Marku 10 - MUKANDA USANDU WA ZAMBI 1975

¹ Iye wakatukile kuze, yaheta ku manjiza ja Yundeya ni kuze kanda lia Yordau: ni mbunga yakungama kuli iye cheka nawa; iye ngwe ndako yenyi waalongesele cheka nawa.

² A-Fwariseu ejile kuli iye, amuhulile, nikumweseka ngwo, Muchilita ni shimbi hali lunga kulakula mukwo-pwo, nyi?

³ Iye wakumbulwile ngwenyi, shimbi yika anuhele Mose?

⁴ O ambile ngwo, Mose watayijile kusoneka mukanda wa kulakula, akamutwale.

⁵ Alioze Yesu wambile kuli ayo ngwenyi, Ha kukala cha mbunge jenu wanusonekenene liji lino lia shimbi.

⁶ Alioze chize ku uputukilo wa kutanga cha Zambi, Zambi waatangile lunga ni pwo.

⁷ Mumu ha mukunda uno mutu akahichike tato ni naye, akalinunge ni mukwo-pwo;

⁸ ni e aali kumakapwa musunya umuwika: chocho hi aali nawa ko, alioze musunya umuwika.

⁹ Chize kashika hananungu Zambi, atu kanda akachihandununa.

¹⁰ Mu zuwo tumbaji twenyi amuhulile cheka nawa ha kutwala ku chikuma chino.

¹¹ Iye yamba kuli ayo ngwenyi, Mweswawo malakula mukwo-pwo akambate weka, mavulumuna pwo lienyi mutonga wa utanji:

¹² nyi kachi pwo malakula mukwo-lunga, akaye uto weka, malinga utanji.

¹³ O anehene kuli iye ana akepe, hanga akaasayike moko: ni tumbaji aakanjishile.

¹⁴ Alioze muze Yesu achimwene, evwile kupiha, wambile kuli ayo ngwenyi, Tayizenu ana akepe eze kuli yami; kanda nwakanjisa: mumu wanangana wa Zambi wa wano ene.

¹⁵ Pundu ngunambe kuli yenu ngwami, Mweswawo keshi kutambula wanangana wa Zambi ngwe mwana mukepe, kechi kanjilamo nichimwe.

¹⁶ Iye waasele mu kondo, waawahishile, nikusayika moko jenyi hali ayo.

¹⁷ Shimbu machituhuka mukuya mu jila, umwe wazombokele kuli iye, waliendelele kuli iye, nikumuhula ngwenyi, Longeshi mupema, kuchi mungulinga, hanga ngukahinge mwono wa mutolo?

¹⁸ Alioze Yesu wambile kuli iye ngwenyi, Kuchi te unanguvuluka ngwe, Mupema? Mupema wakuhi niumwe shina umuwika, iye Zambi.

¹⁹ Unanyingika maliji a shimbi ngwo, Kanda ushiha, Kanda ulinga utanji, Kanda wiya, Kanda ushindakenya mahuza, Kanda ulaka, Lemesa tatenu ni noko.

²⁰ Wambile kuli iye ngwenyi, Longeshi, yino yuma yeswe hingunayifungp chize ku ukweze wami.

²¹ Yesu, ha kumutala wamuzangile, wambile kuli iye ngwenyi, Chuma chimuwika unahono: yako, ulanjise yeswayo uli nayo, uhane kuli yiswale, mba Kumukapwa ni upite mwilu: wize, Ungukalile.

²² Alioze wavutukile ku meso ha liji lino, wakatukile ni chinyengo: mumu wapwile ni upite wunji.

²³ Mba Yesu wakengesele, wambile kuli tumbaji twenyi ngwenyi, Chikalu Chichize hali waze akwete upite kunjila mu wanangana wa Zambi.

²⁴ Tumbaji akomokene ha maliji jenyi. Alioze Yesu yakumbulula cheka nawa ngwenyi, Ana jami, chikalu Chichize hali waze akukolela ha upite, kunjila mu wanangana wa Zambi!

²⁵ Chashi hali kamelu kupalika ndusu mu liso lia ndongo, chikalu hali pichi kunjila mu wanangana wa Zambi.

²⁶ O alishimwokene kuhiana, nikuliamba hakachi ko ngwo, Iya kevwe mahasa kulilamwina?

²⁷ Yesu nikwatala yamba ngwenyi, Kuli atu kenu machisa, alioze hi kuli Zambi ko: mumu yuma yeswe yinahase kupwa kuli Zambi.

²⁸ Petulu waputukile kwamba kuli iye ngwenyi, Tala, yetu hitunahichika yeswe, hitunakukaula.

