Luka 6 - MUKANDA USANDU WA ZAMBI 1975

¹ Mba ha tangwa lia Sambata wapalikile mu minda; ni tumbaji twenyi yahulula nona, yalia, nikujilakumuna mu moko jo.

² Alioze amwe a kuli A-Fwariseu ambile kuli ayo ngwo, Kuchi te nunalingi chize kuchalitele ni shimbi kulinga ha tangwa lia Sambata?

³ Yesu waakumbulwile ngwenyi, Kunwatangile chipwe chize alingile David, muze evwile zala, iye ni waze apwile hamwe nenyi, nyi?

⁴ Ngwe chize anjilile mu zuwo lia Zambi, wanjile mbolo ja kutumbieka, walile, wahanyine kuli waze apwile hamwe nenyi, jize kuchalitele ni shimbi kulia shina hali asasendote wika?

⁵ Iye wambile kuli ayo ngwenyi, Mwe Mwana Mutu iye mwenya Sambata nawa.

⁶ Mba ha tangwa lia Sambata likwo nawa, wanjilile mu sunangonga, walongesele. Mwapwilemo mutu ni kwoko lienyi lia chindume lia kusosewa.

⁷ Akwa kusonyeka ni A-Fwariseu amulayilile, kachi mawuka ha tangwa lia Sambata, hanga akawane chitela muli iye.

⁸ Alioze iye wanyingikine manyonga jo; wambile kuli mutu yoze wapwile ni kwoko lienyi lia kusosewa ngwenyi, Katuka, umane mukachi. Iye wakatukile, wamanyinemo.

⁹ Yesu wambile kuli ayo ngwenyi, Mungunuhula ngwami, Muchilita ni shimbi ha tangwa lia Sambata shina kulinga yipema nyi, shina kulinga yipi? Shina kulamwina mwono nyi, shina kwonwona?

¹⁰ Iye wakengesele hali ayo eswe, wambile kuli iye ngwenyi, Olola kwoko lie. Iye waliolwele, ni kwoko lienyi liahindukile lingunu ngwe likwo.

¹¹ Alioze o azalile tò ni ufwatulo, ahanjikile umwe kuli mukwo ha chize malinga kuli Yesu.

¹² Ha matangwa aze wayile ku mulundu mukulemba; iye wahwishile ufuku weswe nikulemba kuli Zambi.

¹³ Muze hapwile mwalwa, watambikile tumbaji twenyi; iye watongwele hakachi ko kumi ni aali, eno nawa waalukile jina ngwenyi, Apostolo.

¹⁴ Ngwo, Semone, mwenawo amulukile jina likwo ngwo, Petulu, ni mwanakwo Andeleu, ni Tiangu ni Yoano, ni Fwilipe ni Mbatolomeu;

¹⁵ ni Mateu ni Tomase, ni Tiangu mwana Alefweu, ni Semone, amuvulukile ngwo, Ka-Zelo.

¹⁶ Ni Yundase mwana Tiangu, ni Yundase Ka-Keriote, mwenawo nawa wapwile mwe mukwa kuhandukulula.

¹⁷ Iye wapalumukine hamwe no, wamanyine homa ha Salama, ni mbunga yinene ya tumbaji twenyi, ni chizavu chinene cha atu a ku Yundeya mweswe ni a ku Yerusaleme, ni a ku mbaka ya Teru ni Sendone, eno ejile mukumwivwa, akaahindwise ku misongo yo;

¹⁸ iye wawukile waze aapinjishile kuli maspiritu a luchisa.

¹⁹ Ni mbunga yeswe afupile kumusa minwe; mumu tachi jatuhukile muli iye, jahindwishile eswe.

²⁰ Iye wahetwile meso jenyi hali tumbaji twenyi, ngwenyi, Kunwawaha, yenu, yiswale; mumu wanangana wa Zambi niwenu.

²¹ Kunwawaha, yenu nwakwivwa zala haliapwila, mumu kumunukakuta. Kunwawaha, yenu nwakulilalila haliapwila, mumu kumunukaseha.

²² Kunwawaha, yenu, muze atu manuvwila kole, muze malihandununa ni yenu, manuchoka, mambila haze jina lienu ngwe lipi, mumu hali mwe Mwana Mutu;

²³ Wahililenu ha tangwa lize, tumbwokenu ni uwahililo; mumu kwononona chenu chinene mwilu, mumu chizechene akako alingile kuli aprofeta.

²⁴ Alioze lamba lienu, yenu pichi! mumu hinunatambula kulembejeka chenu.

²⁵ Lamba lienu, yenu nwakukuta haliapwila, mumu kumunukevwa zala! Lamba lienu, yenu nwakuseha haliapwila! mumu kumunukanenganyana nikulila!

