Luka 8 - MUKANDA USANDU WA ZAMBI 1975

¹ Mba kulutwe lia kashimbu wapalikile ndusu ku limbo ni limbo, ni chihunda ni chihunda, nikwambujola sango lipema lia wanangana wa Zambi; ni kumi ni aali apwile hamwe nenyi.

² Mba amwe mapwo waze aawukile kuli maspiritu a ungulungulu, hi ku kukokoloka: ngwo, Maria jina likwo Ka-Mandala, kuli iye andemoniu shimbiali atuhukile.

³ Joana, pwo lia Kuza, kafufuchi ka Heronde, ni Suzana ni akwo anji waze amuvumbikile ni yikumba yo.

⁴ Muze mbunga yinene akungamine kuli iye, ni waze a ku limbo ni limbo apwile nikwizaza kuli iye, wahanjikile ni chishima ngwenyi,

⁵ Chikuwa watuhukile mukukuwa mbuto yenyi: shimbu akuwile, yimwe yaholokelele ku sesa lia jila; ayiliachile kushi lia yiliato, ni tujila a mwilu ejile, ayitakishile.

⁶ Yikwo yaholokelele ha mawe; muze yasokele, yomine, mumu meya akuhi.

⁷ Yikwo yaholokelele mukachi ka mingonga; ni mingonga yasokele kumuwika nayo, yayikeketesele.

⁸ Yikwo yaholokelele ha mavu apema, yasokele, yemine mbuto, kulakaji lia yisuho. Shimbu ambile yino yuma, watambikile ngwenyi, Yoze uli ni matwi a kwivwa, evwe.

⁹ Tumbaji twenyi amuhulile chize chishima chino muchipwa.

¹⁰ Iye wambile ngwenyi, Hananwehecho kunyingika yijimbikilo ya wanangana wa Zambi, alioze kuli akwo yinapu ni yishima; hanga nikutala, kechi kamona, nikwivwa, kechi kanyingika.

¹¹ Achi, chino we ulumbunwiso wa chishima ngwami, Mbuto, lie liji lia Zambi.

¹² Alioze waze a ku sesa lia jila, waze hanevu; kulutwe lia chize meza Ndiapu, machiza liji ku mbunge jo, hanga kechi kafuliela akaalamwine.

¹³ Alioze waze ha liwe, waze muze hevwa, matambula liji ni uwahililo; ni wano keshi miji, mafuliela ha kashimbu, ni ha mwaka wa cheseko masulumioka.

¹⁴ Yize yaholokelele hakachi ka mingonga, waze hanevu ni shimbu maya mu jila yo, makeketela ni yipikalo ni upite ni kuwaha cha mwono uno, keshi kwima mbuto ku ungunu.

¹⁵ Yize ha mavu apema, waze mu mbunge jipema, jashishika, muze hevwa liji, malikakaminya, mema mbuto ni uhumikizo.

¹⁶ Niumwe muze te hawika ndeya, mayifuka ni chisoka, hanji mayisa mushi lia muhela; alioze mayisa ha chikwachilo cha ndeya, hanga waze manjila akamone pangu.

¹⁷ Mumu chuma cha kuswama chakuhi chize kechi kachisolola; chipwe chuma cha kuhengama chize kechi kachinyingika, nikuchisolola.

¹⁸ Kashika kanyamenu ngwe chize munwivwa; mumu mweswawo ukwete, kumakamwaha; ni mweswawo keshi nacho, chipwe chize kananyongo ngwenyi, Nguli nacho, mamuchizacho.

¹⁹ Naye ni ana-akwo ejile kuli iye, alioze kahashile kuheta kuli iye mumu ha mbunga.

²⁰ Mba amulwezelecho ngwo, Noko ni anaakwenu kanamana haze kanazange kukumona.

²¹ Iye waakumbulwile ngwenyi, Mama ni ana-akwetu wano ha kwivwa liji lia Zambi kakulilinga.

²² Tangwa limwe wanjilile mu ulungu, iye mwene ni tumbaji twenyi; iye wambile kuli ayo ngwenyi, Tuzaukenu, tuye mu sali lia Chitende; no akatukile ku ngenge.

²³ Shimbu achili nikuzauka, iye wayile tulo: ni kakundukundu walundumukine ha Chitende, ni ulungu waputukile kuzala ni meya, apwile mu Utoji.

²⁴ O ejile kuli iye, amulawishile ngwo, Mwata, Mwata, tunatoko. Iye walawile, Wámbilile fuji ni kufuza cha meya: neyo yaholele, kwapwile kúlú.

²⁵ Iye ngwenyi, Ulihi Ufulielo wenu? O nikwivwa woma, akomokene, nikuliamba umwe kuli mukwo ngwo, Yono iya mámba chipwe fuji ni meya, muyimwononokena?

²⁶ O ahetele ku chifuchi cha A-Ngarase, chize chalitalangana ni Ngalileya.

²⁷ Muze atuhukile hashi, umwe lunga wa ku limbo watakanyine nenyi, mwenawo wapwile ni andemoniu shimbu linene, kazalile hina, katwamine mu zuwo, alioze hakachi ka chifuka.