²⁹ Yesu wambile ngwenyi, Pundu ngunambe kuli yenu ngwami, Mweswe mahichika zuwo, hanji ayayo, hanji ana-akwo, hanji mapangi, hanji tato, hanji naye, hanji ana, hanji minda, mumu hali yami, ni ha sango lipema;

³⁰ kumakatambula kulakaji lia yisuho haliapwila ha mwaka uno, mazuwo, hanji ayayo, ni ana-akwo, ni mapangi, ni anaye, ni ana, ni minda, hamwe ni yihungumiona; ni ha mwaka uze muwizaho mwono wa mutolo.

³¹ Atangu anji kumakapwa akwa kusula; ni akwa kusula kumakapwa atangu.

³² Apwile mu jila ya kukanduka ku Yerusaleme; ni Yesu waatetekelele: o akomokene; ni waze akawile, evwile woma. Iye watwalile cheka nawa kumi ni aali hamwe nenyi, waputukile kwaambulwila yuma yize muyimuwana.

³³ Ngwenyi, tunakanduka ku Yerusaleme; kumakakunjika mwe Mwana Mutu kuli asasendote akwa lutwe ni akwa kusonyeka; o kumakamuhisa akafwe, kumakamukunjika kuli akwa mavungu:

³⁴ o kumakamukekuna, makamulamba ni shikote, makamufwila mate, makamushiha; mba kulutwe lia matangwa atatu, kumakahinduka.

³⁵ Ana ja Zembendeu, Tiangu ni Yoano, yakundama kuli iye, ngwo, Longeshi, tunazange, cheswacho mutukwitacho ukatulingile.

³⁶ Iye wambile kuli ayo ngwenyi, Kuchi nunazange ngukanulingile?

³⁷ O ambile kuli iye ngwo, Tutayize kama, tukatwame, umwe ku chindume che, ni mukwo ku chimeso che mu uhenya we.

³⁸ Yesu wambile kuli ayo ngwenyi, Kunwanyingikine chize nunechi. Munuhasa kunwa musenge uze mungunwa yami, nyi? Munuhasa kutambula upapachiso uze mangupapachisa nawo, nyi?

³⁹ O ambile kuli iye ngwo, Mutuhasa. Yesu wambile kuli ayo ngwenyi, Yenu, chamwenemwene, kumunukanwa musenge uze mungunwa yami; kumakanupapachisa ni upapachiso uze mangupapachisa nawo:

⁴⁰ alioze kutwama ku chindume chami hanji ku chimeso chami, hi nichami ko kuhana; alioze chili hali waze hanaalulikilacho.

⁴¹ Muze kumi achivwile, aputukile kwivwa kupiha hali Tiangu ni Yoano.

⁴² Yesu waatambikile kuli iye, yamba kuli ayo ngwenyi, Nunanyingika ngwe waze maalemesa kuyula helu lia akwa mavungu kakupwa ni wene hali ayo. Anene jo kakupwa ni chiyulo hali ayo.

⁴³ Alioze hi chocho ko hakachi kenu: mweswawo mazanga kupwa munene hakachi kenu, akapwe kavumbi kenu;

⁴⁴ mweswawo mazanga kupwa mutangu, akapwe ndungo ya eswe.

⁴⁵ Mumu mwe Mwana Mutu nawa kejileko akamuvumbike, alioze mukuvumbika, akahane mwono wenyi ndando ya ukule hali anji.

⁴⁶ Yaheta ku Yeriku: mba shimbu atuhukile mu Yeriku, hamwe ni tumbaji twenyi ni mbunga yinene, Mbatimeu, mwana Timeu, kapuputa, kanatwama ku sesa lia jila nikuunjila.

⁴⁷ Muze evwile ngwo, Yesu Ka-Nazare, waputukile kuteta, ngwenyi, Yesu, yena mwana David, nguvwile kama keke.

⁴⁸ Anji amukanjishile akahole kulungunga kwenyi, alioze watetele kuhiana chikolo ngwenyi, Yena, mwana David, nguvwile kama keke.

⁴⁹ Yesu wamanyine, wambile ngwenyi, Mutambikenu. No yatambika kapuputa, ngwo, Hamuka: katuka, kanakutambika.

⁵⁰ Iye nikumbila hina lienyi, wanyangumukine, wakundamine kuli Yesu.

⁵¹ Yesu wamukumbulwile ngwenyi, Kuchi unazange ngukulingile? Kapuputa wambile kuli iye ngwenyi, Longeshi yami, ngulaule ku meso.

⁵² Yesu wambile kuli iye ngwenyi, Yako kwe; Ufulielo we hiwakupwisa mungunu. Haze hene walawile ku meso, wamukawile mu jila.