Marku 12 - MUKANDA USANDU WA ZAMBI 1975

¹ Iye waputukile kuhanjika kuli ayo ni yishima ngwenyi, Mutu watumbile munda wa uva, waujingulwile ni chipaka, watalile wina wa ukamino, watungile kaposhi, waukunjikile kuli njimi, mba wayile ku chifuchi chikwo.

² Ha mwaka wa kuhela, watumine ndungo kuli njimi, hanga akatambule kuli njimi mihuko yimwe ya munda.

³ O yamukwata, yamulamba, yamukatwisa mokomoko.

⁴ Cheka nawa watumine kuli ayo ndungo mukwo, no amutwile mbandu ha mutwe, nikumusaula.

⁵ Iye watumine mukwo; o amushihile: ni anji akwo; nikulamba amwe, nikushiha akwo.

⁶ Mba achili ni mukwo umuwika, mwanenyi yoze amuzangile; wamutumine ha kusula kuli ayo ngwenyi, Makalemesa mwanami.

⁷ Alioze waze njimi aliambile hakachi ko ngwo, Yono mwe swana; tatuyenu, tumushihe, ni chihinga muchikapwa nichetu.

⁸ Mba amukwachile, amushihile, amumbilile haze lia munda.

⁹ Kashika mwenya munda kuchi malinga? Kumakeza akonwone njimi, makahana munda kuli akwo.

¹⁰ Kunwatangile chipwe chisoneko chino ngwo, Liwe lize alitunyine tangi, Kuliapwa liwe lia helu lia mbango;

¹¹ Chino chuma cha kuli Mwene, chikomokeso kumeso jetu.

¹² O afupile kumukwata; alioze evwile woma wa mbunga; mumu anyingikine wahanjikile chishima cha kwahisa: kashika yamuhichika, yakatuka.

¹³ O atumine kuli iye amwe a kuli A-Fwariseu ni a kuli A-Heronde, hanga akamutete ha kuhanjika chenyi.

¹⁴ O muze ahetele, yamba kuli iye ngwo, Longeshi, tunanyingika yena uli wamwenemwene, kushi kuvwila woma niumwe; mumu kushi ni katonde kuli atu, alioze kuwakulongesa jila ya Zambi ni umwenemwene, ngwetu, Muchilita ni shimbi shina kuhana lijimu kuli Sesare, nyi? Shina ka?

¹⁵ Shina mutuhana, nyi? Shina kutuchi kuhana? Alioze iye se kananyingika ulembekese wo, wambile kuli ayo ngwenyi, Kuchi te nunangweseka? Ngunehene lumbongo, ngumutale.

¹⁶ O amuneheneneye. Mba yamba kuli ayo ngwenyi, Chizulie chino ni chisoneko chino chaya? O yamba kuli iye ngwo, Cha Sesare.

¹⁷ Yesu wambile kuli ayo ngwenyi, Hanenu kuli Sesare yuma ya Sesare, ni kuli Zambi yuma ya Zambi. O amukomokene chikolo.

¹⁸ Ni A-Satuseu yeza kuli iye, waze akwamba ngwo, Uhindukilo wakuhi niumwe; o amuhulile ngwo,

¹⁹ Longeshi, Mose wasonekene kuli yetu ngwenyi, Kachi yayo ya umwe mafwa nikuhichika mukwo-pwo, nyi keshi kuhichika mwana, mwanakwo akambate mukwo-pwo, akasangule ana kuli yayo.

²⁰ Achi, kwapwile asongo-ni-atu shimbiali: mutangu wambachile pwo, iye ha kufwa kahichikile mwana.

²¹ Ni wamuchiali wamumbachile, neye wafwile, kahichikile mwana; ni wamuchitatu chizechene:

²² ni shimbiali eswe amumbachile, kahichikile mwana. Ha kusula pwo nawa wafwile.

²³ Kashika ha uhindukilo, pwo liaya makapwa hakachi ko? Mumu e shimbiali apwile nenyi ngwe mukwo-pwo.

²⁴ Yesu wambile kuli ayo ngwenyi, Kunwapiangukile ha chikuma chino, nyi? Te kunwanyingikine yisoneko, chipwe tachi ja Zambi.