²⁸ Muze amwene Yesu wakololokele nikufulamana kumeso jenyi, iye ni liji linene wambile ngwenyi, Kuchi yami ni yena, Yesu mwe Mwana wa Zambi Chitunda? Ngunaliumbu kuli yena ngwami, Kanda ungupinjisa kama.

²⁹ Mumu te hamba Spiritu ya luchisa atuhuke muli mutu. Mumu kanji wamukwachile: ni atu amulayile wa kukasa ni malenge ni kuli; iye nikupatula makana pundu, amuhungumionene kuli ndemoniu ku puya.

³⁰ Yesu wamuhulile ngwenyi, Jina lie, yena iya? Iye wambile ngwenyi, Yami Tununu, mumu te anji anjilile muli iye.

³¹ Waliumbile kuli iye, ngwenyi, Kanda ututuma mu jondo.

³² Kwapwile kuze mbunga ya ngulu anji kanali ha mulundu, o aliumbile kuli iye, aatayize kunjila muli ayo. Iye waatayijile.

³³ Mba andemoniu atuhukile muli mutu, anjilile muli ngulu ni mbunga alundumukine ha mbongo mu Chitende, yafwa.

³⁴ Muze waze aalishile amwene chize alingile, achinyine akachambulule mu limbo ni ku minda.

³⁵ O atuhukile mukumona chize chapwile, ejile kuli Yesu, awanyine mutu yoze muli iye hatuhuka andemoniu, kanatwama ku yiliato ya Yesu, hazala hina, hapwa ni mana, no evwile woma.

³⁶ Waze achimwene, aambulwilile ngwe chize apwishile mungunu mukwa andemoniu.

³⁷ Ni chizavu cheswe cha ku chifuchi cha A-Ngarase amulembele akatuke kuli ayo: mumu evwile woma wunji; iye wanjilile mu ulungu akahiluke.

³⁸ Alioze yoze lunga muli iye atuhukile andemoniu, waliumbile kuli iye hanga akapwe hamwe nenyi: alioze washikile nenyi ngwenyi,

³⁹ Hiluka ku zuwo lie, ukambujole yuma yinene hakulingila Zambi. Iye wayile kwenyi, nikwambujola ndusu mu limbo lieswe yuma yinene amulingilile Yesu.

⁴⁰ Muze Yesu ahilukile, mbunga amusambililile; mumu o eswe apwile nikumutalatala.

⁴¹ Kumanyi, lunga wejile, jina lienyi Yara, iye wapwile mukwa kuyula sunangonga, wafulamanyine ku yiliato ya Yesu, waliumbile kuli iye, eze ku zuwo lienyi;

⁴² mumu wapwile ni mwana umuwika wa pwo ni ngwe kumi lia miaka ni miaka yiali, wapwile hakamwihi ni kufwa. Alioze shimbu ayile, mbunga amushinjekele.

⁴³ Ni pwo, yoze wapwile ni musongo wa kuhita manyinga kumi lia miaka ni miaka yiali, mwenawo wahwishile kulu yikumba yenyi yeswe kuli mbuki, alioze kahashile kumuwuka niumwe.

⁴⁴ Wejile kunyima, wasele minwe ku lupula wa hina lienyi, ni haze hene kuhita cha manyinga jenyi chalitwaminyine.

⁴⁵ Yesu wambile ngwenyi, Iya wangusa minwe? Muze eswe alikalile, Petulu ni waze apwile hamwe nenyi ambile ngwo, Mwata, mbunga anakujingilika, nikukushinjeka, ni yena ngwe, Iya wangusa minwe, nyi?

⁴⁶ Alioze Yesu ngwenyi, Umwe wangusa minwe; mumu kunevwa tachi kujatuhuka muli yami.

⁴⁷ Muze pwo amwene kaswamine, wejile nikuchikima, iye nikufulamana kumeso jenyi, wambulwile kumeso ja atu eswe ha chikuma chize amusele minwe ni ngwe chize wahindukile haze hene.

⁴⁸ Wambile kuli iye ngwenyi, Mwanami, hamuka; ufulielo we hiwakupwisa mungunu; uye kanawa.

⁴⁹ Shimbu te achili nikuhanjika, umwe wa ku zuwo lia mukwa kuyula sunangonga yeza, nikwamba kuli iye ngwenyi, Mwané hafwa, kanda ukatalisa Longeshi nawa.

⁵⁰ Alioze Yesu ha kuchivwa, wamukumbulwile ngwenyi, Kanda wivwa woma; fuliela lume, iye kumakamupwisa mungunu.

⁵¹ Muze ahetele ku zuwo, katayijile niumwe kunjila, shina Petulu ni Tiangu ni Yoano, ni tato ni naye ya mwana-pwo.

⁵² Eswe te kanalili, nikulila mbimbi hali iye; alioze wambile ngwenyi. Kanda nulila; mumu kafwileko, alioze mu tulo ali,

⁵³ O amusehele, nikunyingika ngwo, Hafwa kulu.

⁵⁴ Alioze iye waatuhwishile eswe, iye, nikumukwata ku kwoko, watambikile ngwenyi, Mwana, hinduka.

⁵⁵ Spiritu yenyi yahilukilile, wahindukile haze hene: neye wambile amwehe chimwe cha kulia.

⁵⁶ Ni yisemi jenyi alishikishilile; alioze waahele koki kanda akaambulwila niumwe chize alingile.