Marku 14 - MUKANDA USANDU WA ZAMBI 1975

¹ Achi, kulutwe lia matangwa aali, Chizomboka ni chiwanyino cha mbolo kuyishi futunwiso muchipwa. Asasendote akwa lutwe ni akwa kusonyeka te kanafupu ngwe chize mahasa kumukwata ni kalimbalimba, akamushihe.

² Mumu ambile ngwo, Hi ha tangwa lia chiwanyino ko, kuchina hanji mukukapwa zungo hakachi ka atu.

³ Shimbu apwile mu Mbetaniya, mu zuwo lia Semone mukwa mbumba, shimbu atwamine ku mesa, pwo wejile ni kasaji ka yitumbo ya vumba lipema ya ndando yikalu chikolo; iye washihile kasaji, wayitehwine ha mutwe wenyi.

⁴ Kwapwile amwe waze evwile kupiha mu mbunge jo, ngwo, Umbulungunya uno wa yitumbo waka?

⁵ Mumu mahasa kulanjisa yitumbo yino ha ndando yahiana kulakaji atatu a mbongo, akajihane kuli yiswale, chocho alinyenyetene hali iye.

⁶ Alioze Yesu wambile ngwenyi, Mwechenu, kuchi te nunamupikalisa? Halinga chitanga chipema hali yami.

⁷ Mumu yiswale nuli no hamwe ni yenu matangwa eswe, heswaho munuzanga kwalinga yipema munuhasa: alioze yami, kunushi ni yami matangwa eswe.

⁸ Halinga chize wahasa; hawayisa mujimba wami ni yitumbo shimbu kanda, ha kufunda.

⁹ Pundu ngunambe kuli yenu ngwami, Kweswako mambujola sango lino lipema hashi heswe, chize nawa yono pwo halinga kumakachihanjika hanga akamwiwuluke.

¹⁰ Yundase, Ka-Keriote, umwe wa kuli kumi ni aali, wayile kuli asasendote akwa lutwe, hanga akamukunjike kuli ayo.

¹¹ O muze achivwile, awahililile, alilakenyene kumwaha mbongo. Iye wafupile ngwe chize mahasa kumukunjika ha mwaka upema.

¹² Ha tangwa litangu lia mbolo yize kuyishi futunwiso, muze ashihile chitapo cha Chizomboka, tumbaji twenyi yamba kuli iye ngwo, Kulihi unazange tukalulike hanga ukalie Chizomboka?

¹³ Iye yatuma aali a kuli tumbaji twenyi, yamba kuli ayo ngwenyi, Yénu ku limbo, mba lunga makatakana ni yenu kanambata sapa ya meya: nukamukaule;

¹⁴ mweswamo manjila, nukambe kuli mwenya zuwo ngwenu, Longeshi kanambe ngwenyi, Chilihi chipatulo chami cha ngeji, hanga ngukalilemo Chizomboka hamwe ni tumbaji twami?

¹⁵ Iye kumakanulweza chipatulo cha kwilu, yuma yeswe ya kwala ni ya kululika, muze mwene nukatululikile.

¹⁶ Mba tumbaji twenyi ayile, anjilile mu limbo, awanyine chizechene ngwe ambile kuli ayo: mba alulikile Chizomboka.

¹⁷ Muze hapwile chingoloshi, yeza hamwe ni kumi ni aali.

¹⁸ Shimbu atwamine ku mesa nikulia, Yesu wambile ngwenyi, Pundu ngunambe kuli yenu ngwami, Umwe wa kuli yenu kumakangukunjika, yoze unali hamwe ni yami.

¹⁹ O aputukile kwivwa chinyengo, nikwamba kuli iye, umwe ni umwe ngwo, Yami nyi? Ni mukwo ngwenyi, Yami nyi?

²⁰ Alioze waakumbulwile, ngwenyi, Umwe wa kuli kumi ni aali, yoze unatate hamwe ni yami mu chenga.

²¹ Mumu mwe Mwana Mutu maya chamwenemwene ngwe chinasonewa ha kutwala kuli iye; alioze lamba kuli yoze mutu makunjika mwe Mwana Mutu! hapwa hali yoze mutu kachi kasemukineko.