²⁶ Lamba lienu, muze atu eswe manuchichimieka! mumu chizechene akako alingile kuli aprofeta a kwonga.

²⁷ Alioze kuli yenu nwakwivwa, ngwami, Zangenu akwa kole jenu, lingenu kanawa kuli waze akunuvwila kole,

²⁸ Wahisenu waze akunushinga, lembenu hali waze akunulinga chipi.

²⁹ Kuli yoze makulamba ha tafu, mwehe tafu likwo nawa, kuli yoze mafupa kuchiza mbinja ye, kanda ukamukanjisa kuchiza chikuto che nawa.

³⁰ Hana kuli mweswe makwita, kuli yoze machiza yikumba ye, kanda ukayita nawa.

³¹ Chizechene ngwe nunazange atu akalinge kuli yenu, lingenu nawa kuli ayo chizechene.

³² Nyi kachi nunazange waze akunuzanga, hahi manusakwilila? Mumu chipwe yivulumunyi kakuzanga waze akwazanga.

³³ Kachi nwakulinga yipema kuli waze akulinga yipema kuli yenu, hahi manusakwilila? Mumu chipwe yivulumunyi kakulinga chizechene.

³⁴ Mumu kachi munuhana mukuli kuli waze munutalatala kutambula, hahi manusakwilila? Mumu chipwe yivulumunyi kakuhana mikuli kuli yivulumunyi, hanga akatambule chizechene.

³⁵ Alioze zangenu akwa kole jenu, lingenu yipema kuli ayo, hanenu mukuli, kanda nutalatala chize mahilwisa; ni kwononona chenu kumuchikapwa chinene; kumunukapwa ana ja mwe Chitunda: mumu iye mukwa utu kuli akwa kaleleso ni yingulungulu.

³⁶ Pwenu akwa keke kashika chizechene ngwe Tatenu nawa iye mukwa keke.

³⁷ Kanda nukapatwila akwenu, mba kechi kanupatwila; kanda nukahisa mba kechi kanuhisa; konekenenu, mba kumakanukonekena.

³⁸ Hanenu, mba kumakanwaha; njongo yipema, ya kukona, ya kunyikumuna hamwe, ya kusupwoka, kumakayihana mu hina lienu, mumu ni cheseko chize munweseka nacho, kumakanwesekela cheka nawa.

³⁹ Iye wahanjikile nawa chishima kuli ayo ngwenyi, Kapuputa mahasa kusongwela kapuputa, nyi? Eswe aali, kechi kaholokela mu wina nyi?

⁴⁰ Kambaji keshi kuhiana longeshi yenyi: alioze mweswe mungunu kumakapwa chizechene ngwe longeshi yenyi.

⁴¹ Alioze kuchi te unatale ku koma kaze kali mu liso lia mukwenu, alioze kushi kumona mukambo uze uli mu liso lie?

⁴² Hanji ngwe kuchi muhasa kwamba kuli mukwenu ngwe, Mukwetu, nguchize koma kaze kali mu liso lie, muze yena mwene kushi kumona mukambo uze uli mu liso lie? Chilembese, Uliange kuchiza mukambo mu liso lie, mba mumona kanawa kuchiza koma kaze kali mu liso lia mukwenu.

⁴³ Mumu mutondo upema uze muwima mihuko yipi wakuhi niumwe; chipwe mutondo upi uze muwima mihuko yipema wakuhi niumwe.

⁴⁴ Mumu mitondo yeswe kanayinyingika ku mihuko yayo; mumu atu keshi kuhela makuyu ku mingonga, chipwe uva ku mikalale, ka.

⁴⁵ Mutu mupema ku upite upema wa mbunge yenyi masolola yipema, ni chingulungulu ku upite wa ungulungulu wa mbunge yenyi masolola ungulungulu; mumu ku kulumbama cha mbunge kanwa mulihanjika.

⁴⁶ Kuchi te nunanguvuluka ngwenu, Mwene, Mwene, alioze kunushi kulinga yuma yize ngunambe?

⁴⁷ Mweswawo meza kuli yami, mevwa maliji jami, maalinga, mungunulweza yoze malifwa nenyi:

⁴⁸ kanapu ngwe mutu kanatungu zuwo, washimine nikujotola; wasele fundamentu ha liwe. Muze mihwiji yejile, yalundumukine ha zuwo lize, kuyahashile kulinyikisa, mumu alitungile ha liwe.

⁴⁹ Yoze mevwa alioze keshi kulinga, kanapu ngwe mutu yoze watungile zuwo ha mavu, ni fundamentu yakuhi; ha lienalio mihwiji yalundumukine, haze hene liapuzukile, ni kupuzuka cha zuwo lize chapwile chinene.