Lungungu 1 - MUKANDA USANDU WA ZAMBI 1975

¹ Chihunda chinatwama kulungunga, chize chapwile cha tò ni atu mama yami! Hichinalumuka ngwe tuliwa, chapwile chinene hakachi ka mavungu. Chapwile ni chiyulo hakachi ka yihunda hichalumuka kapinji!

² Kanalili chikolo ha ufuku, masoji kumeso jenyi. Hakachi ka akwa zango lienyi eswe kawanyine niumwe kumuwumbijeka. Masepa jenyi eswe halinga nenyi ni mafwefwe, hanalumuka akwa kole kuli iye.

³ Yunda hanayi ku unjize mumu ha luyinda ni undungo ukalu. Haliapwila kanatwama hakachi ka mavungu alioze kawanyine uhwimino; akwa kumuhanga hamukwata hakachi ka kulifwita chenyi.

⁴ Majila a kuya ku Zaione kanalinyenge mumu atu kejile ku yiwanyino ya kufunjika. Mapito jenyi keshi atu; asasendote jenyi kanatu mikuma; anenyi a mapwo kanapinji ni mwene kanamono lamba lisasu.

⁵ Akwa kulimika nenyi hanapu kulutwe; akwa kole jenyi kanawaha ha milimo yo, mumu Yehova hamuvwisa yikola, ha mukunda wa kulumbama cha milonga yenyi. Anenyi hanayi funge kumeso ja akwa kulimika.

⁶ Uhenya weswe hiwakatuka kuli mwana-pwo Zaione. Alemu jenyi hanalumuka ngwe tupaji, waze kawanyine kelo. Achinyine ni tachi jakuhi kumeso ja mukwa kwahanga.

⁷ Ha matangwa a luyinda wenyi ni usasu wenyi, Yerusaleme kanewuluka yuma yeswe yilemu apwile nayo chize ku shakulu. Muze atu jenyi alimbukile mu kwoko lia mukwa kulimika, kukwapwile niumwe kumukwasa. Mukwa kulimika wamusehele, ni kumulenya ha kulimbuka chenyi.

⁸ Yerusaleme wavulumwine chikolo kashika walichishile. Waze eswe amulemesene haliapwila kanamulelesa mumu hamona uselesele wenyi. Ewa iye mwene kanatu mikuma ni kufuka meso jenyi.

⁹ Luchisa wenyi wapwile ha mahina jenyi; kanyongene upatwilo wenyi, kashika kulimbuka chenyi chakola woma, keshi ni yoze mamuwumbijeka. Yehova! Tala kama luyinda wami, mumu mukwa kole yami hakumba.

¹⁰ Mukwa kole hazoza moko jenyi ha yuma yenyi yeswe yilemu; ewa, hamona mavungu kulokola muma mwenyi musandu; waze te yena waakanjishile kunjila mu chikungulwila.

¹¹ Atu jenyi eswe anatu mikuma shimbu machifupa mbolo; kakusumbakenya yuma yo yilemu ni kulia akahuzulule tachi jo. Tala Yehova, uchimone, mumu hinasauka.

¹² Enu eswe nwakupajieka, nichimwe kuli yenu nyi? Talenu numone nyi chimwe chinyengo chiliko cha kulifwa ni chinyengo chami chize chinanguwane cha kungwaha Yehova ha tangwa lia utenu wenyi usasu.

¹³ Kwilu watumine kahia; kakanjile ndusu mu yifwaha yami. Hatela wanda ha yiliato yami, hanguhilwisa kunyima, hanguhichika pwililili ni upekepeke tangwa lieswe nganganga.

¹⁴ Hakasa milonga yami ngwe kanga, ni kwoko lienyi hayijichika. Hayisa ha kota yami, hahongesa tachi jami. Mwene wangukunjikile kuli waze Chahashile kwakumba.

¹⁵ Mwene walelesele malunga jami eswe a ndundo hakachi kami. Wasanyikine chikungulwila cha kulimika ni yami akafwenye akweze jami. Mwene haliata mwe mwana-pwo virgem Yunda ngwe ukamino wa uva.

¹⁶ Yino yuma ngunalilila ni meso jami anasotwokela masoji; mumu mukwa kuwumbijeka kusuku ali ni yami yoze mahasa kuhuzulula hamu liami. Ana jami kanalezumuka, mumu mukwa kole hakumba.

¹⁷ Zaione kanazozo moko jenyi, alioze mukwa kumuwumbijeka wakuhi. Yehova hachitumina cha kulimika ni Yakomba hanga enyembo jenyi akanwe akwa kole jenyi. Yerusaleme hanalumuka chuma cha luchisa hakachi ko.

¹⁸ Yehova kanasambe, mumu nakolemene liji lienyi; alioze ivwenu enu mavungu eswe nukamone yikola yami. Anami a mapwo ni akweze jami hanayi funge.

¹⁹ Nasanyikine kuli waze anguzangile alioze angwongele. Asasendote jami ni makulwana jami akuwile mu chihunda, shimbu machifupa kulia kuhuzulula tachi jo.

²⁰ Yehova, tala, mumu nguli mu lamba, mwono wami unalifwichi, mbunge yami yinawondeka muchima liami mumu hinakukatukila chikolo. Ha matapalo katana kanafwisa atu mu zuwo mwapwa ngwe ufwe.

²¹ Ivwenu mikuma yami! Mukwa kunguwumbijeka wakuhi. Akwa kole jami eswe hanevu lamba liami, kanawahilila mumu hiwachilinga. Neha tangwa lize hiwambulula, o akapwe ngwe yami napwa musono.

²² Yitanga yo yeswe yipi yikeze kumeso je; linga no chize hiwalinga ni yami mumu ha milonga yami yeswe. Mumu mikuma yami yoka ni mbunge yami yinalezumuka.