Malaki 1 - MUKANDA USANDU WA ZAMBI 1975

¹ Chikuma cha liji lia Yehova kuli A-Izalele mu kanwa lia Malakia.

² Yehova kanambe ngwenyi, Kunakuzanga. Alioze yenu nunambe ngwenu, Wafuzanga kuchi? Yehova kanambe ngwenyi, Esau kapwile yayo ya Yakomba nyi? Hindu kunazanga Yakomba

³ alioze Esau kangupihila. Hinenyeka chifuchi chenyi cha ku milundu ni kuhichika chihinga chenyi chikapwe cha mikuza a mu puya.

⁴ Nyi Endome mamba ngwenyi, Hanatupalwola alioze mututungulula chize hichapuzuka; Yehova-wa-Tujita mamba ngwenyi, Chipwe matunga, yami mungupuzula ndo maatongola ngwo, Chifuchi cha yingulungulu, atu aze Yehova watenuka no miaka yeswe.

⁵ Meso ja yenwene mamona chuma chino mba nanwamba ngwenu, Yehova munene haze lia njiza ja Izalele.

⁶ Mwana kakulemesa tato; ni kavumbi kakuvwila woma mwata wenyi. Nyi nguli tatenu ulemu wami ulihiwo? Nyi nguli mwata woma nwakunguvwila ulihiwo? Chocho kanambe Yehova-wa-Tujita kuli yenu asasendote nwakulelesa jina liami. Enu nunambe ngwenu, Kuchi twalelesa jina lie?

⁷ Ha kulambula kulia cha luchisa ha chilumbilo chami. Nwakwamba ngwenu, Kuchi twachichisa? Ha kunyonga ngwenu, Mutuhasa kulelesa mesa ya Yehova.

⁸ Ha kulambula yimuna afwa-meso, achi hi chipi ko? Ha kulambula waze apwa yitonji, ni akwa misongo, achi hi chipi ko? Hanenu milambu yino kuli nguvulu yenu. Mawaha ni yenu? Manuvwila vumbi? Chocho kanambe Yehova-wa-Tujita.

⁹ Esekenu kwita vumbi lia Zambi hanga alinge ni vumbi kuli yetu! Yehova-wa-Tujita kanambe ngwenyi, Nyi mutu mambata mu kwoko lienyi mulambu ngwe yino, te mapwa ni vumbi kuli umwe?

¹⁰ Nyi kachi kwali umwe yoze májila mapito, nulitwamine kuwika kahia mokomoko ha chilumbilo chami! Yehova-wa-Tujita kanambe ngwenyi, Chevwile kuwaha ni yenu; chichi kutambula mulambu ku moko-jenu.

¹¹ Mumu chize ku Chivumbuko ndo ku Chitokelo jina liami liafumana hakachi ka mavungu, ni kweswe kakwochela insensu jina liami nikuhana mulambu wa kulinanga, mumu jina liami liafumana hakachi ka mavungu. Chocho kanambe Yehova-wa-Tujita.

¹² Alioze yenu nwakulijilula ha kwamba ngwenu, Mesa ya Yehova hiyapwa ya luchisa, ni kulia chayo mutuhasa kuchilelesa.

¹³ Nwakwamba ngwenu, Ayi yikatalo yipwa haha. Mba nwakunyekununa. Chocho kanambe Yehova-wa-Tujita. Nwakuneha waze akwachika hanji yitonji, hanji akwa misongo; chenacho nwakuneha mulambu! Te munguchitambula ku kwoko lie? Chocho kanambe Yehova.

¹⁴ Akashingiwe mukwa kwonga auze kali ni kuji mu limba lienyi, mba mamulakenya ni shingo alioze malambula kuli Mwene chize Chinapiha. Mumu Yehova-wa-Tujita kanambe ngwenyi, Nguli mwanangana munene, ni jina liami kakulivwila woma hakachi ka mavungu.