Luka 7 - MUKANDA USANDU WA ZAMBI 1975

¹ Muze te hamanununa maliji jenyi eswe mu matwi ja atu, wanjilile mu Kafwanaume.

² Ndungo ya umwe kapitau, mulemu kuli iye, Wayijile, te wambile kufwa.

³ Muze evwile hali Yesu, watumine kuli iye makulwana a A-Yunda, nikumulembela, hanga eze akahindwise ndungo yenyi.

⁴ O muze ejile kuli Yesu, aliumbile kuli iye ngwo, Kanatela ulinge chino hali iye;

⁵ mumu kanazange vungu lietu, iye mwene watutungile sunangonga yetu.

⁶ Yesu wayile hamwe no, ni muze haheta hakamwihi ni zuwo, kapitau watumine tusendo kuli iye, ngwo, Mwene, kanda ulikatalisa; mumu chatelele unjile mu zuwo liami;

⁷ kashika chipwe chatelele kwiza kuli yena, alioze ambenu liji, ni mukweze wami kumahinduka.

⁸ Mumu yami nawa nguli mutu angusele mushi lia chiyulo, ni nguli no mushi lia yami, maswalale, mungwamba kuli yono ngwami, Yako, mba maya; ni kuli mukwo ngwami, Tweya, mba meza; ni kuli ndungo ngwami, Linga chino, mba machilinga.

⁹ Muze Yesu evwile yino yuma, wamukomokenene, watewulukilile ku mbunga yize amukawile ngwenyi, Chawanyine Ufulielo upwa haha, chipwe mu Izalele, ka.

¹⁰ Ni waze aatumine, ha kuhilukila ku zuwo, awanyine ndungo te hahinduka.

¹¹ Ha tangwa likwo, wayile ku limbo jina lialio, Naine, ni anji a kuli tumbaji twenyi ni mbunga yinene ayile hamwe nenyi.

¹² Shimbu machikundama ku chikolo cha limbo, kumanyi, ambachile haze lunga mufu, mwana wa wika wa naye, iye twamishi; ni mbunga yinene ya ku limbo apwile hamwe nenyi.

¹³ Muze Mwene amumwene, wamuvwilile keke, wambile kuli iye ngwenyi, Kanda ulila.

¹⁴ Iye wakundamine, wasele minwe ku muhango; ni akwa kumbata amanyine, iye wambile ngwenyi, Mukweze, ngwami, Hinduka.

¹⁵ Mufu wahindukile, waputukile kuhanjika, mba Wamuhanyine kuli naye.

¹⁶ Eswe akwachile woma; o achichimiekene Zambi ngwo, Profeta munene hanasoloka hakachi ketu; chikwo ngwo, Zambi hanatale hali atu jenyi.

¹⁷ Ni liji lino lia kutwala kuli iye liamwanganyine mu Yundeya mweswe, ni mu chifuchi cheswe cha kujingilika.

¹⁸ Tumbaji twa Yoano amwambulwilile ha kutwala ku yino yuma yeswe.

¹⁹ Mba Yoano watambikile aali a kuli tumbaji, waatumine kuli Yesu, ngwenyi, Shina yena uli yoze meza, nyi? Shina mutatalatala mukwo?

²⁰ Muze malunga ahetele kuli iye, ambile ngwo, Yoano Chipapachisa hatutuma kuli yena, ngwenyi, Shina yena uli yoze meza, nyi? Shina mutatalatala mukwo?

²¹ Ha ola yize yene wawukile anji ku misongo, ni yilungo, ni maspiritu a ungulungulu; walawishile meso ja tupuputa anji.

²² Mba Yesu wakumbulwile ngwenyi, Yénu, nukambulwile Yoano chize hinwamona, ni chize hinwevwa; tupuputa kanalaula ku meso, yilema kanende, akwa mbumba kanapeme, ni afwa-matwi kanevu, afu kanahinduka, kuli yiswale kakwambujola sango lipema.

²³ Kawaha mweswawo kechi kanguvwila sonyi.

²⁴ Muze te tunganda twa Yoano hakatuka, waputukile kwamba ku mbunga ha kutwala kuli Yoano ngwenyi, Ika nwayilile ku puya mukutala? Lumbungu unanyiki ni fuji, nyi?

²⁵ Alioze ika nwayilile mukutala? Mutu unazala mahina a lefuna, nyi? Waze akuzala mahina ja uhenya, kali ni upite wunji nikuwaha, mapwa mu mazuwo ja mianangana.

²⁶ Alioze ika nwayilile mukutala? Profeta, nyi? Ewa, ngwami, Umwe Wahiana chikolo profeta.