²⁵ Mumu muze mahinduka hakachi ka afu, keshi kumbata, chipwe keshi kuhangisa malo, alioze kanapu ngwe angelo mwilu.

²⁶ Alioze ha kutwala kuli afu ha uhindukilo wo, kunwatangile mu mukanda wa Mose, nyi? Mu chihanda cha kutwala ku chiputa, ngwe chize Zambi ahanjikile kuli iye ngwenyi, Yami nguli Zambi ya Apalahama, ni Zambi ya Izake, ni Zambi ya Yakomba?

²⁷ Iye hi Zambi ya afu ko, alioze ya a mwono; yenu kashika nunapianguka chikolo.

²⁸ Mba umwe wa kuli akwa kusonyeka wejile; waavwile shimbu alihulile, iye ha kunyingika ngwe waakumbulwile kanawa, wamuhulile ngwenyi, Liji litangu lia shimbi lika?

²⁹ Yesu wamukumbulwile ngwenyi, Lie liji litangu ngwo, Ivwenu, yenu A-Izalele; Mwene Zambi yetu iye umuwika:

³⁰ ukazange Mwene Zambi ye ni mbunge ye yeswe, ni mwono we weswe, ni kunyonga che cheswe, ni ngolo je jeswe. Lino lie liji litangu lia shimbi.

³¹ Ni liamuchiali kuliakulifwa nalio ngwo, Ukazange mwenyembo we ngwe yena mwene. Liji likwo lia shimbi liahiana wano liakuhi, nilimwe.

³² Mukwa kusonyeka wambile kuli iye ngwenyi, Chamwenemwene, Longeshi, hiwamba kanawa ngwe iye umuwika, ni mukwo wakuhi, niumwe shina iye.

³³ Mba kumuzanga ni mbunge yeswe, ni malinjekela eswe ni mwono weswe, ni ngolo jeswe, ni kuzanga mwenyembo wenyi ngwe iye mwene kuchahiana milambu yeswe ya kulumba ni yitapo yeswe.

³⁴ Muze Yesu amwene ngwe wakumbulwile ni mana, wambile kuli iye ngwenyi, Yena kushi kusuku ni wanangana wa Zambi. Ni kulutwe lia chize niumwe wahunukine kumuhula nawa nichimwe.

³⁵ Yesu wakumbulwile, wambile shimbu alongesele mu tembele ngwenyi, Ngwe kuchi akwa kusonyeka akwamba ngwo, Kristu iye mwana David?

³⁶ Mumu David mwene wambile muli Spiritu Musandu ngwenyi, Mwene wambile kuli Mwene wami ngwenyi, Twama ku kwoko liami lia chindume ndo mungusa akwa kole je chitwamo cha yiliato ye.

³⁷ David mwene kanamuvuluka ngwenyi, Mwene; ngwe kuchi mapwa mwanenyi? Mbunga ya atu amuvwile ni chiseke.

³⁸ Iye wambile kuli ayo mu longeso lienyi ngwenyi, Kanyamenu hali akwa kusonyeka waze akuzanga kwenda ni mahina a mukambo, akaameneke mu yitanda,

³⁹ kakuzanga yitwamo ya lutwe mu masunangonga, ni mihela ya lutwe ku yiteleka.

⁴⁰ Wano kakuumbula mazuwo ja twamishi a mapwo, ni ha ulembekese kakulemba shimbu linene: wano kumakatambula upatwilo Wahiana.

⁴¹ Yesu Watwamine hatalanganyi ni chikasa cha milambu, wamwene ngwe chize mbunga ambilile mbongo mu chikasa cha milambu, ni pichi anji ambililemo.

⁴² Ni twamishi wa pwo chiswale wejile, wambililemo tumbongo tukepe twaali twenatwo hamuwika twapwa sentavo.

⁴³ Watambikile kuli iye tumbaji twenyi, wambile kuli ayo ngwenyi, Pundu ngunambe kuli yenu ngwami, Yono twamishi chiswale kambilamo kuhiana waze eswe anambila mu chikasa cha milambu.

⁴⁴ Mumu o eswe kambilamo cha ku kulumbama cho; alioze iye cha ku kuhona chenyi kambilamo cheswe ali nacho, te yikumba yenyi yeswe.