Lungungu 4 - MUKANDA USANDU WA ZAMBI 1975

¹ Oru yafuwalala Chichize; ye oru yipema hiyalumuka! Mawe alemu asandu anamwangana ku masongo ja matapalo eswe.

² Ana alemu a malunga a Zaione afwika oru yilemu, alioze kanatesa ni ndeho ja uma milimo ya moko ja tengi.

³ Chipwe mikuza kakuhana yele ni kwamwisa ana jo, ahoze mwana wa pwo atu jami hanalumuka chiswi ngwe yikungulu mu puya.

⁴ Limi ha mukwa kwamwa linalamata ku kanwa ni pwila. Ana kanawunjila kulia ahoze niumwe kaahelecho.

⁵ Waze alile yuma yiyema anafu mu matapalo; waze aalelele mu mahina ja ufungo kanapombo ha chichilila cha uto.

⁶ Mumu uhenge wa mwana wa pwo atu jami wahiana shili ya Sondome, yize ayinungwine susumuku ni kusaho kama kwoko ka.

⁷ Alemu jenyi apemene kuhiana neve atomene kuhiana yamwa. Mijimba ya tusongo twenyi yachilile kuhiana rubi kuwaha cho ngwe safwira.

⁸ Haliapwila kumeso jo kwali kuhiana mwelela; keshi kwanyingika ha matapalo; kowa lio hilialamata ku yifwaha hilioma ngwe mutondo.

⁹ Waze afwile ni katana muhapwa, waze afwile ni zala lamba amwene. O apokiekele, a kutuwa mumu ha kuhona mihuko ya ku mavu.

¹⁰ Moko ja mapwo akwa keke hanateleka ana jo ene; alumukine kulia cho ha kwonwona cha mwana wa pwo atu jami.

¹¹ Yehova watuswile ufwatulo wenyi, Wazukwile utenu wenyi usasu; wawikile kahia mu Zaione kaze kalalishile ndo ku fundamentu.

¹² Mianangana a hashi kafulielele chipwe waze atwama muno-muze, ngwo, Hanji mukwa kulimika hanji mukwa kole mahasa kunjila ku yikolo ya Yerusaleme.

¹³ Chino chapwile mumu ha milonga ya aprofeta jenyi, ni ha uhenge wa asasendote jenyi, waze amwangine hakachi ko manyinga ja akwa ululi.

¹⁴ Endanganyine ku matapalo nikupuputa, a kuchisa ni manyinga chocho niumwe wahashile kukwata ku mazalo jo.

¹⁵ Atu atambikile kuli ayo ngwo, Katukenu akwa luchisa! Katukenu! Katukenu! Kanda nungukwata! Chocho alumukine akwa kuchina, yendanganyi; atu ambile hakachi ka mavungu ngwo, Kechi katwama ni yetu nawa.

¹⁶ Yehova mwene haamwanga; kechi kaatala nawa. Kalemesene asasendote nichimwe; kalingile vumbi kuli makulwana.

¹⁷ Meso jatuhwa ni kutalatala, akwa kutukwasa waze kejile. Kutala twatalile vungu limwe lize kuliahashile kulamwina.

¹⁸ Malunga atukawile mwe mu ngano, chocho chipwe mu matapalo jetu kutwa-hashile kwenda. Songo lietu liakundamine; matangwa jetu ahwile mumu hitwaheta ku songo.

¹⁹ Akwa kutuhanga atambikile kuhiana mapupa mwilu. Yatuhanga ha milundu, yatujikinyina mu puya.

²⁰ Mwiku wa mu mazulu jetu, yoze wa kuwayisa ni maji kuli Yehova, hamukwata mu mawumbu jo, yoze te twambile ngwetu, Mututwama hakachi ka mavungu mu Chizulie chenyi.

²¹ Wahilila ni kulikwiza, ena mwana-pwo Endome watwama mu chifuchi cha Uze; alioze kuli yena nawa musenge uno muukaheta, ni yena mukazengewa ni kulizula uselesele.

²² Ena mwana-pwo Zaione kastigu ya uhenge we hiyahwa; kechi kukutwamisa nawa mu unjize. Alioze yena mwana-pwo Endome kumakakwaha kastigu, kumakafukula milonga ye.