Marku 16 - MUKANDA USANDU WA ZAMBI 1975

¹ Muze te tangwa lia Sambata hiliapalika, Maria Ka-Mandala, ni Maria naye ya Tiangu, ni Salome, alanjile mbuto ya vumba lipema, hanga akaye, akamuwayise nayo.

² Ha chimenemene ha tangwa litangu lia semana, yaya ku fuka, muze te tangwa hiliavumbuka.

³ O aliambile umwe kuli mukwo ni mukwo ngwo, Iya matulangumwina liwe ku chikolo cha fuka?

⁴ O ha kuhetuka, yamona liwe halilangumunaho: mumu liapwile linene chikolo.

⁵ O ha kunjila mu fuka, amwene mukweze kanatwama ha chindume, kanazala hina lia mukambo litoma, no akomokene chikolo, nikwivwa woma.

⁶ Iye yamba kuli ayo ngwenyi, Kanda nukomoka: nunafupu Yesu, Ka-Nazare, yoze anakamuhachila ha kulusu: hahinduka; amuno keshimo: talenu, homa haze anakamusa!

⁷ Alioze yénu, nukambulwile tumbaji twenyi ni Petulu, ngwenu, Manutetekela ku Ngalileya; kuze munukamumona, ngwe ambile kuli yenu.

⁸ O atuhukile fuji, akachine ku fuka; mumu kuchikima ni kukomoka chaakwachile: o kambile nichimwe kuli niumwe; mumu evwile woma.

⁹ Achi, muze te hahinduka chimenemene ha tangwa litangu lia semana, wasolokele hatangu kuli Maria Ka-Mandala, muli iye Watuhwishile andemoniu shimbiali.

¹⁰ Iye wayile, wambulwilile waze apwile hamwe nenyi, shimbu ananenganyana nikulila.

¹¹ O muze evwile ngwo, Ni mwono ali, ni iye hamumona, kachifulieleleko.

¹² Ni kulutwe lia yino yuma walisolwele ni mujimba weka kuli aali a kuli ayo, shimbu anayi mu jila yo ya kuya ku minda.

¹³ O ayile, ambulwilile akwo: chipwe ayo kaafulieleleko.

¹⁴ Kulutwe walisolwele kuli e kumi ni kashi shimbu anatwama ku mesa; iye waámbilile, mumu kafulieleleko, ni mumu ha kukala cha mbunge, mumu kafulieleleko waze amumwene muze te hahinduka.

¹⁵ Iye wambile kuli ayo ngwenyi, Yénu hashi heswe, nukambujole sango lipema kuli atu eswe.

¹⁶ Yoze mafuliela, mamupapachisa, kumakamulamwina; alioze yoze keshi kufuliela, kumakamuhisa.

¹⁷ Yino yilayi kumuyikakaula waze mafuliela: mu jina liami kumakatuhwisa andemoniu; kumakahanjika mu malimi aha.

¹⁸ O kumakanda tupela, nyi kachi manwa chuma chimwe cha kufwa, kuchichi kaalemeka nichimwe; kumakasayika moko jo hali mieji, o kumakahinduka.

¹⁹ Chocho Mwene Yesu, muze te hahanjika kuli ayo, amutambwile mwilu, iye Watwamine ku chindume cha Zambi.

²⁰ O yatuhuka, yambujola kweswe, ni Mwene walingile hamwe no, nikukolesa liji ni yilayi yize yakawile. Amene.