²² Shimbu machilia, Yesu wanjile mbolo, ni muze te hawahisa, wayipalwile, waaheleyo, nikwamba ngwenyi, Wenu, nulie: yino mujimba wami.

²³ Iye wanjile musenge, ni muze te hasakwila, waahelewo: no eswe anwine.

²⁴ Iye wambile kuli ayo ngwenyi, Uno manyinga jami a usendo waha, waze anatehuka mumu hali anji.

²⁵ Pundu ngunambe kuli yenu ngwami, Chichi kanwa nawa nichimwe ku mihuko ya vindera ndo ku tangwa lize muze munguyinwa chaha mu wanangana wa Zambi.

²⁶ Muze te hemba mwaso, atuhukile mukuya ku mulundu wa Olevwe.

²⁷ Yesu yamba kuli ayo ngwenyi, Yenu eswe kumunukatalinga mumu hali yami: mumu chinasonewa ngwo, Mungukalamba kafunga, mapanga kumakamwangana.

²⁸ Alioze muze te hanguhindwisa, mungukanutetekela ku Ngalileya.

²⁹ Alioze Petulu wambile kuli iye ngwenyi, Chipwe kachi eswe matalinga, hindu yami ka.

³⁰ Yesu yamba kuli iye ngwenyi, Pundu ngunambe kuli yena ngwami, Yena, musono, te ufuku uno, shimbu ndemba kanda achitambika kaali, kumukalikala yami katatu.

³¹ Alioze wahanjikile nikulihalula kuhiana chikolo ngwenyi, Kachi changutamba kufwa hamwe ni yena, hindu chichi kalikala yena nichimwe. Chizechene ambile o eswe nawa.

³² O yeza kuma kuze jina liako, Ngetesemane: iye yamba kuli tumbaji twenyi ngwenyi, Twamenu hano, shimbu yami mungulemba.

³³ Iye yatwala hamwe nenyi, Petulu, ni Tiangu, ni Yoano. Waputukile kulishimwoka, ni kwivwa chikolo kulema mu mbunge.

³⁴ Iye yamba kuli ayo ngwenyi, Mbunge yami yinevu chikolo chinyengo ndo ku kufwa: salenu kuno, nulé.

³⁵ Iye wasosolokele kulutwe hakepe, wafulamanyine hashi, walembele hanga ola yize yikatuke kuli iye kachi muchihasa kupwa.

³⁶ Iye wambile ngwenyi, Ta-ta, Tata, yena unahase yuma yeswe; Chiza kama musenge uno kuli yami: hindu kanda chikapwa chize ngunapale yami, alioze chize yena unapale.

³⁷ Iye yeza, yaawana mu tulo, yamba kuli Petulu ngwenyi, Semone, uli mu tulo, nyi? Kwahashile kulá ola yimuwika, nyi?

³⁸ Lenu, lembenu, hanga kunuchi kanjila mu cheseko. Spiritu chamwenemwene yinalulika, alioze musunya ulelu.

³⁹ Cheka nawa wayile, walembele nikwamba maliji amuwika.

⁴⁰ Cheka nawa wahilukile, waawanyine mu tulo, mumu meso jo alemene; o kanyingikine chize mamukumbulula.

⁴¹ Iye yeza chisuho chamuchitatu, yamba kuli ayo ngwenyi, Fungunukenu haliapwila, nuhwime: kunahu; ola hiyeza; talenu, makunjika mwe Mwana Mutu ku moko ja yivulumunyi.

⁴² Tukatukenu, tuyenu; talenu, yoze mangukunjika hakundama.

⁴³ Haze hene, shimbu machihanjika, Yundase yeza, umwe wa kuli kumi ni aali, ni hamwe nenyi mbunga yinene ni tutana ni mitondo, a kuli asasendote akwa lutwe, ni a kuli akwa kusonyeka ni makulwana.

⁴⁴ Achi, yoze wamukunjikile, waahele kulu chilayi, ngwenyi, Yoze mungumumbeja mwenawo; mukwatenu, numutwale kanawa.

⁴⁵ Muze te heza, haze hene wakundamine kuli iye, yamba ngwenyi, Longeshi; wamumbejele chikolo.

⁴⁶ O amukwachile.

⁴⁷ Alioze umwe wa kuli waze amanyineko, watomwene katana kenyi, walambile ndungo ya sasendote mukwa lutwe, wamutetele twitwi lienyi.

