Luka 9 - MUKANDA USANDU WA ZAMBI 1975

¹ Iye wakungulwile kumi ni aali, waahele tachi ni chiyulo helu lia andemoniu eswe, ni cha kuwuka misongo.

² Waatumine mukwambujola wanangana wa Zambi, ni kuhindwisa mieji.

³ Wambile kuli ayo ngwenyi, Kanda nukambata nichimwe ha wenyi wenu, chipwe mulumbu, chipwe chipakumuna, chipwe mbolo, chipwe mbongo, ka; chipwe kanda nukapwa ni mbinja jiali.

⁴ Mu zuwo Heswaho muvunjila, muze mwene nukatwame, muze mwene nukatuhukemo.

⁵ Waze eswe kechi kanutambula, muze munukatuka ku limbo lize, nukakukumwine fufuta ku yiliato yenu chikapwe Shindakenyo hali ayo.

⁶ O akatukile, apalikile ndusu mu yihunda, nikwambujola sango lipema, nikuwuka kweswe.

⁷ Achi, nguvulu Heronde wevwile ha yuma yize yeswe alingile, iye wakakashanyine chikolo, mumu achambile kuli amwe ngwo, Yoano hanahinduka hakachi ka afu;

⁸ kuli akwo ngwo, Eliya hanasoloka, akwo ngwo, Umwe wa kuli aprofeta a shakulu hanasoloka.

⁹ Mba Heronde wambile ngwenyi, Yoano hingunamutape, alioze yono iya ngunamwivu yuma yipwa haha? Iye wafupile kumumona.

¹⁰ Apostolo muze te hahiluka, amwambulwilile yuma yize yeswe alingile. Iye Waatwalile, wakatukile akaye ukawo ku puya ya ku limbo lize, jina lialio, Mbeteseta.

¹¹ Alioze mbunga ha kuchinyingika, amukawile. Iye waatambwile kanawa, wahanjikile kuli ayo ha kutwala ku wanangana wa Zambi, wawukile waze ayijile.

¹² Tangwa liaputukile kwendala; ni e kumi ni aali ejile kuli iye, ambile ngwo, Shikenu ni mbunga, aye ku yihunda ya kujingilika, ni ku minda, akapombe, akawane kulia; mumu muno tuli mu puya.

¹³ Iye wambile kuli ayo ngwenyi, Ahenu, alie. O ambile ngwo, Kutushi nacho, shina mbolo jitano ni yishi aali; shina mutuya tukalanjile wano atu eswe kulia.

¹⁴ Mumu kwapwile ngwe tununu atano a malunga. Iye wambile kuli tumbaji twenyi ngwenyi, Atwamisenu ngango, ngwe makumi atano, ngango ni ngango.

¹⁵ O alingile chocho, atwamishine eswe.

¹⁶ Iye wanjile mbolo jitano ni yishi aali, nikuhetula meso kwilu, wajiwahishile, wajipalwile, wajihanyine kuli tumbaji twenyi ajisele kumeso ja mbunga.

¹⁷ O alile ni eswe akuchile; mba anjile yize yasalileho ya kusambuka kuli ayo, ya yipalupalu, kumi ha yipakili ni yipakili yiali.

¹⁸ Shimbu machilemba ukawenyi, tumbaji twenyi apwile hamwe nenyi: waahulile ngwenyi, Kuchi mbunga akunguvuluka?

¹⁹ O amukumbulwile ngwo, Yoano Chipapachisa; ahoze akwo ngwo, Eliya; ni akwo ngwo, Umwe wa kuli aprofeta a shakulu hanahinduka.

²⁰ Iye ngwenyi, Yenu kuchi nwakunguvuluka? Petulu wamukumbulwile ngwenyi, Mwe Kristu wa Zambi.

²¹ Alioze waakanjishile, waambile kanda akaambulula chuma chino kuli niumwe.

²² Ngwenyi, Chatamba mwe Mwana Mutu kwivwa lamba linji, akalituneye kuli makulwana, ni asasendote akwa lutwe, ni akwa kusonyeka, akamushihe, ni ha tangwa liamuchitatu akahinduke.

²³ Iye wambile kuli eswe ngwenyi, Kachi umwe mazanga kungukaula, akalikale iye mwene, akazundule kulusu yenyi tangwa ha tangwa, akangukaule.

²⁴ Mumu mweswawo mazanga kulamwina mwono wenyi kumakautokesa; ahoze mweswawo matokesa mwono wenyi mumu hali yami, kumakaulamwina.

²⁵ Mumu kuchi mutu mafumbuka, kachi malipichisa hashi heswe, akalitokese mwene?

²⁶ Mumu mweswawo mevwa sonyi hali yami ni ha maliji jami, mwe Mwana Mutu kumakamuvwila sonyi, muze meza mu uhenya wenyi mwene, ni wa Tato, ni wa angelo asandu.

²⁷ Ahoze chamwenemwene ngunambe kuli yenu ngwami, Kwali amwe a kuli waze anamana kuno, kechi kufwa ndo mamona wanangana wa Zambi.

²⁸ Ni kulutwe ha maliji ano, ngwe matangwa nake, watwalile Petulu ni Yoano ni Tiangu, wakandukile ha mulundu mukulemba.

²⁹ Shimbu machilemba, meso jenyi alumukine, ni mahina jenyi alumukine atoma ni a kuhenyahenya.

³⁰ Kumanyi, malunga aali ahanjikile nenyi, Mose ni Eliya;

³¹ wano asotokele mu uhenya, ahanjikile ha kutwala ku kufwa chenyi chize mafwa ku Yerusaleme.

