Lungungu 2 - MUKANDA USANDU WA ZAMBI 1975

¹ Mwene mu utenu wenyi hanafuku mwana-pwo Zaione ni lelwa. Uhenya wa Izalele hanauchiza mwilu, hanaumbila hashi. Ha tangwa lia utenu wenyi hanavulama chitwamo cha yiliato yenyi.

² Mwene hanonwona mazuwo eswe a Yakomba ni keke yakuhi. Mu ufwatulo wenyi hanapalwola yihunda yeswe ya tachi ya mwana-pwo Yunda. We wanangana ni akwa kuyulamo hanaanyase hashi ni kwasaula.

³ Mu utenu wenyi usasu hanapatula ndundo jeswe ja Izalele; kumeso ja akwa kole hanachiza kuli ayo kwoko lienyi lia chindume. Hanayila mu Yakomba ngwe kahia kakulekwoka ni kulalisa kweswe kwa kujingilika.

⁴ Hanana uta wenyi ngwe mukwa kole ni kwoko lienyi lia chindume lia kusa ngwe mukwa kulimika. Hanashihi kulengumuka cheswe cha meso jetu mu mbalaka ya mwana-pwo Zaione; hanazukula ufwatulo wenyi ngwe kahia.

⁵ Mwene hanalumuka ngwe mukwa kole, hanonwona Izalele. Hanonwona palasiu jamo; hanapuzula mbonge jamo; hanokesa kulishimwoka ni lungungu muli mwana-pwo Yunda.

⁶ Hanapuzula chisakila chenyi ngwe chimwe cha kutunga ku naka. Hanapwisa ngundu chihela chenyi cha yiwanyino ya kufunjika. Mu Zaione Yehova hanasulisa yiwanyino ya kufunjika ni masambata. Mu matoto jenyi asasu hanambila ni mwanangana ni sasendote.

⁷ Mwene hanalelesa chilumbilo chenyi, hanalikate muma mwenyi musandu. Hanakunjika kuli akwa kole yipanga-ya-mawe ya palasiu jenyi. Chizungozungo chapwile mu zuwo lia Yehova ngwe ha tangwa lia chiwanyino cha kufunjika.

⁸ Yehova wasele mbunge kupuzula chipanga-cha-mawe cha mwana-pwo Zaione. Wachifunjikile ni muhipu, kakokolwele kwoko lienyi ha kwonwona; wapwishile chipanga ni lusaso ya kulila mbimbi, yinalihongela hamuwika.

⁹ Yikolo yenyi hiyinanjila mu mavu; hanonwona njalo jako ni kujimakwona. Mwanangana ni alemu jenyi hanayi hakachi ka mavungu; shimbi kuyishiko, ni aprofeta jenyi katambwile usolwelo kuli Yehova.

¹⁰ Makulwana ja mwana-pwo Zaione hashi anatwama, kúlú; hanalikuwu mavu ha mitwe hanazala yikeleyi. Ana-mapwo a mu Yerusaleme hanahetamisa mitwe yo hashi.

¹¹ Meso jami hahwa ni kulila; mwono wami unalifwichi; mbunge yami yinapukumuka ni chikulikuli mumu hanonwona mwana wa pwo atu jami, mumu ana a kemba ni achila kanalezumuka mu matapalo ja chihunda.

¹² Kanatambika kuli anaye ngwo, Mbolo ni vinyu yilihiyo? Shimbu analezumuka ha matapalo ja chihunda ngwe malunga a kwasa, shimbu mwono wo unasulila mu makondo ja anaye.

¹³ Ena mwana-pwo Yerusaleme, Kuchi mungwamba hali yena? Ngukupwise ngwe kuchi? Ena mwana-pwo virgem Zaione. Ngukutese neka, hanga ngukuwumbikize? Mumu kulumbuka che chatoha ngwe kalunga-lwiji. Iya mahasa kukuhuzulula nawa?

¹⁴ Aprofeta je hakumwena usolwelo wa mahuza, wa kwonga. Kasolwele uhenge we akahilwise kuwaha che, alioze hakumwena yilayi ya mahuza ni ya kukupiangula.

¹⁵ Waze eswe akupajieka mu jila kakulenya ni koshi; kakusoza nikuhunga mitwe yo hali mwana-pwo Yerusaleme ngwo, Che chihunda chenacho achilukile ngwo, Mwe chileza wa pundu pundu, ni uwahililo wa hashi heswe?

¹⁶ Akwa kole je eswe kanakutuku; kanasozana, ni kulisumasuma ku mazo ngwo, Hitwamwonwona! Lie tangwa twatwaminyinyine lino, mba hitwapwa nalio, hitwalimona.

¹⁷ Yehova halinga chize wapalile, halinga chize watowezele. Chizechene ngwe wafunjikile kushi, chocho hapuzula ni keke yakuhi. Hapwisa mukwa kole ni uwahililo helu lia yena, hanangamisa ndundo ja akwa kulimika je.

¹⁸ Teta ni tachi kuli Mwene, yena mwana-pwo Zaione. Masoji akapukumuke ngwe muhwiji mwalwa ni ufuku! Kanda uhwima; kanda utayiza meso je kulitwamina.

¹⁹ Katuka, teta ha ufuku ha kuputuka tulayi! Zukula mbunge ye ngwe meya kumeso ja Mwene! Zundula moko je kuli iye ha mukunda wa ana je waze analezumuka ni zala ku songo lia tapalo lieswe.

²⁰ Yehova, tala ukamone! Neya walinga chuma chino? Te chinalite mapwo kulia ana jo ana aze haafunga ni vumbi lipwa haha? Hanji chinalite sasendote ni profeta akaashihe muma musandu wa Mwene?

²¹ Akweze ni makulwana kanapombo mu fufuta ya mu matapalo. Ana jami a mapwo ni akweze jami hanafu ni katana. Ha tangwa lia utenu we hiwaashihisa; Hiwaaliana ni keke yakuhi.

²² Walakenyene mwongo wami wa jita sali ni sali ngwe ku tangwa lia chiwanyino cha kufunjika, mba ha tangwa lia utenu wa Yehova niumwe wombokele, niumwe walisalile. Te waze nakangayikine, waze nalelele mukwa kole yami waonwene.