Marku 11 - MUKANDA USANDU WA ZAMBI 1975

¹ Muze akundamine ku Yerusaleme, ku Mbetefweje ni Mbetaniya, ku mulundu wa Olevwe, yatuma aali a kuli tumbaji twenyi.

² Ngwenyi, Yénu ku chihunda chize chalitalangana ni yenu: ni haze hene ha kunjilamo, munukawana mwana-chimbulu wa kukasa, hali iye niumwe kanda achitwamaho nilimwe tangwa; nukamujitule, nukamunehe kuno.

³ Nyi kachi umwe mamba kuli yenu ngwenyi, Kuchi te nunalingi chino? Nukambe ngwenu, Mwene kanamufupu; kamunomuno mamutuma cheka nawa kuno.

⁴ O ayile, yawana mwana-chimbuld wa kukasa ku pito haze ku makano; yamujitula.

⁵ Mba amwe a kuli waze amanyineko, ambile kuli ayo ngwo, Kuchi nunalingi nikujituia mwana-chimbulu?

⁶ O ambile kuli ayo chizechene ngwe Yesu waambile kulu; mba aechele kuya.

⁷ O anehene mwana-chimbulu kuli Yesu, asele mahina jo hali iye; watwamine hali iye.

⁸ Anji álile mahina jo mu jila; ni akwo asembele mitango ku mitondo, nikuyiala mu jila.

⁹ Ni waze atetekelele, ni waze akawile, akololokele ngwo, Vulie! Kafumana yoze uneza mu jina lia Mwene!

¹⁰ Kuwafumana wanangana uze muwiza, wanangana wa kulwetu David: Vulie mwilu mwahiana!

¹¹ Iye ha kunjila mu Yerusaleme wayile ku tembele; muze te hakengesa ha yuma yeswe, se hapwile chingoloshi, watuhukile akaye ku Mbetaniya hamwe ni kumi ni aali.

¹² Ha tangwa likwo, muze te hatuhuka mu Mbetaniya, wevwile zala.

¹³ Iye ha kumona mukuyu kusuku ni mafwo, waheteleko, kachi mawanako kama chuma chimwe: ni muze aheteleko, kawanyine nichimwe shina mafwo wika; mumu mwaka wa makuyu kanda uchiheta.

¹⁴ Iye wakumbulwile, ngwenyi, Niumwe kanda akalia mihuko kuli yena nawa ndo ku miaka ya mutolo. Tumbaji twenyi achivwile.

¹⁵ O yaheta ku Yerusaleme: Yesu wanjilile mu tembele, waputukile kutuhwisa waze alanjishile, ni waze alanjile mu tembele, walimbwile mesa ja akwa kusumbakenya mbongo, ni yitwamo ya akwa kulanjisa tutele.

¹⁶ Katayijile umwe kumbata chikwachilo ndusu mu tembele.

¹⁷ Iye waalongesele, ngwenyi, Kuchasonewene, nyi? Ngwo, Kumakavuluka zuwo liami ngwo, Zuwo lia kulembela hali mavungu eswe? Alioze yenu hinunalipwisa chivwenge cha mihuza.

¹⁸ Asasendote akwa lutwe ni akwa kusonyeka achivwile, no afupile ngwe chize mahasa kumwonwona: mumu amuvwilile woma, mumu mbunga yeswe alishimwokene ha longeso lienyi.

¹⁹ Muze hapwile chingoloshi, watuhukile mu limbo.

²⁰ Shimbu machipalika ha chimenemene, amwene mukuyu hiwoma chau ni ku miji.

²¹ Petulu ha kwiwuluka chize ambile Yesu, yamba kuli iye ngwenyi, Longeshi, tala, mukuyu uze unakashinga, hiunomu chau.

²² Yesu, waakumbulwile ngwenyi, Pwenu ni Ufulielo kuli Zambi.

²³ Pundu ngunambe kuli yenu ngwami, Mweswawo mamba ku mulundu uno ngwenyi, Tutuluka, ulimbile mu kalunga-lwiji; nyi kechi kayambashana mu mbunge yenyi, alioze mafuliela chize mamba muchipwa; cheswacho mamba, kumuchikapwa kuli iye.

²⁴ Kashika ngunambe kuli yenu ngwami, Yuma yeswayo munwita ha kulemba, fulielenu ngwe nunayitambula, neyo kumuyikapwa kuli yenu.

²⁵ Ni muze munumana nikulemba, konekenenu akwenu kachi chuma chimwe numuli nacho umwe; hanga Tatenu nawa yoze uli mu malilu, akanukonekene milonga yenu.

²⁶ Alioze kachi yenu kunushi kukonekena akwenu, chipwe Tatenu yoze uli mu malilu kechi kanukonekena milonga yenu.

²⁷ O yaheta cheka nawa ku Yerusaleme. Shimbu machenda mu tembele, asasendote akwa lutwe, ni akwa kusonyeka, ni makulwana yeza kuli iye;

²⁸ o yamba kuli iye ngwo, Ni chiyulo chika wakulinga yino yuma? Iya wakuhele chiyulo chino cha kulinga yino yuma?

²⁹ Yesu wambile kuli ayo ngwenyi, Ni yami nawa mungunuhula chuma chimuwika, mba ngukumbululenu, ni yami mungunwambulwila chiyulo chize nakulinga nacho yino yuma.

³⁰ Ngwami, Upapachiso wa Yoano wakatukile mwilu, nyi? Shina kuli atu? Ngukumbululenu.

³¹ O alihangujolele hakachi ko ngwo, Kachi mutwamba ngwetu, Mwilu; iye mamba ngwenyi, Mba kuchi te kunwamufulielele?

³² Alioze kachi mutwamba ngwetu, Kuli atu, mumu te evwile woma wa atu: mumu eswe amwene Yoano profeta wamwenemwene.

³³ O akumbulwile kuli Yesu, ngwo, Kutwanyingikine. Yesu yamba kuli ayo ngwenyi, Chipwe ni yami nawa chishi kunwambulwila chiyulo chize nakulinga nacho yino yuma.