³² Ahoze Petulu, ni waze apwile hamwe nenyi, azembelele tulo, ni muze alawile pundu, amwene uhenya wenyi ni malunga aali waze amanyine hamwe nenyi.

³³ Mba shimbu machikatuka kuli iye, Petulu wambile kuli Yesu ngwenyi, Mwata, Chinapeme hali yetu kupwa kuno; tutungenu yisakila yitatu; chimwe hali yena, ni chikwo hali Mose, ni chikwo hali Eliya: se kanyingikine chize ambile.

³⁴ Shimbu machamba yino yuma, lelwa liejile, liaazulaminyine chizulie: o evwile woma shimbu anjilile mu lelwa.

³⁵ Ni liji liatuhukile mu lelwa ngwo, Yono mwe Mwanami, ngunamuzange, mwivwenu.

³⁶ Ni muze te liji hiliapalika, awanyine Yesu ukawenyi, o aholele, kalwezele niumwe ha matangwa aze yuma yize amwene.

³⁷ Ha tangwa likwo, muze te hapalumuka ku mulundu, mbunga yinene atakanyine nenyi.

³⁸ Kumanyi, lunga wa ku mbunga wakololokele ngwenyi, Longeshi, ngunaliumbu kuli yena, tala kuli mwanami wa lunga: mumu iye mwanami wa wika.

³⁹ Spiritu kakumukwata, susumuku matetwoka, mamutanyisa, nikututumuna fulufulu, chikalu kutusuka kuli iye, kakumufwita chikolo.

⁴⁰ Naliumba kuli tumbaji twe amutuhwise, o kahashile.

⁴¹ Yesu wakumbulwile, ngwenyi, Yenu! chisemuko kuchishi Ufulielo, chapiya, ndo mwiji muka mungupwa hamwe ni yenu, mungulihumikiza ni yenu? Neha mwané kuno.

⁴² Alioze shimbu te achili nikwiza, ndemoniu wamulimbwile, wamutunyishine chikolo. Yesu wakanjishile Spiritu ya luchisa, wahindwishile mwana-lunga, wamuhilwishile kuli tato.

⁴³ O eswe alishimwokene ha ulamba wa Zambi. Ni shimbu eswe akomokene ha yuma yize yeswe alingile, wambile kuli tumbaji twenyi ngwenyi,

⁴⁴ Maliji ano anjile mu matwi jenu; mumu kumakakunjika mwe Mwana Mutu mu moko ja atu.

⁴⁵ Alioze kanyingikine liji lino, liahengamine kuli ayo, chocho kahashile kuchimona, o evwile woma kumuhula ha liji lino.

⁴⁶ Kuhangulula chapwile hakachi ko, hali yoze mapwa munene wahiana hakachi ko.

⁴⁷ Muze Yesu amwene kulihangulula cha mbunge jo, wanjile mwana mukepe, wamutumbikile ku lumbu lienyi.

⁴⁸ Wambile kuli ayo ngwenyi, Mweswawo matambula yono mwana mukepe mu jina liami, mangutambula yami: ni mweswawo mangutambula yami, matambula yoze wangutumine: mumu yoze mukepe Wahiana eswe hakachi kenu, mwenawo munene.

⁴⁹ Yoano wakumbulwile ngwenyi, Mwata, twamwene umwe kanatuhwisa andemoniu mu jina lie; twamukanjishile, mumu keshi kukaula ni yetu.

⁵⁰ Yesu wambile kuli iye ngwenyi, Kanda nakamukanjisa; mumu yoze keshi kulimika ni yenu hamwe ni yenu ali.

⁵¹ Mba muze matangwa a kumutambula mwilu himamanunuka watalikishile meso jenyi ni tachi mukukanduka ku Yerusaleme.

⁵² Iye watumine tunganda kulutwe lia meso jenyi: o ayile, anjilile mu chihunda cha A-Samaria, hanga amululikile.

⁵³ O kamutambwileko, mumu meso jenyi atalikishile ku Yerusaleme.

⁵⁴ Muze tumbaji twenyi, Tiangu ni Yoano, achimwene, ambile ngwo, Mwene, unazange twambe kahia kahulumuke mwilu ni kwalesa ngwe alingile Eliya, nyi?

⁵⁵ Alioze watewulukile, waámbilile, ngwenyi, Kunwanyingikine a ku Spiritu yoze nuli,

⁵⁶ mumu mwe Mwana Mutu kejile mukwonwona mwono wa atu alioze mukuulamwina. O ayile ku chihunda chikwo.

⁵⁷ Shimbu anayi mu jila, umwe wambile kuli iye ngwenyi, Mwene, mungukukaula kweswako muoya.

⁵⁸ Yesu wambile kuli iye ngwenyi, Mikuza kali ni mena, ni tujila a mwilu ali ni yaswa; alioze mwe Mwana Mutu keshi haze ha kushachila mutwe wenyi.

⁵⁹ Iye wambile kuli mukwo ngwenyi, Ngukaule. Alioze wakumbulwile ngwenyi, Mwene, ngutayize kama nguhange kuya, ngufunde tata.

⁶⁰ Alioze Yesu wambile kuli iye ngwenyi, Afu afunde afu jo; alioze yako yena, ukambujole wanangana wa Zambi.

⁶¹ Mukwo nawa wambile ngwenyi, Mungukukaula, Mwene; alioze ngutayize kama nguhange kushika ni waze ali ku zuwo liami.

⁶² Yesu wambile kuli iye ngwenyi, Niumwe se hanase kwoko henyi ku sharua, nyi matala kunyima, matela wanangana wa Zambi.