mwana Mutu chiyulo akwete hano hashi cha kukonekena milonga, yamba kuli mukwa kalepa ngwenyi,

¹¹ Kuli yena, ngunambe ngwami, Katuka, anda chalo che, uye ku zuwo lie.

¹² Iye wakatukile, ni haze hene wanjile chalo chenyi, watuhukile kumeso ja eswe; chocho alishimwokene, achichimiekene Zambi, ngwo, Kutwachimwene chocho nilimwe tangwa.

¹³ Iye watuhukile cheka nawa mukuya ku sesa lia Chitende, ni mbunga ejile kuli iye, waalongesele.

¹⁴ Shimbu machipalika, wamwene Levi, mwana Alefweu, kanatwama mu zuwo lia lijimu, yamba kuli iye ngwenyi, Ngukaule. Iye wakatukile, wamukawile.

¹⁵ Shimbu atwamine ku mesa mu zuwo lienyi, akwa kufwetesa lijimu anji ni yivulumunyi atwamine ku mesa hamwe ni Yesu ni tumbaji twenyi: mumu apwile anji, no amukawile.

¹⁶ Akwa kusonyeka ni A-Fwariseu, muze amwene ngwe alile hamwe ni yivulumunyi ni akwa kufwetesa lijimu, ambile kuli tumbaji twenyi, ngwo, Ngwe kuchi akulia ni kunwa hamwe ni akwa kufwetesa lijimu ni yivulumunyi?

¹⁷ Muze Yesu achivwile, yamba kuli ayo ngwenyi, Waze akutakama keshi kufupa mbuki, alioze waze akuyiza: chejile mukutambika akwa ululi, alioze nejile mukutambika yivulumunyi alikonyeke.

¹⁸ Tumbaji twa Yoano ni tumbaji twa A-Fwariseu apwile nikulitwamina kulia, no yeza, yamba kuli iye ngwo, Kuchi te tumbaji twa Yoano ni tumbaji twa A-Fwariseu akulitwamina kulia, alioze tumbaji twe keshi kulitwamina kulia?

¹⁹ Yesu wambile kuli ayo ngwenyi, Akwa ulungi mahasa kulitwamina kulia shimbu sandungi achili hamwe no, nyi? Ha shimbu lieswe achili ni sandungi hamwe no keshi kuhasa kulitwamina kulia.

²⁰ Alioze matangwa kumakeza muze makachiza sandungi kuli ayo, mba makalitwamina kulia ha matangwa aze.

²¹ Niumwe matonga chando cha hina lize kulishi kufunyisa ha hina likulu: mokomoko chando chaha muchichiza ku hina likulu ni chitutulu chahiana muchipwa.

²² Niumwe malonga vinyu yaha mu tuku ja malambu akulu; mokomoko vinyu yaha muyimengununa tuku ja malambu, ni vinyu muyimwangana, tuku ja malambu mujifwa: alioze malonga vinyu yaha mu tuku ja malambu aha.

²³ Iye wapalikile ha tangwa lia Sambata ndusu mu minda; ni tumbaji twenyi shimbu endele, ahulwile mitwe.

²⁴ A-Fwariseu ambile kuli iye ngwo, Tala, kuchi te analingi ha tangwa lia Sambata chize kuchalitele ni shimbi?

²⁵ Iye wambile kuli ayo ngwenyi, Kunwatangile nilimwe tangwa chize alingile David, muze ahonene, evwile zala, iye, ni waze apwile hamwe nenyi?

²⁶ Ngwe chize anjilile mu zuwo lia Zambi ha matangwa ja sasendote mukwa lutwe Abiatare, alile mbolo ja kutumbieka, jize kuchalitele ni shimbi kulia shina hali asasendote wika? Wahanyine nawa kuli waze apwile hamwe nenyi?

²⁷ Iye wambile kuli ayo ngwenyi, Atangile Sambata hali atu, hi atu ko ha Sambata:

²⁸ kashika mwe Mwana Mutu iye mwene wa Sambata nawa.