Marku 13 - MUKANDA USANDU WA ZAMBI 1975

¹ Shimbu machituhuka mu tembele, umwe wa kuli tumbaji twenyi yamba kuli iye ngwenyi, Longeshi, tala mawe apwa haha! ni mazuwo apwa haha!

² Yesu wambile kuli iye ngwenyi, Unamono mazuwo ano anene? Kechi kahichika liwe nilimwe ha liwe likwo, lize kechi kalipuzula.

³ Mba shimbu atwamine ha mulundu wa Olevwe, hatalanganyi ni tembele, Petulu ni Tiangu ni Yoano ni Andeleu amuhulile ukawo ngwo,

⁴ Twambulwile kama, mwiji muka yino yuma muyikapwa? Chilayi cha kumanunuka cha yino yuma kuchi muchipwa?

⁵ Yesu waputukile kwamba kuli ayo ngwenyi, Kanyamenu ngwami, Niumwe kanda akanupiangula.

⁶ Mumu anji kumakeza mu jina liami, nikwamba ngwo, Mwe Kristu yami, makapiangula anji.

⁷ Alioze muze munwivwa ha jita ni ndundumwino ya jita, kanda nukasungalala; mumu chatamba yino yuma yeswe kupwa; alioze songo kanda lichipwa.

⁸ Mumu akwa vungu limwe kumakakatukila akwa vungu likwo, akwa wanangana umwe kumakakatukila akwa wanangana ukwo; kumukukapwa minyiko kweka ni kweka; kumukukapwa tupunga ni lamba: yino yuma we uputukilo wa yikola.

⁹ Alioze kanyamenu kuli yenwene: mumu kumakanukunjika kuli akwa kuyula; ni mu masunangonga kumakanulamba; ni kumeso ja manguvulu ni mianangana kumunukamana mumu hali yami, mukupwa Shindakenyo kuli ayo.

¹⁰ Lie sango lipema chatamba kuliambujola hatangu ku mavungu eswe.

¹¹ Alioze muze manutwala mukunukunjika kanda nukalipikala shimbu kanda ha kutwala ku chize munukamba, chipwe kanda nukachipukuna; alioze cheswacho makanwaha ha ola yize, che chize nukachihanjike; mumu hi yenu ko nwakuhanjika, alioze Spiritu Musandu.

¹² Mukulwana kumakakunjika mwanakwo ku kufwa, tato makakunjika mwanenyi; ana kumakakatukila yisemi, makaashihisa.

¹³ Kumakanuvwila kole kuli eswe mumu ha jina liami: alioze yoze manyongonona ndo ku songo, kumakamulamwina.

¹⁴ Alioze muze munumona chizelwokeso cha kwenyeka chinamana kuze kuchatambile kumana (yoze matanga, akase chinyingi), hohene waze mapwa mu Yundeya, akachinyine ku milundu:

¹⁵ yoze mapwa helu lia zuwo, kanda akasunuka hashi, chipwe kanda akanjila mukuchiza chuma chimwe ku zuwo lienyi.

¹⁶ Yoze mapwa ku minda, kanda akahiluka mukwanda hina lienyi.

¹⁷ Alioze lamba kuli waze mapwa ni ufumba ni kuli waze mamwisa ana ha matangwa aze!

¹⁸ Chikwo, lembenu hanga kuchina chenu kanda chikapwa kama ha mwaka wa chishika.

¹⁹ Mumu ha matangwa aze kumukukapwa luyinda, yoze kukwapwile umwe wa kulifwa nenyi chize ku uputukilo wa kutanga chize atangile Zambi ndo haliapwila, mba kechi kapwa nawa.

²⁰ Nyi kachi Mwene katepulwile matangwa aze kachi mutu niumwe malilamwina; alioze mumu hali waze hanaatongola, waze hanaatongola iye, watepulwile matangwa aze.

²¹ Hohene kachi umwe mamba kuli yenu ngwenyi, Talenu, kuno kwali mwe Kristu! hanji ngwo, Talenu, kuze ali! kanda nukachifuliela:

²² mumu akristu a kwonga ni aprofeta a kwonga kumakeza, makalweza yilayi ni yipekesa mukupiangula chipwe waze hanaatongola, kachi maahasa.

²³ Alioze yenu, kanyamenu: hingunanwambulwila yuma yeswe shimbu kanda.

²⁴ Alioze ha matangwa aze, kulutwe lia luyinda yoze, tangwa kumulikalá, ni kakweji kechi katwa mieji.

²⁵ Ni matongonoshi a mwilu kumakaholoka, ni tachi jize jili mu malilu kumujikanyika.

²⁶ Hohene makamona mwe Mwana Mutu kaneza mu malelwa hamwe ni tachi jinene ni uhenya.

²⁷ Hohene makatuma angelo jenyi, akakungulule waze hanaatongola iye, ku fuji jiwana, ku kusula songo lia hashi ndo ku kusula songo lia lilu.

²⁸ Achi, lilongesenu chishima ku mukuyu: muze te mutango wawo hiwovula, muusokoloka mafwo, mununyingika lwiza hapwa hakamwihi.

²⁹ Chocho nawa yenu muze munumona yino yuma, nyingikenu iye hakamwihi ali, te ku vikolo.

³⁰ Pundu ngunambe kuli yenu ngwami, Chisemuko chino kuchichi kahwa nichimwe ndo yino yuma yeswe muyiza kupwa.

³¹ Lilu ni hashi kumuyikahwa, alioze maliji jami kechi kahwa nichimwe.

³² Alioze ha kutwala ku tangwa lize ni ola yize kanyingikine niumwe, chipwe angelo a mwilu, chipwe mwe Mwana ka, shina mwe Tata,

³³ kanyamenu, lawokenu, lembenu: mumu kunwanyingikine muze mwaka muupwa.

³⁴ Chinapu ngwe mutu kanayi mu wenyi ku chifuchi chikwo, mahichika zuwo lienyi, mahana chiyulo kuli ndungo jenyi, kuli mweswe milimo yenyi, mamba mukwa kufunga pito, akalé.

³⁵ Lenu kashika: mumu kunwanyingikine muze mwenya zuwo meza, shina chingoloshi, shina ha muchima ufuku, shina ha kutambika ndemba, nyi shina chimenemene:

³⁶ kuchina, susumuku heza; manuwana mu tulo.

³⁷ Alioze chize ngunambe kuli yenu, ngunambe kuli eswe ngwami, Lenu.