⁴⁸ Yesu waakumbulwile ngwenyi, Nunejila ngwe hali muhuza ni tutana ni mitondo mukungukwata, nyi?

⁴⁹ Napwile tangwa ha tangwa hamwe ni yenu nikulongesa mu tembele, hindu kunwangukwachile: alioze yisoneko yikamanunuke.

⁵⁰ Eswe amuhichikile, akachine.

⁵¹ Mba umwe mukweze wamukawile kanazala hina lia linyu wika ku mujimba wenyi: no yamukwata;

⁵² alioze wahichikile hina lia linyu, wachinyine uselesele.

⁵³ O atwalile Yesu kuli sasendote mukwa lutwe. Yakungama kuli iye asasendote eswe akwa lutwe ni makulwana ni akwa kusonyeka.

⁵⁴ Petulu wamukawile kanonajila ndo muchima lia yize ya sasendote mukwa lutwe; iye Watwamine hamwe ni tupita, akote kahia.

⁵⁵ Asasendote akwa lutwe ni akwa kuyula eswe afupile Shindakenyo hali Yesu akamushihe; alioze kayiwanyineko.

⁵⁶ Mumu anji amushindakenyene mahuza, alioze Shindakenyo yo kuyalitele.

⁵⁷ Mba kwakatukile amwe atu, aze amushindakenyene mahuza ngwo,

⁵⁸ Twamuvwile ngwenyi, Mungukonwona tembele yino ya kutunga ni moko, ni kulutwe lia matangwa atatu, mungukufunga yikwo yize kuyishi kulungiwa ni moko.

⁵⁹ Chipwe chocho Shindakenyo yo kuyalitele.

⁶⁰ Sasendote mukwa lutwe wakatukile mukachi ka eswe, wahulile Yesu ngwenyi, Kuchi kukumbulula nichimwe, nyi? Kuchi wano anakushindakenya?

⁶¹ Alioze wakolele kulungunga kwenyi, kakumbulwile nichimwe. Cheka nawa sasendote mukwa lutwe wamuhulile, ngwenyi, Mwe Kristu yena, mwe Mwana wa Mukwa kufumana nyi?

⁶² Yesu wambile ngwenyi, Yami nguli: kumunukamona mwe Mwana Mutu kanatwama ku chindume cha tachi, kaneza ni malelwa a mwilu.

⁶³ Sasendote mukwa lutwe wasonyene chikuto chenyi. Yamba ngwenyi, Kuchi tunafupu nawa yela?

⁶⁴ Hinwevwa kushililika Zambi, chika nunanyongo? O eswe amuhishile ngwo, Kanatela kufwa.

⁶⁵ Mba amwe aputukile kumufwila mate, nikutuka meso jenyi, nikumumbufula, nikwamba kuli iye ngwo, Profeteza: ni tupita amulambile mbangala.

⁶⁶ Shimbu Petulu apwile mushi mu yize, umwe wa kuli ana-mapwo akwa milimo ya sasendote mukwa lutwe yeza;

⁶⁷ iye ha kumona Petulu kanoto kahia, wamutalile ngwenyi, Yena nawa wapwanga hamwe ni Yesu, Ka-Nazare.

⁶⁸ Alioze walikalile ngwenyi, Chanyingikine, chipwe kuchangulumbunukine chize unambe. Iye watuhukile mushi lia senge; ni ndemba watambikile.

⁶⁹ Mwana-pwo wamumwene, waputukile kwamba Kuli waze amanyineko ngwenyi, Yono umwe wa kuli ayo.

⁷⁰ Iye cheka nawa walikalilecho. Kulutwe lia shimbu likepe cheka nawa waze amanyineko ambile kuli Petulu ngwo, Chamwenemwene yena uli umwe wa kuli ayo; mumu uli Ka-Ngalileya.

⁷¹ Iye waputukile kulishinga ni kushindangana ngwenyi, Chanyingikine yono mutu nunambe.

⁷² Chisuho chamuchiali ndemba watambikile. Petulu wewulukile liji, ngwe amwambile Yesu ngwenyi, Shimbu ndemba kanda achitambika kaali, kumukalikala yami katatu. Muze achinyongene, Walilile.