Lungungu 3 - MUKANDA USANDU WA ZAMBI 1975

¹ Mwe mutu wa kumona lamba ku mbwechi ya utenu wenyi, yami.

² Hanguhanga, hangukoka mu milima yize kuyishi pangu nilimwe.

³ Pundu kakutalikisa kwoko lienyi kulimika ni yami kanji kanji tangwa lieswe nganganga.

⁴ Hawangamisa mujimba wami ni kowa liami, hamakuna yifwaha yami.

⁵ Hanguseleka ni kungulimba ni usasu ni huli.

⁶ Hangutwamisa mu milima ngwe waze hanafu miaka.

⁷ Hangukuchika chocho Chahashile kukatukako; hangukasa ni malenge alemu.

⁸ Chipwe ngunatambika ni kusanyika angukwase hindu kakuchina kulemba chami.

⁹ Hashichika majila jami ni mawe a kupula; hahengesa majila jami.

¹⁰ Kanapu kuli yami ngwe ursu yoze unajikinyina ngwe ndumba yoze unaswame.

¹¹ Wanguchijile mu majila jami ni kungupapulula, hangupwisa ukawami.

¹² Hanana uta wenyi, hangupwisa washilo wa mwivu wenyi.

¹³ Wanjishile mu mbunge yami mivu ya mu chindalo chenyi.

¹⁴ Kanangusehe kuli akwa mavungu eswe; hinalumuka chikuma cha miaso yo tangwa lieswe nganganga.

¹⁵ Hanguzalisa ni usasu hangukuchisa ni musase.

¹⁶ Hangwaha tumawe kunjakula ni mazo jami; hangutwamisa mu uto.

¹⁷ Hachiza sambukila mu mbunge yami; hinavulama uwahililo chize wapwa,

¹⁸ kashika nakwamba ngwami, Uhenya wami hiwaya chipwe kutalatala muli Yehova.

¹⁹ Iwuluka luyinda wami ni usasu wami, musase ni kasashisa.

²⁰ Mbunge yami kuyakuyiwuluka ni kuhomboka muchima liami.

²¹ Alioze chino nawa nakwiwuluka kashika nakutalatala ngwami.

²² Utu wa zango lia Yehova kuuchi kahwa; keke yenyi kuyichi kasula.

²³ Yakupwa yaha tangwa ha tangwa; uli wa jika liakulu.

²⁴ Mbunge yami kuyakwamba ngwo, Yehova iye chihanda chami kashika muli iye mungutalatala.

²⁵ Yehova iye mupema kuli waze akungutwaminyina kuli yoze wakumufupa.

²⁶ Chinapeme mutu akatwaminyine ulamwino wa Yehova nikulifwita ka.

²⁷ Chinapeme mutu akalitwike kanga ha ukweze wenyi.

²⁸ Akatwame ukawenyi nikuhola muze mamutwikayo;

²⁹ akase kanwa lienyi mu fufuta— hanji meza kutalatala;

³⁰ akahane tafu lienyi kuli mukwa kulamba. Akamuchoke liakulu.

³¹ Mumu Mwene kechi kambila mutu ndo ku miaka yeswe.

³² Chipwe mavwisa chinyengo, hindu mapwa ni keke nikulita ni kulumbama cha utu wenyi wa zango.

³³ Mumu kevwile kuwaha ha kulamba hanji kuvwisa chinyengo ana ja atu.

³⁴ Kuliachila hashi funge eswe a hano hashi;

³⁵ hanji kuchinda chize chinalite ni mutu kumeso ja mwe Chitunda;

³⁶ hanji kuhengesa chikuma cha mutu; yino yuma kuyapemenene Mwene.

³⁷ Iya hatumina chuma mba hichapwa, ndo Mwene wachifunjikile?

³⁸ Yipema ni yikalu kuyakatukile mu kanwa lia mwe Chitunda?

³⁹ Mutu ni mwono wenyi te chamutamba kulinyenyeta? Mutu tuhu, akasope ha kutwala ku kastigu ya milonga yenyi?

⁴⁰ Twesekenu majila jetu nikwahengula tukahiluke kuli Yehova!

⁴¹ Tuzundulenu mbunge jetu ni moko jetu kuli Zambi mwilu ngwetu,

⁴² Hitwavulumuna, hitwakolema, ni yena kwatukonekenene.

⁴³ Hiwalifuka ni utenu nikutuhanga nikumushiha ni keke yakuhi.

⁴⁴ Hiwalifuka ni lelwa hanga yilemba kuyichi kukuheta.

⁴⁵ Hiwatupwisa yiswaswa kanda yikongwakongwa hakachi ka mavungu.

⁴⁶ Akwa kole jetu eswe kakututukatuka.

⁴⁷ Mwongo ni mawumbu hiyatuwana ni kwenyeka ni kwonwona.

⁴⁸ Meso jami kanalili mihwiji ya masoji mumu mwana wa pwo atu jami hanamwonwona.

⁴⁹ Meso jami makaula ni kulitwamina ka, ni kuhwima ka,

⁵⁰ ndo Yehova mwilu matala hashi ni kumona.

⁵¹ Meso jami kakunguvwisa chikulikuli mumu ha chize hichawana ana-mapwo eswe a ku chihunda chami.

⁵² Hananguhange ngwe kajila kuli waze apwa akwa kole kuli yami chitela chakuhi.

⁵³ Angumbilile wa mwono mu wina ni kungulumbikila mawe.

⁵⁴ Meya afukile mutwe wami; nambile ngwami, Hinatoka.

⁵⁵ Ku mashima a wina natambikile ha jina lia yena Yehova.

⁵⁶ Wevwile kulemba chami ngwami, Kanda ujika matwi je ku muteto wami wa kwamba ngwami, Ungulamwine!

⁵⁷ Wakundamine muze nakutambikile; wambile ngwe, Kanda wivwa woma!

⁵⁸ Mwene, hiwakwata ku chikuma chami; hiwakula mwono wami.

⁵⁹ Yehova, hiwamona chipi chize angulingile; Ungupatwile chikuma chami.

⁶⁰ Hiwamona wuli wo weswe ni yuma yize yeswe angutakilile.

⁶¹ Yehova, hiwevwa kuchoka cho pi yize yeswe angutakilile.

⁶² Kuhanjika ni kunyonga cha akwa kungupinjisa kuyakulimika ni yami tangwa lieswe nganganga.

⁶³ Tala chize akutwama ni kukatuka; chikuma cha miaso yo yami.

⁶⁴ Yena Yehova muwafwetesa nikulita ni yitanga ya moko jo.

⁶⁵ Mukalisa mbunge jo; shingo lie mulikapwa hali ayo.

⁶⁶ Yena Yehova muwahanga ni utenu ni kwaonwona nikwajimuna kushi lia malilu je.