Marku 15 - MUKANDA USANDU WA ZAMBI 1975

¹ Haze hene ha chimenemene, asasendote akwa lutwe hamwe ni makulwana ni akwa kusonyeka, ni akwa kuyula, yatwama punga, yakasa Yesu, yamutwala, yamukunjika kuli Pilatu.

² Pilatu wamuhulile ngwenyi, Mwanangana wa A-Yunda, yena nyi? Iye wamukumbulwile, ngwenyi, Yena wachamba.

³ Mba asasendote akwa lutwe amusumine yuma yinji.

⁴ Pilatu wamuhulile cheka nawa ngwenyi, Kushi kukumbulula nichimwe, nyi? Ivwa, yuma yipwa haha kanakusumu.

⁵ Alioze Yesu kakumbulwile nichimwe; chocho Pilatu wakomokene.

⁶ Alioze ha chiwanyino wapwile ni ndako ya kutusula kuli ayo funge umuwika, yoze mamwita.

⁷ Kwapwile umwe jina lienyi, Mbarapa, wa kukasa hamuwika ni waze akolemene hamwe nenyi, eno ashihile mutu ha kukolema.

⁸ Mba mbunga nikukololoka aputukile kumwita alinge kuli ayo nikulita ni ndako yenyi.

⁹ Alioze Pilatu waakumbulwile ngwenyi, Nunazange ngutusule kuli yenu Mwanangana wa A-Yunda, nyi?

¹⁰ Mumu wanyingikine asasendote akwa lutwe amukunjikile mumu ha lufwachinda.

¹¹ Alioze asasendote akwa lutwe avundwile mbunga hanga Shinaho atusule Mbarapa kuli ayo.

¹² Pilatu waakumbulwile cheka nawa, ngwenyi, Mba kuchi nunazange ngulinge kuli yoze nunamuvuluka ngwenu, Mwanangana wa A-Yunda?

¹³ O akololokele cheka nawa ngwo, Muhachilenu ha kulusu.

¹⁴ Pilatu wambile kuli ayo ngwenyi, Kuchi te, chipi chika hanalingi? Alioze akololokele kuhiana ngwo, Muhachilenu ha kulusu.

¹⁵ Mba Pilatu se wapalile kuhutula mbunga, waatuswilile Mbarapa, wakunjikile Yesu, muze te hamulamba ni shikote, hanga akamuhachile ha kulusu.

¹⁶ Maswalale amutwalile ku yize, kwenako ku palasiu, yatambika chihuji cheswe cha maswalale alikungulule.

¹⁷ O yamujika hina lia ufungo, yamuyinjila chipangula cha mbimbo, yachisa ha mutwe wenyi.

¹⁸ O aputukile kumumeneka ngwo, Vulie! Mwanangana wa A-Yunda!

¹⁹ Alambile mutwe wenyi ni lumbungu, amufwilile mate, o nikuliumba makungunwa jo, amuwayilile.

²⁰ Muze te hamukekuna, yamuzula hina lia ufungo, yamujika mahina jenyi. O yamutwala haze mukumuhachila ha kulusu.

²¹ O yakamba umwe mukwa kupalika te kanakatuka ku minda, Semone, Ka-Serene, tato ya Alezandre ni Rufu, aye no hanga ambate kulusu yenyi.

²² Yamuneha kuma anavulukako ngwo, Ngolongota, chinalumbunuka ngwo, Chihela cha kola.

²³ Amuhele vinyu chinge ni mira; alioze kayitambwileko.

²⁴ O yamuhachila ha kulusu, yalianyina mahina jenyi hakachi ko, nikuta chela chize mweswe matambula.

²⁵ Hapwile ola yamuchitatu, no amuliachilile ha kulusu.

²⁶ Chisoneko cha chitela chenyi chasonewene helu ngwo, Mwe Mwanangana wa A-Yunda.

²⁷ Hamwe nenyi yaliachila ha makulusu mihuza aali, umwe ku chindume chenyi ni mukwo ku chimeso chenyi.

²⁸ Mba chisoneko chamanunukine chize chinambe ngwo, Amwalwile hamwe ni yitanguke.

²⁹ Waze apalikile amutukile, nikulihunga mitwe yo ngwo, Wóló! Yena Wakwonwona tembele, wakuyitunga ha matangwa atatu,

³⁰ Ulamwine yena mwene, sunuka ku kulusu.

³¹ Chizechene asasendote akwa lutwe nawa ni akwa kusonyeka, ha kumulenya hakachi ko, ambile ngwo, Walamwinyine akwo; kahashile kulilamwina mwene.

³² Kristu, mwe Mwanangana wa Izalele, asunuke haliapwila ku kulusu, hanga tumone, tufuliele. Chipwe waze aahachilile ha makulusu hamwe nenyi amuchokele.

³³ Muze hapwile ola yamuchisambano, kwapwile milima ha chifuchi cheswe ndo ola yamuchilivwa.

³⁴ Mba ha ola yamuchilivwa, Yesu wakololokele ni liji linene ngwenyi, Eloi, Eloi, lama sambatani? Chinalumbunuka ngwo, Zambi yami, Zambi yami, kuchi te wangwehuka?

³⁵ Mba amwe a kuli waze amanyineko, muze achivwile ambile ngwo, Kumanyi, kanatambika Eliya.

³⁶ Mba umwe wazombokele, neye nikuzalisa shiponje ni vinagre, wayisele ha lumbungu akamunwiseyo, ngwenyi, Mwechenu, tutale kachi Eliya meza mukumusunwisa.

³⁷ Yesu wakololokele ni liji linene, mba wechele mwiku wenyi.

³⁸ Chikalakala cha hina cha tembele chapulikile mukachi, kwilu ndo hashi.

³⁹ Ni kapitau, yoze wamanyine hatalanganyi nenyi, muze amwene ngwe akololokele ni chocho wechele mwiku wenyi, wambile ngwenyi, Chamwenemwene, yono mutu mwe Mwana Zambi.

⁴⁰ Kwapwile mapwo nawa nikutalila kusuku, hakachi ko apwile Maria Ka-Mandala, ni Maria naye ya Tiangu mukepe ni ya Jose, ni Salome;

⁴¹ aze nawa muze apwile mu Ngalileya, amukawile nikumuvumbika, ni mapwo anji akwo waze akandukile hamwe nenyi ku Yerusaleme.

⁴² Muze hapwile chingoloshi, mumu chapwile Kululika, chenacho tangwa lia kutetekela Sambata.

⁴³ José wa ku Arimatea, mukwa kuyula mulemu, iye nawa wapwile nikutatatata wanangana wa Zambi; iye nikuhunuka, wanjilile kuli Pilatu, wechile mujimba wa Yesu.

⁴⁴ Pilatu wakomokene kachi hanafu kulu: iye ha kutambika kapitau, wamuhulile kachi hanafu kulu.

⁴⁵ Muze achivwile kuli kapitau, wechele mujimba kuli José.

⁴⁶ Iye walanjile hina lia linyu, ni muze hamusunwisa, wamuvungile mu hina lia linyu, wamusele mu fuka lia kutota mu liwe; iye walangumwine liwe ku chikolo cha fuka.

⁴⁷ Ni Maria Ka-Mandala, ni Maria naye ya José amwene muze amusele.