Marku 1 - MUKANDA USANDU WA ZAMBI 1975

¹ Uputukilo wa sango lipema lia Yesu Kristu, mwe Mwana Zambi.

² Chizechene ngwe chinasonewa mu mulanda wa profeta Izaia ngwo, Mungutuma kanganda kami kulutwe lia meso je, Iye kumakalulika jila ye kulutwe lie;

³ Liji lia yoze wakukololoka mu puya, Ngwo, Lulikenu jila ya Mwene, Lulamisenu yikoka yenyi;

⁴ Yoano wejile, yoze wapapachishile mu puya, wambujolele upapachiso wa kulikonyeka chize chaneha ukonekeno wa milonga.

⁵ Kwatuhukile kuli iye akwa chifuchi cheswe cha Yundeya, ni waze eswe a ku Yerusaleme, iye waapapachishile mu lwiji Yordau, o nikushikisa milonga yo.

⁶ Yoano wazalile mazalo a wona wa kamelu, ni muya wa lambu kujingilika mu zalilo yenyi, walile makumbi ni wuchi wa mu musenge.

⁷ Iye wambujolele ngwenyi, Kumeza kunyima yami yoze wakangana kuhiana yami, yoze lusapo wa ku haku jenyi chatelele kuhetama ni kumujitula.

⁸ Yami chamwenemwene hinanupapachisa mu meya; alioze iye makanupapachisa muli Spiritu Musandu.

⁹ Ha matangwa aze, Yesu wakatukile ku Nazare, limbo lia mu Ngalileya, amupapachishile kuli Yoano mu Yordau.

¹⁰ Haze hene ha kututuka mu meya, wamwene malilu a kupula mukachi, ni Spiritu ngwe katele kanahulumuka hali iye.

¹¹ Mba liji liatuhukile mu malilu ngwo, Mwanami yena ngunakuzange chikolo, muli yena ngunawahilila.

¹² Haze hene Spiritu yamushinjika ku puya.

¹³ Iye wapwile mu puya makumi awana a matangwa, kanamweseka kuli Satana; wapwile hamwe ni ngongo; angelo amuvumbikile.

¹⁴ Achi, muze te hakunjika Yoano ku zuwo lia ususu, Yesu wejile ku Ngalileya, nikwambujola sango lipema lia wanangana wa Zambi.

¹⁵ Ngwenyi, Mwaka unamanunuka, ni wanangana wa Zambi hiunakundama: likonyekenu, nufuliele lie sango lipema.

¹⁶ Iye ha kusesesa Chitende cha Ngalileya, wamwene Semone ni mwanakwo Andeleu, kanatela wanda mu Chitende; mumu apwile akwa kutela yishi.

¹⁷ Yesu wambile kuli ayo ngwenyi, Ngukaulenu yami, mba mungukanupwisa akwa kutela atu.

¹⁸ Ni haze hene ahichikile manda jo, amukawile.

¹⁹ Iye ha kusenya kulutwe hakepe, wamwene Tiangu, mwana Zembendeu, ni mwanakwo Yoano, apwile mu ulungu nikunukunyona manda jo.

²⁰ Haze hene waatambikile; o ahichikile tato Zembendeu mu ulungu hamwe ni ngamba, ayile kunyima yenyi.

²¹ Ayile ku Kafwanaume, ni haze hene ha tangwa lia Sambata, wanjilile mu sunangonga akalongese.

²² O alishimwokene ha longeso lienyi: mumu waalongesele ngwe umwe ukwete chiyulo, hi ngwe akwa kusonyeka ko.

²³ Haze hene mwapwile mu sunangonga yo lunga ni Spiritu ya luchisa; iye wakololokele ngwenyi,

²⁴ Kuchi yetu ni yena, Yesu Ka-Nazare? Uneza mukutwonwona, nyi? Ngunakunyingika, mwe Musandu wa Zambi.

²⁵ Yesu wamukanjishile ngwenyi, Hola kulungunga kwe, utuhuke muli iye.

²⁶ Mba Spiritu ya luchisa, nikumutunyisa, nikukololoka ni liji linene, watuhukile muli iye.

²⁷ Eswe akomokene, nikulihula hakachi ko ngwo, Chino chika? Longeso lino liaha kuchi liapwa? Mumu ni chiyulo mamba chipwe maspiritu a luchisa, no mamwononokena.

²⁸ Haze hene lufuma wenyi wafumanyine kweswe ku chifuchi cheswe cha kujingilika Ngalileya.

²⁹ Haze hene, muze te hatuhuka mu sunangonga, anjilile mu zuwo lia Semone ni Andeleu, hamwe ni Tiangu ni Yoano.

³⁰ Achi naye-weno ya Semone wapombele ni kachiki, ni haze hene yamwambiliwilaye.

³¹ Iye wakundamine, wamukwachile ku kwoko, amuhindwise; ni kachiki wamukatukile, iye waavumbikile.

³² Ha chingoloshi, ha kunjila cha tangwa, anehene kuli iye waze eswe ayijile, ni akwa ndemoniu,

³³ Limbo lieswe akungulukile ku chikolo.

³⁴ Iye wawukile anji waze ayijile ni misongo yeka ni yeka, watuhwishile andemoniu anji, katayijile andemoniu kuhanjika, mumu amunyingikine.

³⁵ Ha chimenemene, shimbu kuchili milima, wahindukile, watuhukile, wayile kuma ku puya, walembeleleko.

³⁶ Semone ni waze apwile hamwe nenyi amukawile;

³⁷ o amuwanyine, yamba kuli iye ngwo, Eswe kanakufupu.

³⁸ Iye yamba kuli ayo ngwenyi, Tuyenu kweka ku yihunda ya kusulangana, hanga ngukambujoleko nawa; mumu chuma chino chene hingunejila.

³⁹ Iye wanjilile mu masunangonga jo mu Ngalileya mweswe, nikwambujola nikutuhwisa andemoniu.

⁴⁰ Mukwa mbumba yeza kuli iye, nikuliumba kuli iye, nikuliondela hashi, ngwenyi, Nyi mupala, muhasa kungupemesa.

⁴¹ Yesu nikumuvwila keke, wolwele kwoko lienyi, wamusele minwe, ngwenyi, Ngunapale; pwako mupema.

⁴² Ni haze hene mbumba yamukatukile, iye wapemene.

⁴³ Iye wamuhele chikolo koki, ni haze hene wamukatwishile.

⁴⁴ Ngwenyi, Kanda ukamba nichimwe kuli niumwe: alioze yako, ukalilweze kuli sasendote, ukalambule ha kupemesa che chize ambile Mose, chikapwe Shindakenyo kuli ayo.

⁴⁵ Alioze watuhukile, waputukile kuchambujola chikolo, nikufumanyisa che chuma, chocho Yesu kahashile kunjila nawa kumeso ja atu mu limbo, alioze wapwile haze mu puya: no apwile nikwizaza kuli iye ku malumbu eswe.