²⁷ Yono hali iye chinasonewa ngwo, Mungukatuma kanganda kami kulutwe lia meso je, Mwenawo kumakalulika jila ye kulutwe lie.

²⁸ Ngwami, Hakachi ka waze akusemuka kuli mapwo, profeta wahiana Yoano Chipapachisa wakuhi niumwe. Alioze yoze mukepe Wahiana eswe mu wanangana wa Zambi kanapu munene Wahiana iye.

²⁹ Ata eswe ni akwa kufwetesa lijimu muze evwile, asambishile Zambi, se aapapachishile ni upapachiso wa Yoano.

³⁰ Alioze A-Fwariseu ni akwa shimbi alitunyine ha kutwala kuli ayo ene mana ja Zambi, se kaapapachishile kuli iye.

³¹ Ngwe aya kashika mungupwisa atu ja chisemuko chino? Mba malifwa neya?

³² O kanapu ngwe ana anatwama mu yitanda nikulitambika umwé kuli mukwo ngwo, Twembanga ndembo kuli yenu, kunwahanganyine; twalinyenganga kuli yenu kunwalilile.

³³ Mumu Yoano Chipapachisa kejile nikulialia, chipwe nikunwanwa vinyu, mba nunambe ngwenu, Ndemoniu akwete.

³⁴ Mwe Mwana Mutu haneza nikulia, nikunwa, mba nunambe ngwenu, Talenu, chipulutu ni chizengewi, kasendo ka akwa kufwetesa lijimu ni yivulumunyi.

³⁵ Alioze mana kanasambe hali ana jenyi eswe.

³⁶ Alioze umwe wa kuli A-Fwariseu wamulakenyene, alie hamwe nenyi, iye wanjilile mu zuwo lia Ka-Fwariseu, watwamine ku mesa.

³⁷ Kumanyi, pwo wa mu limbo, chivulumunyi, muze anyingikine te iye kanatwama ku mesa mu zuwo lia Ka-Fwariseu, wanehenemo kasaji ka yitumbo ya vumba lipema;

³⁸ iye, nikumana kunyima ku yiliato yenyi, nikulila, waputukile kusanyisa yiliato yenyi ni masoji jenyi, wayikusumwine ni kambu ja mutwe wenyi; wambejele yiliato yenyi, wayiwayishile ni yitumbo.

³⁹ Muze Ka-Fwariseu yoze wamulakenyene, achimwene, wambile mu mbunge ngwenyi, Yono nyi profeta manyingika yono pwo unamuse minwe, chize apwa, mumu iye chivulumunyi.

⁴⁰ Yesu wamukumbulwile, ngwenyi, Semone, chuma chimwe nguli nacho kwamba kuli yena. Iye yamba ngwenyi, Longeshi, ambenu.

⁴¹ Ngwenyi, Umwe mukwa kuhana mikuli wapwile ni akwa mikuli aali; umwe wapwile ni kongo lia kulakaji atano a mbongo, ni mukwo makumi atano.

⁴² Muze kapwile nacho nichimwe cha kufweta, waakonekenene eswe aali. Iya wa kuli ayo mamuzanga kuhiana?

⁴³ Semone wakumbulwile, ngwenyi, Ngunashinginyeka yoze amukonekenene lize liahiana. Wambile kuli iye ngwenyi, Hiwapatula kanawa.

⁴⁴ Iye, nikutewulukila kuli pwo, wambile kuli Semone ngwenyi, Unamono yono pwo, nyi? Nanjilanga mu zuwo lie, kwanguhele meya a kusanyisa yiliato yami, alioze iye hasanyisa yiliato yami, yayikusumuna ni kambu jenyi.

⁴⁵ Kwanguhele mbeju niyimwe, alioze iye hanga nanjilanga kalitwaminyine kumbeja yiliato yami.

⁴⁶ Mutwe wami ni yitumbo kwauwayishile, alioze iye hawayisa yiliato yami ni yitumbo.

⁴⁷ Kashika, ngwami, Ngunamukonekena milonga yenyi yinji; mumu wazangile chikolo: alioze yoze mamukonekena chikepe, mazanga chikepe.

⁴⁸ Iye wambile kuli iye ngwenyi, Ngunakukonekena milonga ye.

⁴⁹ Waze atwamine hamwe nenyi ku mesa, aputukile kwamba mu mbunge jo ngwo, Yono iya chipwe kakukonekena milonga?

⁵⁰ Iye wambile kuli pwo ngwenyi, Ufulielo we hiwakulamwina; uye kanawa.