Lungungu 5 - MUKANDA USANDU WA ZAMBI 1975

¹ Yehova, iwuluka chize hichatuwana; tala uchimone kusauka chetu.

² Chihinga chetu hachihana kuli yilambala; mazuwo jetu haahana kuli tundaka.

³ Hitwalumuka ana-shiwa, kutushi yisemi amama hapwa tuliwa.

⁴ Kakutufwetesa ha meya jetu a kunwa; twakulanda kunyi jetu.

⁵ Akwa kutuhanga, he ha makota jetu ali; jatuhwa, uhwimino wakuhi.

⁶ Hitwahana kwoko lietu kuli A-Engitu, ni kuli A-Asuria hanga tukalie mbolo.

⁷ Tulamba twetu avulumwine, ni musono keshiko; yetu tunatambula lamba lia uhenge wo.

⁸ Tupinji kanatuyulu ni yoze matupulula kuli ayo keshiko.

⁹ Kuwana kulia, ndo mutusa mwono wetu mu Utoji, ha mukunda wa katana mu puya.

¹⁰ Kowa lietu liasasaminya ngwe jiko, ni kusasaminya cha kapunga.

¹¹ Mapwo kakwapikapika mu Zaione ni ana-mapwo jetu nawa mu yihunda ya Yunda.

¹² Alemu kakwazezeleka ku moko jo; kalemesene nichimwe makulwana.

¹³ Akweze kanalingi ungamba wa kutwa; ana-malunga kakuzeketa ni yiteli yinene ya kunyi.

¹⁴ Makulwana hanehuka chikolo cha chihunda; akweze hanahichika miaso yo.

¹⁵ Uwahililo hiwapatuka mu mbunge jetu; kuhangana chetu hichalumuka kulinyenga.

¹⁶ Chipangula hichaholoka ku mutwe wetu. Lamba lietu mumu hitwavulumuna!

¹⁷ Ha chikuma chino mbunge jetu hijayiza; mumu ha yuma yino meso jetu halá,

¹⁸ mumu mulundu wa Zaione hiwapwa wa hululu; mikuza wika kanendanganyinaho.

¹⁹ Hindu yena Yehova kuwayula ndo ku miaka; ngunja ye kuyakola ndo ku yisemuko yeswe.

²⁰ Kuchi te wakutuvulama ku miaka yeswe? Kuchi te hiwatwehuka shimbu lipwa haha?

²¹ Tuhilwise kuli yena mwene Yehova tukahuzuluke! Pwisa matangwa jetu aha, ngwe apwile kunyima!

²² Nyi hanji watumbila liakulu? Utenu we kuli yetu Wahiana naye, nyi?